ಅಶ್ಲೀಲ ಚಿತ್ರಗಳ ಬೆದರಿಕೆಯೊಡ್ಡಿ ವಿವಾಹಿತ ಮಹಿಳೆ ಮೇಲೆ ಬ್ಯಾಂಕ್ ಉದ್ಯೋಗಿಯಿಂದ ರೇಪ್!

ಮುಂಬೈ: ತನ್ನ ಸಹೋದ್ಯೋಗಿಯಾಗಿದ್ದ ವಿವಾಹಿತ ಮಹಿಳೆಗೆ ತಮ್ಮಿಬ್ಬರ ನಡುವಿನ ಸೆಕ್ಸ್ ವಿಡಿಯೋ ಹಾಗೂ ಆಕೆಯ ಬೆತ್ತಲೆ ಫೋಟೋವನ್ನು ಆಕೆಯ ಪತಿಗೆ ಕಳುಹಿಸುವ ಬೆದರಿಕೆಯೊಡ್ಡಿ ಬ್ಯಾಂಕ್ ಉದ್ಯೋಗಿಯೊಬ್ಬ ಆಕೆಯನ್ನು ಅತ್ಯಾಚರಿಸಿದ್ದಾನೆ. 

ಮುಂಬೈನ ಲೋವರ್ ಪರೇಲ್ ನಿವಾಸಿ 38 ವರ್ಷದ ವಿಲಾಸ್ ಕೃಷ್ಣ ಕದಂ ಎಂಬಾತ ತನ್ನ ಮಾಜಿ ಸಹೋದ್ಯೋಗಿ ಮೇಲೆ ಅತ್ಯಾಚಾರ ನಡೆಸಿದ್ದು ಈ ಸಂಬಂಧ ಸಂತ್ರಸ್ತ ಮಹಿಳೆ ಪೊಲೀಸರಿಗೆ ದೂರು ನೀಡಿದ್ದು ಈ ದೂರಿನನ್ವಯ ಪೊಲೀಸರು ವಿಲಾಸ್ ನನ್ನು ಬಂಧಿಸಿದ್ದಾರೆ. 

ವಿಲಾಸ್ ಮತ್ತು ಸಂತ್ರಸ್ತ ಮಹಿಳೆ 2008ರಿಂದ ಒಂದೇ ಬ್ಯಾಂಕ್ ನಲ್ಲಿ ಕೆಲಸ ಮಾಡುತ್ತಿದ್ದರು. ಇಬ್ಬರ ನಡುವೆ ಪ್ರೀತಿ ಬೆಳೆದು 2013ರಿಂದ 2015ರವರೆಗೆ ದೈಹಿಕ ಸಂಬಂಧ ಹೊಂದಿದ್ದರು. ಆದರೆ 2017ರಲ್ಲಿ ಸಂತ್ರಸ್ತ ಮಹಿಳೆ ಬೇರೊಬ್ಬರನ್ನು ವಿವಾಹವಾಗಿದ್ದಳು. 

ಸಂತ್ರಸ್ತ ಮಹಿಳೆ ತನ್ನ ಮದುವೆಗೂ ಮುನ್ನ ವಿಲಾಸ್ ನನ್ನು ಭೇಟಿಯಾಗಿ ನಮ್ಮ ಸಂಬಂಧವನ್ನು ನಿಲ್ಲಿಸುವಂತೆ ತಿಳಿಸಿದ್ದಳು. ಆದರೆ ಅವನು ಅದಕ್ಕೆ ಒಪ್ಪಲಿಲ್ಲ. ಕೊನೆಯದಾಗಿ ನಿನ್ನ ಜೊತೆಗೆ ಮಾತನಾಡಬೇಕು ಎಂದು ದಾದರ್ ಸಮೀಪದ ಸೇನಾ ಭವನಕ್ಕೆ ಬಾ ಎಂದು 2017ರಲ್ಲಿ ಕರೆದಿದ್ದ. ಅಲ್ಲಿ ನನ್ನ ಮೇಲೆ ಅತ್ಯಾಚಾರ ಎಸಗಿದ್ದಾನೆ ಎಂದು ಮಹಿಳೆ ಆರೋಪಿಸಿದ್ದಾಳೆ. 

ಮದುವೆ ನಂತರವೂ ಸುಮ್ಮನಾಗದ ವಿಲಾಸ್ ನನಗೆ ಫೋನ್ ಮಾಡಿ ಬರುವಂತೆ ಒತ್ತಡ ಹಾಕುತ್ತಿದ್ದ. ಇಲ್ಲದಿದ್ದರೆ ನಮ್ಮಿಬ್ಬರ ನಡುವಿನ ರಾಸಲೀಲೆಯ ವಿಡಿಯೋವನ್ನು ನಿನ್ನ ಪತಿಗೆ ಕಳುಹಿಸುವುದಾಗಿ ಬೆದರಿಕೆಯೊಡ್ಡಿದ್ದ ಇದರಿಂದಾಗಿ ನಾನು ಆತನು ಕರೆದ ಕಡೆ ಹೋಗಬೇಕಾದ ಪರಿಸ್ಥಿತಿ ಬಂದಿತ್ತು ಎಂದು ಸಂತ್ರಸ್ತ ಮಹಿಳೆ ದೂರಿನಲ್ಲಿ ತಿಳಿಸಿದ್ದಾಳೆ.