ಹೊಸ ಆವೃತ್ತಿಯ ಆಕಾಶ್ ಕ್ಷಿಪಣಿ ಪರೀಕ್ಷಾರ್ಥ ಉಡಾವಣೆ ಯಶಸ್ವಿ: ವಿಶೇಷತೆಗಳ ಬಗ್ಗೆ ಇಲ್ಲಿದೆ ಮಾಹಿತಿ

ಒಡಿಶಾ: ಆಕಾಶ್ ಕ್ಷಿಪಣಿಯ ಹೊಸ ಆವೃತ್ತಿಯನ್ನು ಸೆ.27 ರಂದು ಒಡಿಶಾದ ಚಂಡಿಪುರದ ಇಂಟಿಗ್ರೇಟೆಡ್ ಟೆಸ್ಟ್ ರೇಂಜ್ ನಿಂದ ಪರೀಕ್ಷಾರ್ಥ ಪ್ರಯೋಗ ಮಾಡಲಾಗಿದೆ.

ಕ್ಷಿಪಣಿ- ಆಕಾಶ್ ಪ್ರೈಮ್ ಎಂದು ಇದಕ್ಕೆ ನಾಮಕರಣ ಮಾಡಲಾಗಿದ್ದು, ತನ್ನ ಮೊದಲ ಪರೀಕ್ಷೆಯಲ್ಲಿ ಶತ್ರು ಯುದ್ಧವಿಮಾನದ ಮಾದರಿಯಲ್ಲಿದ್ದ ಮಾನವ ರಹಿತ ವೈಮಾನಿಕ ಟಾರ್ಗೆಟ್ ನ್ನು ಈ ಕ್ಷಿಪಣಿ ನಾಶ ಮಾಡುವುದರಲ್ಲಿ ಯಶಸ್ವಿಯಾಗಿದೆ.

ವಿಮಾನ ಸುಮಾರು 4:30 ರ ವೇಳೆಗೆ ಪರೀಕ್ಷೆಗೊಳಪಟ್ಟಿತು.

ಈಗಿರುವ ಆಕಾಶ್ ವ್ಯವಸ್ಥೆಗೆ ಹೋಲಿಕೆ ಮಾಡಿದಲ್ಲಿ, ಆಕಾಶ್ ಪ್ರೈಮ್ ದೇಶೀಯ ಸಕ್ರಿಯ ಆರ್ ಎಫ್ ಸೀಕರ್ ನ್ನು ಹೊಂದಿದ್ದು, ಹೆಚ್ಚಿನ ನಿಖರತೆ ಇದೆ. ಎತ್ತರದ ಪ್ರದೇಶಗಳಲ್ಲಿ, ಕಡಿಮೆ ತಾಪಮಾನದ ವಾತಾವರಣಗಳಲ್ಲಿ ಈ ಕ್ಷಿಪಣಿ ಕಾರ್ಯನಿರ್ವಹಣೆ ಮಾಡುವ ಸಾಮರ್ಥ್ಯ ಹೊಂದಿದ್ದು ಸೇನೆಯ ಸಾಮರ್ಥ್ಯವನ್ನು ಮತ್ತಷ್ಟು ಹೆಚ್ಚಿಸಲಿದೆ. 

ಈ ಯಶಸ್ಸಿಗಾಗಿ ಡಿಆರ್ ಡಿಒ, ಭಾರತೀಯ ಸೇನೆ, ವಾಯುಪಡೆ ಹಾಗೂ ಇನ್ನಿತರ ಸಂಬಂಧಿಸಿದ ಇಲಾಖೆಗಳಿಗೆ ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅಭಿನಂದನೆ ಸಲ್ಲಿಸಿದ್ದಾರೆ.