ಉತ್ತಮ ವಿಧೇಯಕಕ್ಕೆ ವಿರೋಧ ಎಂದಿಗೂ ಇದ್ದೇ ಇರುತ್ತದೆ: ಸಚಿವ ರಮೇಶ್ ಕುಮಾರ್

ಬೆಳಗಾವಿ: ಕೆಪಿಎಂಇಎ ಕಾಯ್ದೆ ಕುರಿತಂತೆ ಸರ್ಕಾರ ಹಾಗೂ ಖಾಸಗಿ ಆಸ್ಪತ್ರೆ ವೈದ್ಯರ ನಡುವಿನ ಜಟಾಪಟಿ ನಾಲ್ಕನೇ ದಿನಕ್ಕೆ ಕಾಲಿಟ್ಟಿದ್ದು, ಉತ್ತಮವಾದ ವಿಧೇಯಕಕ್ಕೆ ವಿರೋಧ ಎಂದಿಗೂ ಇದ್ದೇ ಇರುತ್ತದೆ ಎಂದು ಆರೋಗ್ಯ ಸಚಿವ ರಮೇಶ್ ಕುಮಾರ್ ಅವರು ಗುರುವಾರ ಹೇಳಿದ್ದಾರೆ. 

ವಿಧಾನಮಂಡಲ ಅಧಿವೇಶನದ ಶೂನ್ಯ ಅವಧಿಯಲ್ಲಿ ಮಾತನಾಡಿರುವ ರಮೇಶ್ ಕುಮಾರ್ ಅವರು, ಉತ್ತಮವಾದ ವಿಧೇಯಕಕ್ಕೆ ಎಂದಿಗೂ ವಿರೋಧಗಳು ಇದ್ದೇ ಇರುತ್ತವೆ. ಆದರೆ, ಪ್ರಸ್ತುತ ಉದ್ಭವಗೊಂಡಿರುವ ತಪ್ಪು ತಿಳುವಳಿಕೆಗಳ ಕುರಿತಂತೆ ಸ್ಪಷ್ಟನೆ ನೀಡಲು ಸರ್ಕಾರ ಸಿದ್ಧವಾಗಿದೆ. ವೈದ್ಯರು ತಮ್ಮ ಕುಂದುಕೊರತೆಗಳನ್ನು ಬಗೆಹರಿಸಿಕೊಳ್ಳುವಲ್ಲಿ ಹಿಂದಕ್ಕೆ ಸರಿಯುತ್ತಿದ್ದಾರೆಂದು ಹೇಳಿದ್ದಾರೆ. 

ಜನರ ತೆರಿಗೆ ಹಣವನ್ನು ಸರ್ಕಾರ ಬಳಕೆ ಮಾಡುತ್ತಿದ್ದು, ಬಡವರಿಗೆ ಸೇವೆ ಸಲ್ಲಿಸಲು ಸರ್ಕಾರ ಬದ್ಧವಾಗಿದೆ. ಸರ್ಕಾರಿ ಆಸ್ಪತ್ರೆಗಳ ಮೇಲೆ ಸರ್ಕಾರ ಅವಲಂಬನೆಗೊಂಡಿರುವುದು ಸತ್ಯ. ಆದರೆ, ವೈದ್ಯರು ತಮ್ಮ ಎಲ್ಲಾ ಆಗ್ರಹಗಳು ಈಡೇರಲೇ ಬೇಕು ಎಂದು ಆಗ್ರಹಿಸಿದರೆ ಅದು ಸಾಧ್ಯವಿಲ್ಲ ಎಂದು ತಿಳಿಸಿದ್ದಾರೆ.