ಹೈದ್ರಾಬಾದ್: 5 ಬಾರಿ ವಿಶ್ವ ಚಾಂಪಿಯನ್ ಪಟ್ಟಕ್ಕೇರಿದ್ದ ವಿಶ್ವನಾಥನ್ ಆನಂದ್, ತಾನು ಇನ್ನಷ್ಟು ಪಂದ್ಯವನ್ನಾಡಲು ಇಚ್ಛಿಸುತ್ತಿದ್ದು, ಇಷ್ಟು ಬೇಗ ನಿವೃತ್ತನಾಗುವುದಿಲ್ಲ ಎಂದು ಹೇಳಿದ್ದಾರೆ.
ಶುಕ್ರವಾರ ಮಾಧ್ಯಮದವರೊಂದಿಗೆ ಮಾತನಾಡಿದ ಆನಂದ್‌ರಲ್ಲಿ ನಿಮ್ಮ ಉತ್ತಮ ಪ್ರದರ್ಶನ ಇನ್ಮುಂದೆ ಬರಲಿದೆಯೇ? ಎಂದು ಕೇಳಿದಾಗ, ನಾನು ಅದನ್ನೇ ನಿರೀಕ್ಷಿಸುತ್ತಿದ್ದೇನೆ, ನಾನು ಆಶಾವಾದಿಯಾಗಿರಲು ಯತ್ನಿಸುತ್ತೇನೆ.
ಪ್ರಸಕ್ತ ವರ್ಷದಲ್ಲಿ ನನ್ನ ಪ್ರದರ್ಶನದ ಬಗ್ಗೆ ನನಗೆ ತೃಪ್ತಿಯಿದೆ. ಹಲವಾರು ಪಂದ್ಯಗಳಲ್ಲಿ ನಾನು ಚೆನ್ನಾಗಿಯೇ ಆಡಿದೆ. ಮೂರು ಪಂದ್ಯಗಳನ್ನು ನಾನು ಗೆದ್ದುಕೊಂಡೆ. ಮುಂದೆಯೂ ಇದೇ ರೀತಿ ಮುಂದುವರಿಯಲು ನಾನು ಬಯಸುತ್ತೇನೆ ಎಂದು ನುಡಿದಿದ್ದಾರೆ.
ಆದಾಗ್ಯೂ, ವಿಶ್ವ ಚಾಂಪಿಯನ್ ಪಂದ್ಯದಲ್ಲಿ ಮಾಗ್ಸನ್ ಕಾರ್ಲಸನ್ ವಿರುದ್ಧ ಪರಾಭವ ಅನುಭವಿಸಿದರ ಬಗ್ಗೆ ಮಾತನಾಡಿದ ಆನಂದ್, ನಾನು ಹೆಚ್ಚು ಅವಕಾಶಗಳನ್ನು ಸೃಷ್ಟಿಸಿಕೊಂಡೆ. ಆದರೆ ಅದನ್ನು ಸರಿಯಾಗಿ ಬಳಸಿಕೊಳ್ಳುವುದರಲ್ಲಿ ವಿಫಲನಾದೆ ಎಂದು ಹೇಳಿದ್ದಾರೆ.
ನೀವು ಕೋಚಿಂಗ್ ನೀಡಲು ಆಸಕ್ತಿ ವಹಿಸಿದ್ದೀರಾ? ಎಂಬ ಪ್ರಶ್ನೆಗೆ ಉತ್ತರಿಸಿದ ಗ್ರಾಂಡ್ ಮಾಸ್ಟರ್, ಈ ಬಗ್ಗೆ ನಾನು ಯೋಚಿಸಿಯೇ ಇಲ್ಲ. ಇನ್ನು ಮುಂದೆಯೂ ಹೆಚ್ಚು ಹೆಚ್ಚು ಆಟಗಳನ್ನು ಆಡಲು ನಾನು ಬಯಸಿದ್ದು, ಅದರತ್ತ ಹೆಚ್ಚು ಗಮನ ಹರಿಸುತ್ತೇನೆ ಎಂದಿದ್ದಾರೆ.
Advertisement