ಫೆಡರರ್ ಪ್ರೀ-ಕ್ವಾರ್ಟರ್ ಗೆ

ಲಂಡನ್: ಪ್ರತಿಷ್ಠಿತ ವಿಂಬಲ್ಡನ್ ಟೆನಿಸ್ ಪಂದ್ಯಾವಳಿಯಲ್ಲಿ ಹಿರಿಯ ಟೆನಿಸ್ ಆಟಗಾರ ರೋಜರ್ ಫೆಡರರ್ ಹಾಗೂ ಡೆನ್ಮಾರ್ಕ್ ನ ಕೆರೋಲಿನ್ ವೋಜ್ನಿಯಾಕಿ ಕ್ರಮವಾಗಿ ಪುರುಷರ ಹಾಗೂ ಮಹಿಳೆಯರ ವಿಭಾಗದಲ್ಲಿ ಪ್ರೀ-ಕ್ವಾರ್ಟರ್ ಫೈನಲ್ ತಲುಪಿದ್ದಾರೆ.

ಶುಕ್ರವಾರ ಸೆಂಟರ್ ಕೋರ್ಟ್ ನಲ್ಲಿ ನಡೆದ ಮೂರನೇ ಸುತ್ತಿನ ಪಂದ್ಯದಲ್ಲಿ ಸ್ವಿಸ್ ಆಟಗಾರ ಹಾಗೂ ಹದಿನೇಳು ಗ್ರ್ಯಾಂಡ್ ಸ್ಲಾಂ ಪ್ರಶಸ್ತಿಗಳ ಒಡೆಯ ರೋಜರ್ ಫೆಡರರ್ ಆಸ್ಟ್ರೇಲಿಯಾದ ಸ್ಯಾಮ್ ಗ್ರೋಥ್ ವಿರುದ್ಧ 6-4,6-4,6-7, (5-7), 6-2 ಸೆಟ್ ಗಳಿಂದ ಗೆಲುವು ಸಾಧಿಸಿ ಅಂತಿಮ ಹದಿನಾರರ ಘಟ್ಟಕ್ಕೆ ಪ್ರವೇಶ ಪಡೆದರು.

ಏತನ್ಮಧ್ಯೆ, ಸ್ಪೇನ್ ನ ರಾಫೇಲ್ ನಡಾಲ್ ವಿರುದ್ಧ ಭರ್ಜರಿ ಗೆಲುವು ಪಡೆದು ಮೈಮರೆತಿದ್ದ ಜರ್ಮನಿಯ ಡಸ್ಟಿನ್ ಬ್ರೌನ್ ಹೋರಾಟಕ್ಕೆ ತೆರೆಬಿದ್ದಿದೆ. ಇಂದು ನಡೆದ ಮೂರನೇ ಸುತ್ತಿನ ಪಂದ್ಯದಲ್ಲಿ ಅವರು ಸರ್ಬಿಯಾದ ವಿಕ್ಟರ್ ಟ್ರಿಯೋಕಿ ವಿರುದ್ಧ 4-6, 6-7,(3/7), 6-4 ಮತ್ತು 3-6 ಸೆಟ್ ಗಳಿಂದ ಸೋಲನುಭವಿಸಿದರು.

ಬೋಪಣ್ಣ ಜೋಡಿ ಕ್ವಾರ್ಟರ್ ಫೈನಲ್ ಗೆ: ಭಾರತದ ಭರವಸೆಯ ಟೆನಿಸ್ ಆಟಗಾರ ರೋಹನ್ ಬೋಪಣ್ಣ ಮತ್ತು ರೋಮೇನಿಯಾದ ಫ್ಲೋರಿನ್ ಮರ್ಗಿಯಾ ಜೋಡಿ ವಿಂಬಲ್ಡನ್ ಟೆನಿಸ್ ಟೂರ್ನಿಯ ಕ್ವಾರ್ಟರ್ ಫೈನಲ್ ಸುತ್ತಿಗೆ ಪ್ರವೇಶಿಸಿದೆ.

ಶುಕ್ರವಾರ ತಡರಾತ್ರಿ ನಡೆದ ಪುರುಷರ ಡಬಲ್ಸ್ ವಿಭಾಗದ ಎರಡನೇ ಸುತ್ತಿನ ಪಂದ್ಯದಲ್ಲಿ ಬೋಪಣ್ಣ ಜೋಡಿಯು ಥಾಮಸ್ ಬೆಲೂಕಿ ಮತ್ತು ಗ್ಯುಲೆರ್ಮೊ ಡುರನ್ ಜೋಡಿ ವಿರುದ್ಧದ ಮೂರು ಸೆಟ್ ಗಳ ಕಠಿಣಕಾರ ಹೋರಾಟವನ್ನು 7-5, 7-6(7-5), 7-6(7-5) ಅಂತರದಿಂದ ಹತ್ತಿಕ್ಕಿ ಎಂಟರ ಘಟ್ಟಕ್ಕೆ ಲಗ್ಗೆ ಹಾಕಿತು.

3ನೇ ಸುತ್ತಿಗೆ ಸಾನಿಯಾ-ಹಿಂಗಿಸ್ ಜೋಡಿ
ಅಗ್ರ ಶ್ರೇಯಾಂಕಿತ ಜೋಡಿ ಭಾರತದ ಸಾನಿಯಾ ಮಿರ್ಜಾ ಹಾಗೂ ಸ್ವಿಜರ್ಲೆಂಡ್ ನ ಮಾರ್ಟಿನಾ ಹಿಂಗಿಸ್ ಜೋಡಿಯು ವಿಂಬಲ್ಡನ್ ಟೆನಿಸ್ ಟೂರ್ನಿಯ ಮೂರನೇ ಸುತ್ತಿಗೆ ಪ್ರವೇಶಿಸಿದೆ.

ಶನಿವಾರ ನಡೆದ ಮಹಿಳೆಯರ ಡಬಲ್ಸ್ ನ ಎರಡನೇ ಸುತ್ತಿನ ಪಂದ್ಯದಲ್ಲಿ ಸಾನಿಯಾ ಮಿರ್ಜಾ ಹಾಗೂ ಮಾರ್ಟಿನಾ ಹಿಂಗಿಸ್, ತಮ್ಮ ಪ್ರತಿಸ್ಪರ್ಧಿ ಜೋಡಿ ಜಪಾನ್ ನ ಕಿಮಿಕೊ ಡೇಟ್ ಕ್ರುಮ್ ಹಾಗೂ ಫ್ರಾನ್ಸೆಸ್ಕಾ ಶಿಯಾವೊನೆ ವಿರುದ್ಧ ಗೆಲುವು ದಾಖಲಿಸಿತು.