ಕರಾಚಿ: ಪಾಕಿಸ್ತಾನದ ಪ್ರಮುಖ ಬೌಲರ್ ಗಳನ್ನು ಅಮಾನತು ಮಾಡುವುದಕ್ಕೆ ಬಿಸಿಸಿಐ ಷಡ್ಯಂತ್ರ ರೂಪಿಸಿದೆ ಎಂದು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ನ ಮಾಜಿ ಅಧ್ಯಕ್ಷ ಝಾಕ ಅಶ್ರಫ್ ಆರೋಪಿಸಿದ್ದಾರೆ.
ಪಾಕಿಸ್ತಾನ ಕ್ರಿಕೆಟ್ ಮಂಡಳಿ ಬಿಸಿಸಿಐ ನ್ನು ಓಲೈಸುವ ನೀತಿ ಅಳವಡಿಸಿಕೊಂಡಿದೆ. ಆದರೆ ಇದರಿಂದಾಗಿ ಪಿಸಿಬಿಗೆ ಯಾವುದೇ ಉಪಯೋಗವಾಗಿಲ್ಲ ಎಂದು ಝಾಕ ಅಶ್ರಫ್ ಹೇಳಿದ್ದಾರೆ. ಶಂಕಾಸ್ಪದ ಬೌಲಿಂಗ್ ಆರೋಪಕ್ಕೆ ಸಂಬಂಧಿಸಿದಂತೆ ಮೊಹಮದ್ ಹಫೀಜ್ ವಿರುದ್ಧ ಕೈಗೊಂಡಿರುವ ಕ್ರಮವನ್ನು ರದ್ದುಗೊಳಿಸಲು ಪಿಸಿಬಿ ಐಸಿಸಿಗೆ ಮನವಿ ಮಾಡಬಹುದಾಗಿತ್ತು ಎಂದಿರುವ ಅಶ್ರಫ್, ಮೊಹಮದ್ ಹಫೀಜ್ ವಿರುದ್ಧ ಕೈಗೊಂಡಿರುವ ಕ್ರಮದ ಹಿಂದೆ ಬಿಸಿಸಿಐ ಷಡ್ಯಂತ್ರವಿದೆ ಎಂದು ಆರೋಪಿಸಿದ್ದಾರೆ. ಪಾಕಿಸ್ತಾನದ ಪ್ರಮುಖ ಬೌಲರ್ ಗಳನ್ನು ಅಮಾನತು ಮಾಡಿಸಬೇಕೆಂಬ ಉದ್ದೇಶ ಬಿಸಿಸಿಐಗಿದೆ ಎಂದು ಅಶ್ರಫ್ ಹೇಳಿದ್ದಾರೆ.
ವಿಶ್ವಕಪ್ ಸಂದರ್ಭದಲ್ಲಿ ಪಾಕಿಸ್ತಾನದ ಪ್ರಮುಖ ಬೌಲರ್ ಗಳಾದ ಹಫೀಜ್ ಹಾಗೂ ಸಯೀದ್ ಅಜ್ಮಲ್ ಅಮಾನತುಗೊಂಡಿದ್ದರಿಂದ ಪಾಕಿಸ್ತಾನಕ್ಕೆ ಹಿನ್ನಡೆಯುಂಟಾಗಿದೆ ಇದಕ್ಕೆ ಬಿಸಿಸಿಐ ಪಿತೂರಿಯೇ ಕಾರಣ. ಶಂಕಾಸ್ಪದ ಬೌಲಿಂಗ್ ಹಿನ್ನೆಲೆಯಲ್ಲಿ ಇಬ್ಬರೂ ಬೌಲರ್ ಗಳನ್ನು ಜೈವಿಕ-ಚಲನಶಾಸ್ತ್ರ ಪರೀಕ್ಷೆಗಾಗಿ ಆಸ್ಟ್ರೇಲಿಯಾ ಹಾಗೂ ಆಫ್ರಿಕಾಗೆ ಕಳಿಸುವ ಬದಲು ಚೆನ್ನೈ ಗೆ ಕಳಿಸಲಾಗಿದ್ದನ್ನು ಅಶ್ರಫ್ ಪ್ರಶ್ನಿಸಿದ್ದಾರೆ.
