ಚೆನ್ನೈ: ಕಳೆದ ಮೂರು ಪಂದ್ಯಗಳಲ್ಲಿ ಎರಡರಲ್ಲಿ ಗೆಲುವು ಹಾಗೂ ಮತ್ತೊಂದು ಪಂದ್ಯದಲ್ಲಿ ಅತ್ಯುತ್ತಮ ಪ್ರದರ್ಶನ ನೀಡಿದ್ದರೂ ಮಳೆ ತಣೀರೆರಚಿದ್ದರಿಂದ ಗೆಲ್ಲುವ ಉತ್ತಮ ಅವಕಾಶದಿಂದ ವಂಚಿತವಾಗಿದ್ದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಆಟಗಾರರು ಹೆಚ್ಚು ಆತ್ಮವಿಶ್ವಾಸದಿಂದ ಪುಟಿಯುತ್ತಿದ್ದಾರೆ.
ಮತ್ತೊಂದೆಡೆ ಕಳೆದ ಎರಡೂ ಪಂದ್ಯಗಳಲ್ಲಿ ಸತತಸೋಲು ಕಂಡಿರುವ ಚೆನ್ನೈ ಸೂಪರ್ ಕಿಂಗ್ಸ್ ಮೇಲೆ ಈಗ ಸ್ವಲ್ಪ ಒತ್ತಡವಿದೆ. ಅಂಕಪಟ್ಟಿಯಲ್ಲಿ ಉತ್ತಮ ಸ್ಥಿತಿ ಹೊಂದಿದ್ದರೂ ಸಹ ನಿರಂತರ ಎರಡು ಆಘಾತಗಳು ಚೆನ್ನೈ ತಂಡವನ್ನು ಚಿಂತೆಗೀಡುಮಾಡಿದೆ.
ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ತಂಡಗಳು ಸೋಮವಾರ, ಚೆಪಾಕ್ ನಲ್ಲಿರುವ ಎಂ.ಎ ಚಿದಂಬರಂ ಕ್ರೀಡಾಂಗಣದಲ್ಲಿ ನಡೆಯಲಿರುವ 8ನೇ ಆವೃತ್ತಿಯ ಐಪಿಎಲ್ ಟಿ-20 ಟೂರ್ನಿಯ ಪಂದ್ಯದಲ್ಲಿ ಪರಸ್ಪರ ಮುಖಾಮುಖಿಯಾಗುತ್ತಿದ್ದು, ಗೆಲುವು ದಾಖಲಿಸುವ ವಿಶ್ವಾಸದೊಂದಿಗೆ ಕಣಕ್ಕಿಳಿಯಲು ಸಜ್ಜುಗೊಂಡಿವೆ.
ಈಗಾಗಲೇ ಬೆಂಗಳೂರು ಪಡೆ ತನ್ನ ನೆಲದಲ್ಲಿ ನಡೆದಿದ್ದ ಮೊದಲ ಸುತ್ತಿನ ಸಮರದಲ್ಲಿ ಚೆನ್ನೈ ಎದುರು ಗೆಲುವಿನ ಹಾದಿಯಲ್ಲಿ ಮುಗ್ಗರಿಸಿ ನಿರಾಸೆ ಅನುಭವಿಸಿತ್ತು. ಈಗ ಚೆನ್ನೈ ನೆಲದಲ್ಲಿ ಸೂಪರ್ ಕಿಂಗ್ಸ್ ತಂಡವನ್ನು ಸೋಲಿಸಿ ಸೇಡು ತೀರಿಸಿಕೊಳ್ಳಲು ನಾಯಕ ವಿರಾಟ್ ಕೊಹ್ಲಿ ಹೊಂಚು ಹಾಕಿದ್ದಾರೆ.
ಈ ಋತುವಿನ ಆರಂಭದ ಪಂದ್ಯದಲ್ಲೇ ಗೆದ್ದು, ತಮ್ಮ ಅಭಿಯಾನವನ್ನು ಭರ್ಜರಿಯಾಗಿ ಆರಂಭಿಸಿದ್ದ ಆರ್ ಸಿ ಬಿ ಆಟಗಾರರು ನಂತರದ ಕೆಲ ಪಂದ್ಯಗಳಲ್ಲಿ ಮುಗ್ಗರಿಸಿ ಪ್ಲೇ-ಆಫ್ ಸುತ್ತಿನ ಹಾದಿಯ ಬಗ್ಗೆ ಸ್ವಲ್ಪ ಚಿಂತೆಗೊಳಗಾಗಿದ್ದರು. ಆದರೆ, ಕಳೆದ ಮೂರು ಪಂದ್ಯಗಳಲ್ಲಿನ ಪ್ರದರ್ಶನ ಮತ್ತೆ ಆರ್ ಸಿಬಿ ತಂಡವನ್ನು ಮುಂದಿನ ಸುತ್ತಿನತ್ತ ಮುಖ ಮಾಡಿ ನಿಲ್ಲಿಸಿದೆ.
ಇನ್ನೊಂದೆಡೆ ಮಹೇಂದ್ರ ಸಿಂಗ್ ಧೋನಿ ನೇತೃತ್ವದ ಚೆನ್ನೈ ಸೂಪರ್ ಕಿಂಗ್ಸ್ ಕಳೆದೆರಡು, ಪಂದ್ಯಗಳಲ್ಲಿನ ಸೋಲುಗಳಿಂದ ಗಾಯಗೊಂಡ ಹುಲಿಯಂತಾಗಿದ್ದು, ಯಾವುದೇ ಕಾರಣಕ್ಕೂ ಆರ್ ಸಿಬಿ ಆಟಗಾರರಿಗೆ ಗೆಲುವು ಬಿಟ್ಟುಕೊಡಲು ನಿರ್ಧರಿಸಿದೆ.
