ನವದೆಹಲಿ: ಹಾಲೆಂಡ್ ಮೂಲಕ ತರಬೇತುದಾರ ರೋಜರ್ ವ್ಯಾನ್ ಜೆಂಟ್ ಅವರನ್ನು ಭಾರತೀಯ ಪುರುಷರ ತಂಡದ ಕೌಶಲ್ಯಾಭಿವೃದ್ಧಿ ತರಬೇತುದಾರರ ಸ್ಥಾನಕ್ಕೆ ನೇಮಿಸಿ, ಹಾಕಿ ಇಂಡಿಯಾ ಪ್ರಕಟಣೆ ಹೊರಡಿಸಿದೆ. 2000ರಲ್ಲಿ ಅಂತಾರಾಷ್ಟ್ರೀಯ ಹಾಕಿ ಸಂಸ್ಥೆ (ಎಫ್ಐಎಚ್) ವತಿಯಿಂದ ಗರಿಷ್ಠ ಪ್ರದರ್ಶನ ತರಬೇತುದಾರರಾಗಿ ಬಡ್ತಿ ಪಡೆದಿರುವ ರೋಜರ್, ಹಲವಾರು ತಂಡಗಳಿಗೆ ಕೋಚ್ ಆಗಿ ದುಡಿದ ಅನುಭವ ಹೊಂದಿದ್ದಾರೆಂದು ಹಾಕಿ ಇಂಡಿಯಾ ಹೇಳಿದೆ. 'ರೋಜರ್ ಅವರ ಟ್ರ್ಯಾಕ್ ರೆಕಾರ್ಡ್ ಉತ್ತಮವಾಗಿದ್ದು, ಅವರ ಸಾಧನೆಯನ್ನು ಬಿಂಬಿಸುತ್ತದೆ. ಹಾಗಾಗಿ, ಅವರನ್ನು ಹಾಕಿ ತಂಡದ ಸಹಾಯಕ ಸಿಬ್ಬಂದಿ ವಿಭಾಗದಲ್ಲಿ ಸೇರಿಸಲಾಗಿದೆ'' ಎಂದು ಹಾಕಿ ಇಂಡಿಯಾ ಹೇಳಿದೆ.
