ಸೋಲಿಲ್ಲದ ಸರದಾರ ವಿಜೇಂದರ್‌ಗೆ ಮುಂದಿನ ಎದುರಾಳಿ ಚೀನಾದ ಜುಲ್ಪಿಕರ್

ನವದೆಹಲಿ: ಭಾರತದ ಸ್ಟಾರ್ ಬಾಕ್ಸರ್, ಡಬ್ಲ್ಯುಬಿಒ ಏಷ್ಯಾ ಪೆಸಿಫಿಕ್ ಚಾಂಪಿಯನ್ ವಿಜೇಂದರ್ ಸಿಂಗ್ ತಮ್ಮ ಮುಂದಿನ ವೃತ್ತಿಪರ ಬಾಕ್ಸಿಂಗ್ ಸೆಣಸಾಟದಲ್ಲಿ ಚೀನಾದ ಅಗ್ರ ಬಾಕ್ಸರ್ ಜುಲ್ಪಿಕರ್ ಮೈಮಯ್ತ್ ಅಲಿಯನ್ನು ಎದುರಿಸಲಿದ್ದಾರೆ. 

ವಿಜೇಂದರ್ ಸಿಂಗ್-ಜುಲ್ಪಿಕರ್ ನಡುವಿನ ಪಂದ್ಯ ಏಪ್ರಿಲ್ 1 ರಂದು ಮುಂಬೈನಲ್ಲಿ ನಡೆಯಲಿದೆ.

ಡಬ್ಲ್ಯೂಬಿಒ ಓರಿಯೆಂಟಲ್ ಸೂಪರ್ ಮಿಡಲ್ ವೇಟ್ ಚಾಂಪಿಯನ್ ಜುಲ್ಪಿಕರ್ ವಿರುದ್ಧ ಗೆದ್ದರೆ ವಿಜೇಂದರ್ ಗೆ ವೃತ್ತಿಜೀವನದ 2ನೇ ಬೆಲ್ಟ್ ಒಲಿಸಿಕೊಳ್ಳುವ ಅವಕಾಶವಿದೆ. ವಿಜೇಂದರ್ ಸದ್ಯ ಆಡಿರುವ 8 ಪಂದ್ಯಗಳಲ್ಲೂ ಅಜೇಯರಾಗಿದ್ದಾರೆ. ಇದೀಗ 9ನೇ ವೃತ್ತಿಪರ ಹೋರಾಟದಲ್ಲಿ ವಿಜೇಂದರ್ ತಮ್ಮ ಬೆಲ್ಟ್ ಕೂಡ ಪಣಕ್ಕಿಡಲಿದ್ದಾರೆ. 

ಚೀನಾದ ನಂಬರ್ 1 ಬಾಕ್ಸರ್ ಆಗಿರುವ 22 ವರ್ಷದ ಜುಲ್ಪಿಕರ್ ವೃತ್ತಿಪರ ಬಾಕ್ಸಿಂಗ್ ನಲ್ಲಿ ವಿಜೇಂದರ್ ಅಷ್ಟೇ ಅನುಭವಿಯಾಗಿದ್ದಾರೆ. 2015ರಲ್ಲೇ ವೃತ್ತಿಪರ ಬಾಕ್ಸಿಂಗ್ ಪ್ರವೇಶಿಸಿದ್ದ ಜುಲ್ಪಿಕರ್ 8 ಪಂದ್ಯಗಳನ್ನು ಆಡಿದ್ದು 5 ನಾಕೌಟ್ ಸೇರಿ 7 ಪಂದ್ಯದಲ್ಲಿ ಗೆದ್ದಿದ್ದಾರೆ. ಇದರಲ್ಲಿ 1 ಪಂದ್ಯ ಡ್ರಾ ಫಲಿತಾಂಶ ಕಂಡಿದೆ. ಕಳೆದ ವರ್ಷ ಅನುಭವಿ ಬಾಕ್ಸರ್ ಥಾಮಸ್ ಮಶಾಲಿಯನ್ನು ಮಣಿಸಿ ವೃತ್ತಿಜೀವನದ ಚೊಚ್ಚಲ ಬೆಲ್ಟ್ ಅನ್ನು ಜುಲ್ಪಿಕರ್ ಜಯಿಸಿದ್ದರು.