ವಿಂಬಲ್ಡನ್ 2018: ವಿಶ್ವದ ನಂಬರ್ 1 ಆಟಗಾರ ನಡಾಲ್ ಮಣಿಸಿದ ಜಾಕೋವಿಕ್

ಲಂಡನ್: ಲಂಡನ್ ನಲ್ಲಿ ನಡೆಯುತ್ತಿರುವ ವಿಂಬಲ್ಡನ್ 2018ರ ಟೂರ್ನಿಯ ಪುರುಷರ ಸಿಂಗಲ್ಸ್ ವಿಭಾಗದ ಸೆಮಿ ಫೈನಲ್ ಪಂದ್ಯದಲ್ಲಿ ವಿಶ್ವದ ನಂಬರ್ ಒನ್ ಆಟಗಾರ ರಾಫೆಲ್ ನಡಾಲ್ ರನ್ನು ನುವಾಕ್ ಜಾಕೋವಿಕ್ ಮಣಿಸಿ ಫೈನಲ್ ಗೇರಿದ್ದಾರೆ.

ಶನಿವಾರ ನಡೆದ ಸೆಮಿ ಫೈನಲ್ ಪಂದ್ಯದಲ್ಲಿ ಜಾಕೋವಿಕ್ 6-4, 3-6, 7-6 (11-9), 3-6, 10-8 ಅಂತರದಲ್ಲಿ ನಡಾಲ್ ರನ್ನು ಮಣಿಸಿ ಫೈನಲ್ ಗೇರಿದ್ದಾರೆ.

ಜಾಕೋವಿಕ್ ಮತ್ತು ನಡಾಲ್ ನಡುವಿನ 2ನೇ ಸೆಮಿಫೈನಲ್ ಪಂದ್ಯ ಟೂರ್ನಿಯ 2ನೇ ಸುಧೀರ್ಘ ಪಂದ್ಯವಾಗಿತ್ತು. ಈ ಹಿಂದೆ ಕೆವಿನ್ ಆ್ಯಂಡರ್ಸನ್ ಮತ್ತು ಜಾನ್ ಇಸ್ನರ್ ನಡುವೆ ನಡೆದ ಪುರುಷರ ಮೊದಲ ಸೆಮಿಫೈನಲ್ಸ್ ಪಂದ್ಯ ಸುಮಾರು ಆರೂವರೆ ಗಂಟೆಗಳ ಕಾಲ ನಡೆದಿತ್ತು. ಅಂತೆಯೇ 2ನೇ ಸೆಮಿ ಫೈನಲ್ ಪಂದ್ಯ ಕೂಡ ಬರೊಬ್ಬರಿ 5 ಗಂಟೆ 17 ನಿಮಿಷ ನಡೆದು ದಾಖಲೆ ಬರೆದಿದೆ. 

ಫೈನಲ್ ನಲ್ಲಿ ಜಾಕೋವಿಕ್ ದಕ್ಷಿಣ ಆಫ್ರಿಕಾದ ಕೆವಿನ್ ಆ್ಯಂಡರ್ಸನ್ ರನ್ನು ಎದುರಿಸಲಿದ್ದಾರೆ.