ನ್ಯೂಜೆರ್ಸಿ: ಇದೇ ಭಾನುವಾರ ನಡೆಯಲಿರುವ ಅರ್ಜೆಂಟೀನಾ ಮತ್ತು ಸ್ಪೇನ್ ನಡುವಿನ ಪ್ರತಿಷ್ಠಿತ ಫಿಫಾ ವಿಶ್ವಕಪ್ ಫೈನಲ್ ಟೂರ್ನಿಯಲ್ಲಿ ಗೆದ್ದ ತಂಡದ ಆಟಗಾರರಿಗೆ ಇದೇ ಮೊದಲ ಬಾರಿಗೆ 'ಚಾಂಪಿಯನ್ ಶಿಪ್' ಉಂಗುರದ ಬಹುಮಾನ ಸಿಗಲಿದೆ ಎಂದು ಫಿಫಾ ಹೇಳಿದೆ.
ನ್ಯೂಜೆರ್ಸಿ ಮೆಟ್ ಲೈಫ್ ಸ್ಟೇಡಿಯಂನಲ್ಲಿ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಭಾಗವಹಿಸಲಿದ್ದು, ಅವರೇ ವಿಜೇತ ತಂಡದ ಆಟಗಾರರಿಗೆ ಚಾಂಪಿಯನ್ ಶಿಪ್ ಉಂಗುರ ನೀಡುವ ಸಾಧ್ಯತೆಯಿದೆ.
ಅಮೆರಿಕದ ಪ್ರಮುಖ ಕ್ರೀಡಾ ಲೀಗ್ ಗಳಲ್ಲಿ ಗೆಲುವು ಸಾಧಿಸಿದ ತಂಡದ ಆಟಗಾರರು ಹಾಗೂ ತರಬೇತುದಾರರಿಗೆ ಚಾಂಪಿಯನ್ ಶಿಪ್ ಉಂಗುರಗಳನ್ನು ನೀಡಲಾಗುತ್ತದೆ.
ಇದೀಗ ಇದೇ ಮೊದಲ ಬಾರಿಗೆ ಫುಟ್ ಬಾಲ್ ವಿಶ್ವಕಪ್ ನಲ್ಲೂ ಈ ಉಂಗುರಗಳನ್ನು ನೀಡಲಾಗುತ್ತಿದೆ. ಈ ಉಂಗುರಗಳ ವಿನ್ಯಾಸದಲ್ಲೂ ಪುಟ್ಟ ವಿಶ್ವಕಪ್ ಟ್ರೋಫಿ ಮತ್ತು ವಿಶೇಷ ಕೆತ್ತನೆ ಇರಲಿದೆ.
ವಿಶ್ವಕಪ್ ಗೆದ್ದ ವಿಜೇತ ತಂಡಕ್ಕೆ ಚಿನ್ನದಿಂದ ತಯಾರಿಸಿರುವ ವಜ್ರ ಹಾಗೂ ನೀಲಮಣಿ ಕಲ್ಲುಗಳನ್ನು ಅಳವಡಿಸಿದ 30 ಉಂಗುರಗಳನ್ನು ನೀಡಲಾಗುವುದು ಎಂದು ಫಿಫಾ ತಿಳಿಸಿದೆ.
ಜುಲೈ 19ರ ಭಾನುವಾರ ಮಧ್ಯರಾತ್ರಿ 12-30ಕ್ಕೆ ಅರ್ಜೆಂಟೀನಾ ಮತ್ತು ಸ್ಫೇನ್ ನಡುವಣ ಪ್ರತಿಷ್ಠಿತ ಫಿಫಾ ವಿಶ್ವಕಪ್ ಫೈನಲ್ ಪಂದ್ಯ ನಡೆಯಲಿದ್ದು, ವಿಶ್ವದಾದ್ಯಂತ ಅಭಿಮಾನಿಗಳು ತೀವ್ರ ಕಾತರಿಂದ ಕಾಯುತ್ತಿದ್ದಾರೆ.
