ಮದುರೈ ಕಸದ ಡಬ್ಬಿಯಲ್ಲಿ ೧೧ ನಾಡ ಬಾಂಬ್ ಪತ್ತೆ

ಮದುರೈ: ತಮಿಳುನಾಡಿನ, ಮದುರೈನ ಅಣ್ಣಾ ನಗರ್ ಪೂರ್ವ ಮುಖ್ಯ ರಸ್ತೆಯ ಒಂದು ಕಸದ ಡಬ್ಬದಲ್ಲಿ ಸುಮಾರು ೧೧ ನಾಡ ಬಾಂಬುಗಳನ್ನು ಸೋಮವಾರ ಸಂಜೆ ಪತ್ತೆ ಹಚ್ಚಿ ವಶಪಡಿಸಿಕೊಳ್ಳಲಾಗಿದೆ.

ಸುಮಾರು ೪ ಘಂಟೆಗೆ ಕಸದ ಗುಂಡಿಗೆ ಕಸ ಎಸೆಯಲು ಬಂದ ಓರ್ವ ಮಹಿಳೆ ಅಲ್ಲಿ ಕೆಂಪು ಬಣ್ಣದ ಒಂದು ಚೀಲವನ್ನು ಕಂಡು ತೆರೆದು ನೋಡಿದಾಗ ಅದರಲ್ಲಿ ಬಾಂಬ್ ಗಳು ಪತ್ತೆಯಾಗಿವೆ.

ಮದುರೈ ನಗರ ಪೊಲೀಸರಿಗೆ ವಿಷಯ ತಿಳಿದು ಸ್ಥಳಕ್ಕೆ ಧಾವಿಸಿ ಬಾಂಬ್ ಗಳನ್ನು ವಶಪಡಿಸಿಕೊಂಡಿದ್ದಾರೆ.

ಅಂಡಾಕಾರ ಮತ್ತು ಉರುಳೆಯಾಕಾರದಲ್ಲಿದ್ದ ಬಾಂಬುಗಳ ಸುತ್ತ ದಾರದಿಂದ ಬಿಗಿಯಾಗಿ ಸುತ್ತಲ್ಪಟ್ಟಿತ್ತು ಎಂದು ತಿಳಿದು ಬಂದಿದೆ.

ಉಪ ಪೋಲೀಸ್ ಸಮಂತ್ ರೋಹನ್ ನೇತೃತ್ವದಲ್ಲಿ ಪೋಲೀಸ್ ತಂಡ ಸ್ಥಳ ಪರೀಕ್ಷೆ ನಡೆಸಿದ್ದು, ವಿಚಾರಣೆ ನಡೆಸುತ್ತಿದ್ದಾರೆ.

ಆ ಡಬ್ಬಿಗೆ ಬಾಂಬುಗಳನ್ನು ಎಸೆದವರು ಯಾರೆಂದೂ ಇನ್ನೂ ತಿಳಿದುಬಂದಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.