ನವದೆಹಲಿ: ದೇಶದ್ರೋಹ ಆರೋಪದ ಮೇಲೆ ದೆಹಲಿ ಪೊಲೀಸರು ಬಂಧಿಸಿರುವ ಜೆ ಎನ್ ಯು ವಿದ್ಯಾರ್ಥಿ ಸಂಘಟನೆಯ ಅಧ್ಯಕ್ಷ ಕನ್ಹಯ ಕುಮಾರ್ ಅವರ ಮೇಲೆ ವಕೀಲರು ಪಟಿಯಾಲ ಹೌಸ್ ಕೋರ್ಟ್ ಆವರಣದಲ್ಲಿ ನಡೆಸಿದ ಹಲ್ಲೆಯಿಂದ ಅವರ ಮೈಮೇಲೆ ಹಲವು ಗಾಯದ ಗುರುತುಗಳಿವೆ ಎಂದು ಶುಕ್ರವಾರ ಬಿಡುಗಡೆಯಾದ ವೈದ್ಯಕೀಯ ವರದಿ ತಿಳಿಸಿದೆ.
ಕನ್ಹಯ್ಯ ಕುಮಾರ್ ಅವರ ಮೇಲೆ ಯಾವುದೇ ಹಲ್ಲೆಯಾಗಲಿಲ್ಲ ಎಂಬ ದೆಹಲಿ ಪೊಲೀಸರ ವಾದವನ್ನು ಈ ವರದಿ ಅಲ್ಲಗೆಳೆದಿದೆ.
"ಕುಮಾರ್ ಅವರ ಮೂಗು ಮತ್ತು ತೊಡೆಯ ಮೇಲೆ ಥಳಿತದ ಗುರುತುಗಳಿವೆ. ಅದೂ ಅಲ್ಲದೆ ಬರೆಗಳಂತಹ ಬೇರೆ ಗಾಯದ ಗುರುತುಗಳಿವೆ" ಎಂದು ರಾಮ್ ಮನೋಹರ್ ಲೋಹಿಯಾ ಆಸ್ಪತ್ರೆ ಬಿಡುಗಡೆ ಮಾಡಿರುವ ವರದಿ ತಿಳಿಸಿದೆ.
ಪಟಿಯಾಲ ಹೌಸ್ ಕೋರ್ಟ್ ಗೆ ಕನ್ಹಯ್ಯ ಕುಮಾರ್ ಅವರನ್ನು ಹಾಜರು ಪಡಿಸಿದಾಗ ವಕೀಲರ ಒಂದು ವರ್ಗ ಅವರ ಮೇಲೆ ಹಲ್ಲೆ ಮಾಡಿತ್ತು. ಆದರೆ ದೆಹಲಿ ಪೊಲೀಸ್ ಕಮಿಷನರ್ ಬಿ ಎಸ್ ಬಸ್ಸಿ ಈ ಹಲ್ಲೆ ಸುಳ್ಳು ಸೃಷ್ಟಿ ಎಂದಿದ್ದರು.
