ಗೋರಕ್ ಪುರ: ಪತ್ನಿಯ ಕೊಲೆ ಆರೋಪಿ ಶಾಸಕನ ಜೊತೆ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಕಾರ್ಯಕ್ರಮವೊಂದರಲ್ಲಿ ವೇದಿಕೆ ಹಂಚಿಕೊಂಡ ವಿಷಯಕ್ಕೆ ಸಂಬಂಧಿಸಿದಂತೆ ವ್ಯಾಪಕ ಟೀಕೆ ವ್ಯಕ್ತವಾಗಿದೆ.
ಯೋಗಿ ಆದಿತ್ಯನಾಥ್ ತಮ್ಮ ಸ್ವಕ್ಷೇತ್ರವಾದ ಗೋರಖ್‌ಪುರ್‌ಗೆ ಭೇಟಿ ಕೊಟ್ಟಿದ್ದು, ಅನೇಕ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು. ಈ ವೇಳೆ ಕಾರ್ಯಕ್ರಮವೊಂದರಲ್ಲಿ ನಾತನ್ವಾ ಕ್ಷೇತ್ರದ ಪಕ್ಷೇತರ ಶಾಸಕ, ಪತ್ನಿ ಕೊಲೆಯ ಆರೋಪಿ ಅಮನ್ಮನಿ ತ್ರಿಪಾಠಿ ಸಿಎಂ ಯೋಗಿ ಇದ್ದ ವೇದಿಕೆಯ ಮೇಲೆ ಕಾಣಿಸಿಕೊಂಡಿದ್ದಾರೆ.
ಸಿಎಂ ಯೋಗಿ ಕುಳಿತ ಕೆಲ ಚೇರ್‌‌ಗಳ ಅಂತರದಲ್ಲಿ ಆರೋಪಿ ಶಾಸಕ ಕುಳಿತಿದ್ದರು. ಜೊತೆಗೆ ವೇದಿಕೆಯಲ್ಲಿ ಸಿಎಂ ಯೋಗಿ ಕಾಲು ಸ್ಪರ್ಶಿಸಿ ಆಶೀರ್ವಾದ ಪಡೆದಿದ್ದಾರೆ. ಇದು ಸ್ವತಃ ಬಿಜೆಪಿ ಕಾರ್ಯಕರ್ತರಲ್ಲೇ ಅಚ್ಚರಿಗೆ ಕಾರಣವಾಗಿದೆ.
ಶಾಸಕ ತ್ರಿಪಾಠಿ ಪತ್ನಿ ಸಾರಾ ಕೊಲೆ ಪ್ರಕರಣದ ಆರೋಪಿಯಾಗಿದ್ದಾನೆ. ಅಲ್ಲದೇ ತ್ರಿಪಾಠಿ ತಂದೆ ಕೂಡ ಇದೇ ನಾತನ್ವಾ ಕ್ಷೇತ್ರದಿಂದ ಈ ಹಿಂದೆ ನಾಲ್ಕು ಬಾರಿ ಶಾಸಕರಾಗಿ ಆಯ್ಕೆಯಾಗಿದ್ದರು.
