ಉತ್ತರಪ್ರದೇಶದಲ್ಲಿ ಬಿಜೆಪಿ ಮುಂಚೂಣಿಯಲ್ಲಿದೆ; ಡಾ. ಸಿಂಗ್ ಅವರನ್ನು ಮೋದಿ ಪ್ರಶಂಸಿಸಿದ್ದು: ರಾಜನಾಥ್

ಲಖನೌ: ಶನಿವಾರ ಮೊದಲಸುತ್ತಿನ ಮತದಾನಕ್ಕೆ ಅಣಿಯಾಗಿರುವ ಉತ್ತರ ಪ್ರದೇಶ ಚುನಾವಣೆಯಲ್ಲಿ ಬಿಜೆಪಿ ಸ್ಪಷ್ಟವಾಗಿ ಮುಂಚೂಣಿಯಲ್ಲಿದೆ ಎಂದು ಕೇಂದ್ರ ಗೃಹ ಸಚಿವ ರಾಜನಾಥ್ ಸಿಂಗ್ ಶುಕ್ರವಾರ ಹೇಳಿದ್ದಾರೆ. 

ಮಾಧ್ಯಮಗಳೊಂದಿಗೆ ಮಾತನಾಡಿದ ರಾಜನಾಥ್, ಸಮಾಜವಾದಿ ಪಕ್ಷ ಮತ್ತು ಬಹುಜನ ಸಮಾಜವಾದಿ ಪಕ್ಷ ಮುನ್ನಡೆಸಿದ್ದ ಸರ್ಕಾರಗಳ ಬಗ್ಗೆ ಜನ ಬೇಸತ್ತಿದ್ದು, ಭಾರತೀಯ ಜನತಾ ಪಕ್ಷಕ್ಕೆ ಜನ ಸ್ಪಷ್ಟ ಬಹುಮತ ನೀಡಲಿದ್ದಾರೆ ಎಂದು ಅವರು ಹೇಳಿದ್ದಾರೆ. 

ಬಿಜೆಪಿಯನ್ನು ಸೋಲಿಸುವುದು ಬಿಟ್ಟರೆ ಸಮಾಜವಾದಿ ಪಕ್ಷ ಮತ್ತು ಕಾಂಗ್ರೆಸ್ ಮೈತ್ರಿಗೆ ರಾಜ್ಯಕ್ಕೆ ಕೊಡುಗೆ ನೀಡುವ ಬೇರೆ ಯಾವುದೇ ಅಜೇಂಡಾ ಇಲ್ಲ ಎಂದು ಕೂಡ ಅವರು ಹೇಳಿದ್ದಾರೆ. 

ಇದೆ ಸಮಯದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ 'ರೈನ್ ಕೋಟ್' ಹೇಳಿಕೆಯ ಬಗ್ಗೆ ಪ್ರತಿಕ್ರಿಯಿಸಿದ್ದು, ಇದು ಪ್ರಧಾನಿ ಮನಮೋಹನ್ ಸಿಂಗ್ ಅವರನ್ನು ಪ್ರಶಂಸಿಸಿದ್ದು ಎಂದು ತಿರುವು ನೀಡಿದ್ದಾರೆ. "ಇಷ್ಟೆಲ್ಲಾ ಹಗರಣಗಳ ಹೊರತಾಗಿಯೂ, ಡಾ. ಸಿಂಗ್ ಅವರು ದೋಷಮುಕ್ತರಾಗಿದ್ದರು ಎಂದು ಪ್ರಧಾನಿ ಅವರನ್ನು ಹೊಗಳಿದರು" ಎಂದು ರಾಜನಾಥ್ ಹೇಳಿದ್ದಾರೆ. 

"ಪ್ರಧಾನಿ ಮೋದಿ ಯಾರನ್ನು ಅವಮಾನಿಸಿಲ್ಲ. ನಾವೆಲ್ಲರೂ ಡಾ. ಮನಮೋಹನ್ ಸಿಂಗ್ ಅವರನ್ನು ಗೌರವಿಸುತ್ತೇವೆ" ಎಂದು ಕೂಡ ರಾಜನಾಥ್ ಹೇಳಿದ್ದಾರೆ.