ಮೈಸೂರಿಗೆ ಸಿಗದ ಗಿನ್ನಿಸ್ ಯೋಗ

ಮೈಸೂರು: ಜೂನ್ ೨೧ ರ ಅಂತಾರಾಷ್ಟ್ರೀಯ ಯೋಗ ದಿನದಂದು ಒಂದೇ ಸ್ಥಳದಲ್ಲಿ ಅತಿ ಹೆಚ್ಚು ಜನ ಯೋಗಾಭ್ಯಾಸ ಮಾಡಿ ಗಿನ್ನಿಸ್ ದಾಖಲೆ ಮಾಡಲು ಸಜ್ಜಾಗಿದ್ದ ಮೈಸೂರಿಗೆ, ಅಹಮದಾಬಾದ್ ನಗರ ಕೂದಲೆಳೆ ಅಂತರದಿಂದ ಸೋಲಿಸಿ ಗಿನ್ನಿಸ್ ಗರಿಯನ್ನು ತನ್ನ ಮುಡಿಗೆ ಏರಿಸಿಕೊಂಡಿದೆ. ಅಧಿಕಾರಿಗಳ ಪ್ರಕಾರ ಅಹಮದಾಬಾದ್ ನಲ್ಲಿ ೫೪,೫೨೨ ಜನ ಒಂದೇ ಸ್ಥಳದಲ್ಲಿ ಯೋಗಾಭ್ಯಾಸ ಮಾಡಿದ್ದರೆ, ಮೈಸೂರಿನಲ್ಲಿ ೫೪,೧೦೧ ಜನ ನೆರೆದಿದ್ದರು ಎಂದು ತಿಳಿದುಬಂದಿದೆ. 

ಮೈಸೂರು ಜಿಲ್ಲಾಧಿಕಾರಿ ರಣದೀಪ್ ತಿಳಿಸಿರುವಂತೆ "ನಾವಿನ್ನು ಗಿನ್ನಿಸ್ ತಂಡಕ್ಕೆ ದಾಖಲೆಗಳನ್ನು ನೀಡಬೇಕಿದೆ. ೫೪,೧೦೧ ಜನಕ್ಕೆ ಟಿಕೆಟ್ ಗಳನ್ನು ನೀಡಲಾಗಿತ್ತು. ಆದರೆ ಅಂದು ಮೈದಾನದಲ್ಲಿ ಇವರನ್ನು ಹೊರತು ಪಡಿಸಿ ಹಲವು ಯೋಗಾಭ್ಯಾಸಿಗಳು, ಸ್ವಯಂಸೇವಕರು ಯೋಗ ಮಾಡಿದ್ದಾರೆ. ಅವರಿಗೆ ಟಿಕೆಟ್ ಗಳನ್ನು ನೀಡಿರಲಿಲ್ಲ. ಡ್ರೋನ್ ಕ್ಯಾಮರಾದಲ್ಲಿ ಸೆರೆ ಹಿಡಿರುವಂತೆ ವಿವರಗಳನ್ನು ಕಲೆ ಹಾಕಲು ಹೆಚ್ಚುವರಿ ನಾಲ್ಕು ದಿನಗಳು ಬೇಕಾಗಿದೆ. ಈ ಘೋಷಣೆ ಮಾಡುವುದಕ್ಕಿಂತಲೂ ಮೊದಲು ಗಿನ್ನಿಸ್ ತಂಡ ಇನ್ನಷ್ಟು ದಿನ ಕಾಯಬೇಕಿತ್ತು" ಎಂದಿದ್ದಾರೆ. 

"ಮುಂದಿನ ವಾರ ನಮ್ಮ ಸಮಾಲೋಚಕರು ಅಂತಿಮ ದಾಖಲೆಗಳನ್ನು ಸಲ್ಲಿಸಲಿದ್ದಾರೆ. ಅವರು ಮರುಪರಿಶೀಲನೆ ಮಾಡುವ ಭರವಸೆ ಇದೆ. ಸದ್ಯಕ್ಕೆ ೪೨೧ ಅಭ್ಯರ್ಥಿಗಳ ವ್ಯತ್ಯಾಸ ಇದೆ" ಎಂದು ಕೂಡ ಅವರು ಹೇಳಿದ್ದಾರೆ. 

ಅರಮನೆ ಆವರಣದಲ್ಲಿ ಜೂನ್ ೧೯ ರಂದು ಯೋಗ ಅರಿವಿಗಾಗಿ ೮,೩೮೧ ವಿದ್ಯಾರ್ಥಿಗಳು ನಡೆಸಿದ ಮಾನವ ಸರಪಳಿ ಗಿನ್ನಿಸ್ ದಾಖಲೆ ಸೇರುವ ಭರವಸೆ ವ್ಯಕ್ತಪಡಿಸಿದ್ದಾರೆ.