2,400 ಶಿಶುಗಳ ಮೆದುಳು ಹಾನಿ ಬ್ರೆಜಿಲ್‍ನಲ್ಲಿ ತುರ್ತು ಪರಿಸ್ಥಿತಿ

ಬ್ರೆಸಿಲಿಯಾ: ಸೊಳ್ಳೆಯಿಂದ ಬರುವ ರೋಗವೊಂದು ಬ್ರೆಜಿಲ್ ಅನ್ನು ಬೆಚ್ಚಿಬೀಳಿಸಿದೆ. ಝಿಕಾ ಎನ್ನುವ ವೈರಸ್‍ನಿಂದಾಗಿ ಇಲ್ಲಿ ಹುಟ್ಟುವ ಮಕ್ಕಳ ಮೆದುಳುಗಳು ಹಾನಿಗೊಳಗಾಗುತ್ತಿರುವ ಪ್ರಕರಣಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಿದ್ದು, ಬ್ರೆಜಿಲ್‍ನಲ್ಲಿ ತುರ್ತು ಪರಿಸ್ಥಿತಿ ಘೋಷಿಸಲಾಗಿದೆ. 

ಝಿಕಾ ಎನ್ನುವ ವೈರಸ್ 70 ವರ್ಷಗಳ ಹಿಂದೆ ಆಫ್ರಿಕಾದ ಕಾಡುಕೋತಿಗಳ ದೇಹದಲ್ಲಿ ಮೊದಲು ಪತ್ತೆಯಾಗಿತ್ತು. ಇದು ಮನುಷ್ಯನ ದೇಹಕ್ಕೆ ಸೇರಿದರೆ, ಗಂಭೀರ ನರಸಂಬಂಧಿ ಸಮಸ್ಯೆಗಳು ಕಾಣಿಸಿಕೊಂಡು, ವ್ಯಕ್ತಿ ಸಾವನ್ನಪ್ಪುವ ಸಾಧ್ಯತೆಯೂ ಇದೆ. 

ಈಗ ಬ್ರೆಜಿಲ್‍ನಲ್ಲಿ ಹುಟ್ಟುವ ಶಿಶುಗಳ ಮೆದುಳುಗಳು ಮುರುಟಿದ್ದು, ಇದಕ್ಕೆ ಇದೇ ವೈರಸ್ ಕಾರಣ ಎಂದು ಆರೋಗ್ಯ ಸಚಿ ವಾಲಯ ಹೇಳಿದೆ. ಇಬ್ಬರು ಅಮ್ಮಂದಿರ ದೇಹದಲ್ಲೂ ಈ ವೈರಸ್ ಪತ್ತೆಯಾಗಿದೆ. 

ಪ್ರಸಕ್ತ ವರ್ಷ 2,400 ಮೈಕ್ರೋಸೆಫಲಿ (ಮುರುಟಿದ ಮೆದುಳು) ಪ್ರಕರಣಗಳು ಪತ್ತೆಯಾಗಿದ್ದು, 29 ಶಿಶುಗಳು ಸಾವನ್ನಪ್ಪಿವೆ. ಕಳೆದ ವರ್ಷ ಬ್ರೆಜಿಲ್‍ನಲ್ಲಿ ಇಂತಹ 147 ಪ್ರಕರಣಗಳು ಪತ್ತೆಯಾಗಿವೆ. ದೇಶದಲ್ಲಿ ಈ ವೈರಸ್‍ನ ಭೀತಿಯಿಂದಾಗಿ ಎಷ್ಟೋ ಮಹಿಳೆಯರು ಗರ್ಭಿಣಿಯಾಗುವುದಕ್ಕೇ ಹೆದರುತ್ತಿದ್ದಾರೆ ಎಂದು ಶಿಶುತಜ್ಞೆ ಏಂಜೆಲಾ ರೋಚಾ ತಿಳಿಸಿದ್ದಾರೆ.