ಭಾರತದ ನೆರೆಯ ದೇಶಗಳಲ್ಲೇ ಭಯೋತ್ಪಾದನೆಗೆ ಉತ್ತೇಜನ: ಮೋದಿ

ನವದೆಹಲಿ: ಅಮೆರಿಕ ಕಾಂಗ್ರೆಸ್ (ಸಂಸತ್) ನ ಜಂಟಿ ಸದನವನ್ನುದ್ದೇಶಿಸಿ ಮಾತನಾಡಿರುವ ಪ್ರಧಾನಿ ನರೇಂದ್ರ ಮೋದಿ , ಪಾಕಿಸ್ತಾನದ ಭಯೋತ್ಪಾದನೆ ಬಗ್ಗೆ ಪ್ರಸ್ತಾಪಿಸಿದ್ದು, ಭಾರತದ ನೆರೆ ಪ್ರದೇಶದಲ್ಲಿ  ಭಯೋತ್ಪಾದನೆಗೆ ಉತ್ತೇಜನ ನೀಡಲಾಗುತ್ತಿದ್ದು, ಇದರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಕರೆ ನೀಡಿದ್ದಾರೆ. 

ಲಷ್ಕರ್-ಎ-ತೊಯ್ಬಾ, ತಾಲೀಬಾನ್, ಇಸ್ಲಾಮಿಕ್ ಸ್ಟೇಟ್ ಉಗ್ರ ಸಂಘಟನೆಗಳು, ದ್ವೇಷ ಹಾಗೂ ಹತ್ಯೆಯ ಒಂದೇ ತತ್ವವನ್ನು ಪಾಲಿಸುತ್ತಿದ್ದು ಯಾವುದೇ ಭೇದ ತೋರದೇ ಎಲ್ಲಾ ಉಗ್ರ ಸಂಘಟನೆಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಪ್ರಧಾನಿ ಮೋದಿ ಹೇಳಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಭಾಷಣಕ್ಕೆ ಮಾರುಹೋದ ಅಮೆರಿಕ ಸದಸ್ಯರು ಭಾಷಣದ ಮಧ್ಯದಲ್ಲಿ ಎಂಟು ಬಾರಿ ಚಪ್ಪಾಳೆ ಹೊಡೆದು ಮೆಚ್ಚುಗೆ ಸೂಚಿಸಿದ್ದು ವಿಶೇಷವಾಗಿತ್ತು. 

ಭಾರತ- ಅಮೆರಿಕದ ಸಂಬಂಧ ಬೆಳವಣಿಗೆಗೆ ಕಾರಣವಾಗಿರುವ ಅಂಶಗಳನ್ನು ಭಾಷಣದಲ್ಲಿ ಪ್ರಸ್ತಾಪಿಸಿದ ಪ್ರಧಾನಿ, ಉತ್ತಮ ಭವಿಷ್ಯಕ್ಕೆ ಅಡಿಪಾಯ ಹಾಕುವ ದೃಷ್ಟಿಯಿಂದ ಉಭಯ ದೇಶಗಳೂ ಈ ಹಿಂದೆ ಎದುರಾಗಿದ್ದ ತೊಡಕುಗಳನ್ನು ಮರೆಯಬೇಕು ಎಂದು ಅಭಿಪ್ರಾಯಪಟ್ಟಿದ್ದಾರೆ. ಇನ್ನು ಹಲವು ದಿನಗಳಿಂದ ಚರ್ಚೆಯಲ್ಲಿರುವ ಭಾರತದ ಮಾನವಹಕ್ಕುಗಳ ಬಗ್ಗೆಯೂ ಮಾತನಾಡಿರುವ ಪ್ರಧಾನಿ ನರೇಂದ್ರ ಮೋದಿ,  ಭಾರತದಲ್ಲಿರುವ ಮಾನವಹಕ್ಕು ವ್ಯವಸ್ಥೆಯನ್ನು ಸಮರ್ಥಿಸಿಕೊಂಡಿದ್ದು, ದೇಶದ ಸಂವಿಧಾನವೇ ತಮ್ಮ ಪವಿತ್ರ ಗ್ರಂಥ ಎಂದು ಸ್ಪಷ್ಟಪಡಿಸಿದ್ದಾರೆ. ಈ ಮೂಲಕ ಭಾರತದಲ್ಲಿರುವ ಧಾರ್ಮಿಕ ಸಹಿಷ್ಣುತೆ ವಿಚಾರವಾಗಿ ಹಲವು ದಿನಗಳಿಂದ ಅಮೆರಿಕ ತಗಾದೆಗೆ ತೀಕ್ಷ್ಣವಾದ ಸ್ಪಷ್ಟನೆ ನೀಡಿದ್ದಾರೆ.  

ಭಾರತ ಏಕತೆಯಲ್ಲಿ ಮುನ್ನಡೆಯುತ್ತದೆ, ಏಕತೆಯಲ್ಲಿಯೇ ಜೀವಿಸುತ್ತದೆ ಹಾಗೂ ಏಕತೆಯಲ್ಲಿಯೇ ಸಂಭ್ರಮ ಕಾಣುತ್ತದೆ ಎಂದು ಪ್ರಧಾನಿ ಹೇಳಿದ್ದಾರೆ. 

ಇದೇ ವೇಳೆ ಪಾಕಿಸ್ತಾನಕ್ಕೆ ಎಫ್-16 ಫೈಟರ್ ಜೆಟ್ ಗಳನ್ನು ಪೂರೈಕೆ ಮಾಡದಿರುವ ನಿರ್ಧಾರಕ್ಕೆ   ಸಂಬಂಧಿಸಿದಂತೆಯೂ ಪ್ರತಿಕ್ರಿಯೆ ನೀಡಿರುವ ಪ್ರಧಾನಿ, ಭಯೋತ್ಪಾದನೆ ನಿಗ್ರಹ ವಿಷಯವನ್ನು ರಾಜಕೀಯ ಲಾಭಕ್ಕಾಗಿ ಬಳಸಿಕೊಳ್ಳುತ್ತಿರುವವರಿಗೆ  ಅಮೆರಿಕ ಸ್ಪಷ್ಟ ಸಂದೇಶ ರವಾನೆ ಮಾಡಿದೆ ಎಂದು ಹೇಳಿದ್ದಾರೆ.