ಜೆ-ಇ-ಎಂ ಉಗ್ರ ಸಂಘಟನೆಗೆ ಹಣ ನೀಡುತ್ತಿರುವವರ ಪತ್ತೆಗೆ ಅಮೆರಿಕದ ನೆರವು ಕೇಳಿದ ಎನ್ಐಎ

ನವದೆಹಲಿ: ಪಾಕಿಸ್ತಾನ ಮೂಲದ ಜೈಶ್-ಇ-ಮೊಹಮ್ಮದ್ ಉಗ್ರ ಸಂಘಟನೆಗೆ ಹರಿದು ಬರುತ್ತಿರುವ ಹಣದ ಜಾಡು ಹಿಡಿಯಲು ಭಾರತದ ರಾಷ್ಟ್ರೀಯ ತನಿಖಾ ತಂಡ(ಎನ್ಐ ಎ) ಅಮೆರಿಕದ ನೆರವು ಕೇಳಿದೆ. 

ಪಠಾಣ್ ಕೋಟ್ ವಾಯುನೆಲೆ ಮೇಲೆ ನಡೆದ ಭಯೋತ್ಪಾದಕ ದಾಳಿಯ ರೂವಾರಿ ಜೈಶ್ ಇ ಮೊಹಮ್ಮದ್ ಸಂಘಟನೆ ಜೆಇಎಂ ಮುಖ್ಯಸ್ಥ ಮೌಲಾನಾ ಮಸೂದ್ ಅಜಾರ್ ವಿರುದ್ಧ ಸಾಕಷ್ಟು ಸಾಕ್ಷ್ಯಾಧಾರಗಳು ದೊರೆತಿರುವ ಹಿನ್ನಲೆಯಲ್ಲಿ ಆತನಿಗೆ ಭಯೋತ್ಪದಾಕ ಕೃತ್ಯಕ್ಕೆ ಹಣದ ನೆರವು ನೀಡುತ್ತಿರುವವರನ್ನು ಪತ್ತೆ ಹಚ್ಚಲು ಅಮೆರಿಕದ ಸಹಾಯವನ್ನು ಎನ್ ಐಎ ಕೇಳಿದೆ ಎಂದು ಮೂಲಗಳು ತಿಳಿಸಿವೆ. 

ಆಲ್ ರಹಮತ್ ಎಂಬ ಟ್ರಸ್ಟ್ ಮೂಲಕ ಜೈಶ್ ಇ ಮೊಹಮ್ಮದ್ ಉಗ್ರ ಸಂಘಟನೆ ತನ್ನ ಭಯೋತ್ಪಾದಕ ಕೃತ್ಯಗಳಿಗೆ ದೇಣಿಗೆಯನ್ನು ಸಂಗ್ರಹಿಸುತ್ತಿದೆ. ಕೆಲವು ದೇಶಗಳಲ್ಲಿ ಈ ಸಂಘಟನೆಗೆ ನಿಷೇಧವೇರಲಾಗಿದೆ. ಆದರೆ ಪಾಕಿಸ್ತಾನದಲ್ಲಿ ಮಾತ್ರ ಇದಕ್ಕೆ ನಿಷೇಧವೇರಿಲ್ಲ. ಹಾಗಾಗಿ, ಈ ಉಗ್ರ ಸಂಘಟನೆಗೆ ದೇಣಿಗೆ ಎಲ್ಲಿಂದ ಹರಿದು ಬರುತ್ತಿದೆ ಎಂಬುದರ ಬಗ್ಗೆ ಪತ್ತೆಹಚ್ಚಲು ಅಮೆರಿಕದ ಸಹಾಯವನ್ನು  ಎನ್ ಐಎ ಕೇಳಿದೆ ಎನ್ನಲಾಗಿದೆ.