ಲಂಡನ್: ಉತ್ತರ ಕೊರಿಯಾದಲ್ಲಿ ಬಿಬಿಸಿ ಬಾತ್ಮೀದಾರ ರುಪೆರ್ಟ್ ವಿಂಗ್ಫೀಲ್ಡ್-ಹಯೇಸ್ ಅವರನ್ನು ಅವರ ವರದಿಯಿಂದಾಗಿ ವಶಕ್ಕೆ ಪಡೆಯಲಾಗಿದ್ದು, ದೇಶದಿಂದ ಉಚ್ಛಾಟನೆ ಮಾಡಲಾಗುತ್ತದೆ ಎಂದು ತಿಳಿದುಬಂದಿದೆ.
ಉತ್ತರ ಕೊರಿಯಾ ದೇಶವನ್ನು ಬಿಡುವುದಕ್ಕೂ ಮುಂಚಿತವಾಗಿ, ಬಿಬಿಸಿ ಕಾರ್ಯಕ್ರಮ ನಿರ್ಮಾಪಕ ಮೇರಿ ಬೈರನ್, ಛಾಯಾಚಿತ್ರಕಾರ ಮ್ಯಾಥ್ಯೂ ಗೊಡಾರ್ಡ್ ಅವರನ್ನು ಕೂಡ ಶುಕ್ರವಾರ ವಶಕ್ಕೆ ಪಡೆಯಲಾಗಿದೆ.
ಇವರುಗಳನ್ನು ಉತ್ತರ ಕೊರಿಯಾ ಅಧಿಕಾರಿಗಳು ೮ ಘಂಟೆಗಳ ಕಾಲ ಪ್ರಶ್ನಿಸಿದ್ದು, ಹೇಳಿಕೆಗೆ ಸಹಿ ಮಾಡಿಸಿಕೊಳ್ಳಲಾಗಿದೆ.
ವರ್ಕರ್ ಪಕ್ಷದ ಸಮಾವೇಶಕ್ಕೂ ಮುಂಚಿತವಾಗಿ ಸಂಶೋಧನಾ ಪ್ರವಾಸಕ್ಕೆಂದು ಕೆಲವು ನೊಬೆಲ್ ಪ್ರಶಸ್ತಿ ಸ್ವೀಕರಿಸಿರುವ ಗಣ್ಯರೊಂದಿಗೆ ಬಿಬಿಸಿ ತಂಡ ಉತ್ತರ ಕೊರಿಯಾಗೆ ಬಂದಿತ್ತು. ಉತ್ತರ ಕೊರಿಯಾದ ರಾಜಧಾನಿಯಲ್ಲಿನ ಜನ ಜೀವನದ ಬಗೆಗಿನ ವರದಿಂಯಿಂದಾಗಿ ಆ ದೇಶದ ನಾಯಕತ್ವ ಬೇಸರಗೊಂಡಿತ್ತು.
ಪ್ಯೋಂಗ್ಯಾಂಗ್ ನಲ್ಲಿ ಪತ್ರಿಕಾ ಗೋಷ್ಠಿ ನಡೆಸಿದ ಉತ್ತರ ಕೊರಿಯಾ ಶಾಂತಿ ಪಡೆ, ದೇಶದ ವ್ಯವಸ್ಥೆಯನ್ನು ವಿರೋಧಿಸಿ, ವಸ್ತು ನಿಷ್ಠ ವರದಿ ಮಾಡದೆ ಇದ್ದುದಕ್ಕೆ ಈ ಕ್ರಮ ತೆಗೆದುಕೊಳ್ಳಲಾಯಿತು ಎಂದು ತಿಳಿಸಿದೆ.
ಈ ವರದಿಗಾರರು ಉತ್ತರ ಕೊರಿಯಾವನ್ನು ಪ್ರವೇಶಿಸುವುದರಿಂದ ನಿಷೇಧಿಸಲಾಗುವುದು ಎಂದು ಕೂಡ ಶಾಂತಿ ಪಡೆ ತಿಳಿಸಿದೆ.
