ಉಗ್ರ ಹಫೀಜ್ ಸಯೀದ್ ಬಿಡುಗಡೆ: ಪಾಕ್ ನಡೆಗೆ ಶ್ವೇತಭವನ ಖಂಡನೆ

ವೆಸ್ಟ್ ಪಾಮ್ ಬೀಚ್; ಮುಂಬೈ ದಾಳಿ ಮಾಸ್ಟರ್ ಮೈಂಡ್ ಹಾಗೂ ಲಷ್ಕರ್-ಇ-ತೊಯ್ಬಾ ಉಗ್ರ ಸಂಘಟನೆಯ ಮುಖಂಡ ಹಫೀಜ್ ಸಯೀದ್ ಬಿಡುಗಡೆಗೊಳಿಸಿರುವ ಪಾಕಿಸ್ತಾನ ಸರ್ಕಾರದ ನಡೆಯನ್ನು ಶ್ವೇತಭವನ ಭಾನುವಾರ ತೀವ್ರವಾಗಿ ಖಂಡಿಸಿದೆ. 

ಈ ಕುರಿತಂತೆ ಮತಾನಾಡಿರುವ ಶ್ವೇತಭವನದ ವಕ್ತಾರೆ ಸಾರಾ ಹಕಬೀ ಸ್ಯಾಂಡರ್ಸ್ ಅವರು, ಹಫೀಜ್'ನನ್ನು ಮತ್ತೆ ಬಂಧನಕ್ಕೊಳಪಡಿಸಲು ಪಾಕಿಸ್ತಾನ ನಿರಾಕರಿಸಿದ್ದೇ ಆದರೆ, ಇದು ಅಮೆರಿಕಾ ಹಾಗೂ ಪಾಕಿಸ್ತಾನದ ನಡುವಿನ ದ್ವಿಪಕ್ಷೀಯ ಸಂಬಂಧ ಹಾಗೂ ಪಾಕಿಸ್ತಾನದ ವರ್ಚಸ್ಸಿನ ಮೇಲೆ ಗಂಭೀರ ಪರಿಣಾಮವನ್ನು ಬೀರದಲಿದೆ ಎಂದು ಹೇಳಿದ್ದಾರೆ. 

ಹಫೀಜ್ ಬಿಡುಗಡೆಯನ್ನು ಅಮೆರಿಕಾ ತೀವ್ರವಾಗಿ ಖಂಡಿಸುತ್ತದೆ. ಕೂಡಲೇ ಹಫೀಜ್ ನನ್ನು ಮತ್ತೆ ಬಂಧನಕ್ಕೊಳಪಡಿಸಿ, ಕೂಡಲೇ ಆತನ ವಿರುದ್ಧ ಕಾನೂನು ಕ್ರಮ ಜರುಗಿಸುವಂತೆ ಈ ಮೂಲಕ ಆಗ್ರಹಿಸುತ್ತೇವೆಂದು. ಹಫೀಜ್ ಬಿಡುಗಡೆ ಬಹುದೊಡ್ಡ ಸಮಸ್ಯೆಯ ಸಂದೇಶವನ್ನು ರವಾನಿಸುತ್ತಿದ್ದು, ಇದು ಭಯೋತ್ಪಾದನೆ ಎದುರಿಸಲು ಪಾಕಿಸ್ತಾನದ ಬದ್ಧತೆಯನ್ನು ತೋರಿಸುತ್ತದೆ ಎಂದು ತಿಳಿಸಿದ್ದಾರೆ.