ಮೋದಿ ಆರಂಭಿಸಿದ್ದಾರೆ.. ನಾವು ಕೊನೆಗಾಣಿಸುತ್ತೇವೆ: ಪಾಕಿಸ್ತಾನ

ಭಾರತಕ್ಕೆ ಶಾಶ್ವತವಾಗಿ ವಾಯುಗಡಿ ನಿರ್ಬಂದಿಸುವ ಕುರಿತು ಪ್ರಧಾನಿ ಇಮ್ರಾನ್ ಖಾನ್ ಆಲೋಚನೆ ಎಂದ ಸಚಿವ ಫವಾದ್ ಚೌದರಿ

ಇಸ್ಲಾಮಾಬಾದ್: ಭಾರತದ ಪ್ರಧಾನಿ ನರೇಂದ್ರ ಮೋದಿ ಆರಂಭಿಸಿದ್ದಾರೆ..ಆದರೆ ನಾವು ಕೊನೆಗಾಣಿಸುತ್ತೇವೆ ಎಂದು ಪಾಕಿಸ್ತಾನ ಸಚಿವ ಫವಾದ್ ಚೌದರಿ ಹೇಳಿದ್ದಾರೆ.

ಕಾಶ್ಮೀರ ವಿವಾದದ ಬೆನ್ನಲ್ಲೇ ಭಾರತಕ್ಕೆ ಶಾಶ್ವತವಾಗಿ ತನ್ನ ವಾಯುಗಡಿ ನಿರ್ಬಂಧಿಸುವ ಕುರಿತು ಪಾಕಿಸ್ತಾನ ಸರ್ಕಾರ ಗಂಭೀರ ಚಿಂತನೆಯಲ್ಲಿದೆ ಎಂದು ಚೌದರಿ ಹೇಳಿದ್ದಾರೆ. ಈ ಕುರಿತಂತೆ ಟ್ವೀಟ್ ಮಾಡಿರುವ ಪಾಕಿಸ್ತಾನ  ಸಚಿವ ಫವಾದ್ ಹುಸೇನ್ ಚೌದರಿ, ಭಾರತಕ್ಕೆ ಶಾಶ್ವತವಾಗಿ ವಾಯುಗಡಿ ನಿರ್ಬಂಧಿಸುವ ಕುರಿತು ಪಾಕಿಸ್ತಾನದ ಪ್ರಧಾನಿ ಇಮ್ರಾನ್ ಖಾನ್ ಅವರು ಗಂಭೀರ ಆಲೋಚನೆಯಲ್ಲಿ ತೊಡಗಿದ್ದಾರೆ. ಈ ಕುರಿತಂತೆ ಪಾಕಿಸ್ತಾನದ ಸಚಿವ ಸಂಪುಟ ಸಭೆಯಲ್ಲಿ ಗಂಭೀರ ಚರ್ಚೆ ನಡೆಸಲಾಗಿದ್ದು, ಕೇವಲ ವಾಯುಗಡಿ ಮಾತ್ರವಲ್ಲದೇ ಭಾರತ ಮತ್ತು ಆಫ್ಘಾನಿಸ್ತಾನದ ನಡುವಿನ ವಾಣಿಜ್ಯ ವ್ಯವಹಾರಕ್ಕಾಗಿಯೂ ಪಾಕಿಸ್ತಾನದ ರಸ್ತೆ ಮಾರ್ಗವನ್ನು ಬಳಸಲಾಗುತ್ತಿದೆ. ಇದನ್ನೂ ಶಾಶ್ವತವಾಗಿ ನಿರ್ಬಂಧಿಸುವ ಕುರಿತು ಚರ್ಚೆ ನಡೆಸಲಾಗಿದೆ. ಈ ಕುರಿತಂತೆ ಇರುವ ಕಾನೂನಾತ್ಮಕ ವಿಚಾರಗಳನ್ನು ಪರಿಶೀಲಿಸಿ ಶೀಘ್ರದಲ್ಲೇ ದಿಟ್ಟ ನಿರ್ಧಾರ ಕೈಗೊಳ್ಳಲಾಗುವುದು ಎಂದು ಹೇಳಿದ್ದಾರೆ.

ಅಂತೆಯೇ ಕೊನೆಯಲ್ಲಿ ಮೋದಿ ಆರಂಭಿಸಿದ್ದಾರೆ.. ನಾವು ಕೊನೆಗಾಣಿಸುತ್ತೇವೆ ಎಂದು ಪರೋಕ್ಷವಾಗಿ ಭಾರತಕ್ಕೆ ಬೆದರಿಕೆ ಹಾಕಿದ್ದಾರೆ.