ನವದೆಹಲಿ: ನೇಪಾಳ ಮತ್ತು ಟಿಬೆಟ್ನಲ್ಲಿ ನೂರಾರು ಜನರನ್ನು ಬಲಿ ಪಡೆದ ಭೀಕರ ಹಠಾತ್ ಪ್ರವಾಹಕ್ಕೂ ಮುನ್ನ ಸಂಭವಿಸಿದ ಹಿಮನದಿ ಕುಸಿತದ ಭಯಾನಕ ಕ್ಷಣ ಡ್ರೋನ್ ಕ್ಯಾಮೆರಾದಲ್ಲಿ ಸೆರೆಯಾಗಿದೆ ಎನ್ನಲಾಗಿದೆ.
ಚೀನಾದ ಛಾಯಾಗ್ರಾಹಕರೊಬ್ಬರು ಚಿತ್ರೀಕರಿಸುತ್ತಿದ್ದ ವೇಳೆ ಆಕಸ್ಮಿಕವಾಗಿ ಈ ದೃಶ್ಯ ಕ್ಯಾಮೆರಾದಲ್ಲಿ ದಾಖಲಾಗಿದೆ ಎಂದು ಹೇಳಲಾಗಿದೆ.
ನೇಪಾಳದ ಲಾಂಗ್ಟಾಂಗ್ ಲಿರುಂಗ್ ಶಿಖರದ ಸಮೀಪ ಈ ಹಿಮನದಿ ಕುಸಿತ ಸಂಭವಿಸಿದೆ. ಸಮುದ್ರಮಟ್ಟದಿಂದ 7,200 ಮೀಟರ್ಗೂ ಹೆಚ್ಚು ಎತ್ತರದಲ್ಲಿರುವ ಈ ಪ್ರದೇಶದಿಂದ ಬೃಹತ್ ಪ್ರಮಾಣದ ಬಂಡೆ ಹಾಗೂ ಹಿಮದ ರಾಶಿ ಏಕಾಏಕಿ ಪರ್ವತದ ಇಳಿಜಾರಿನಿಂದ ಬೇರ್ಪಟ್ಟು ಕೆಳಗೆ ಕುಸಿದಿದೆ.
ಡ್ರೋನ್ ದೃಶ್ಯದಲ್ಲಿ ಪರ್ವತದಿಂದ ಬೃಹತ್ ಪ್ರಮಾಣದ ಹಿಮ ಮತ್ತು ಬಂಡೆಗಳು ಕುಸಿಯುತ್ತಿರುವುದು ಕಾಣಿಸುತ್ತದೆ. ಕೆಲವೇ ಕ್ಷಣಗಳಲ್ಲಿ ಪರ್ವತ ಪ್ರದೇಶದಿಂದ ಭಾರೀ ಪ್ರಮಾಣದ ಧೂಳಿನ ಮೋಡಗಳು ಮೇಲಕ್ಕೆ ಏರುತ್ತಿರುವ ದೃಶ್ಯವೂ ಸೆರೆಯಾಗಿದೆ.
ನಂತರ ಹಿಮ, ಬಂಡೆ, ಕೆಸರು ಮತ್ತು ಅವಶೇಷಗಳ ಭಾರೀ ಪ್ರವಾಹವು ಸುಮಾರು 1,200 ಮೀಟರ್ ಕೆಳಗಿನ ಕಣಿವೆಗೆ ಅಪ್ಪಳಿಸಿದೆ. ಇದರಿಂದ ಭೋಟೆಕೋಶಿ ಮತ್ತು ತ್ರಿಶೂಲಿ ನದಿಗಳ ನೀರಿನ ಮಟ್ಟ ಭಾರೀ ಪ್ರಮಾಣದಲ್ಲಿ ಏರಿಕೆಯಾಗಿ ಹಠಾತ್ ಪ್ರವಾಹ ಉಂಟಾಗಿದೆ.
ಆಗಸ್ಟ್ 26ರಂದು ಸಂಭವಿಸಿದ ಈ ಭೀಕರ ಪ್ರವಾಹದಲ್ಲಿ ನೇಪಾಳದಲ್ಲಿ 903 ಮಂದಿ ಹಾಗೂ ಟಿಬೆಟ್ನಲ್ಲಿ 16 ಮಂದಿ ಮೃತಪಟ್ಟಿದ್ದಾರೆ. ಇನ್ನೂ 4,500ಕ್ಕೂ ಹೆಚ್ಚು ಮಂದಿ ನಾಪತ್ತೆಯಾಗಿದ್ದಾರೆ, ಅವರಲ್ಲಿ ಹೆಚ್ಚಿನವರು ನೇಪಾಳದವರು ಎಂದು ತಿಳಿದುಬಂದಿದೆ.
ಇದೇ ಮೊದಲೇನಲ್ಲ
ಹಿಮನದಿ ಕುಸಿತ, ಬಂಡೆ ಕುಸಿತ ಹಾಗೂ ಹಠಾತ್ ಪ್ರವಾಹದಂತಹ ದುರಂತಗಳು ಇತ್ತೀಚಿನ ವರ್ಷಗಳಲ್ಲಿ ಪದೇಪದೇ ಸಂಭವಿಸುತ್ತಿವೆ. ಹವಾಮಾನ ಬದಲಾವಣೆ ಮತ್ತು ಹಿಮ ಪ್ರದೇಶಗಳಲ್ಲಿನ ತಾಪಮಾನ ಏರಿಕೆಯಿಂದ ಇಂತಹ ಘಟನೆಗಳ ಅಪಾಯ ಹೆಚ್ಚುತ್ತಿದೆ.
2021ರಲ್ಲಿ ಉತ್ತರಾಖಂಡದಲ್ಲಿ ಇದೇ ರೀತಿಯ ಬಂಡೆ ಮತ್ತು ಹಿಮದ ಭಾರೀ ಕುಸಿತ ಸಂಭವಿಸಿತ್ತು. ರೋಂಟಿ ಪೀಕ್ನಿಂದ ಸುಮಾರು 95 ಕೋಟಿ ಘನ ಅಡಿ ಬಂಡೆ ಮತ್ತು ಹಿಮ ಕೆಳಕ್ಕೆ ಕುಸಿದು ಬಂದಿತ್ತು. ಇದರಲ್ಲಿ ಸುಮಾರು ಶೇ.80ರಷ್ಟು ಬಂಡೆ ಹಾಗೂ ಶೇ.20ರಷ್ಟು ಹಿಮವಿತ್ತು ಎನ್ನಲಾಗಿದೆ.
ಭಾರೀ ಪ್ರಮಾಣದಲ್ಲಿ ಕುಸಿದು ಬಂದ ಬಂಡೆ ಮತ್ತು ಹಿಮದ ರಾಶಿ ಜಲವಿದ್ಯುತ್ ಘಟಕವೊಂದನ್ನು ಧ್ವಂಸಗೊಳಿಸಿತ್ತು. ಘಟನೆಯಲ್ಲಿ ಸುಮಾರು 200 ಮಂದಿ ಮೃತಪಟ್ಟಿದ್ದು ಅಥವಾ ನಾಪತ್ತೆಯಾಗಿದ್ದರು. ಮೃತಪಟ್ಟವರಲ್ಲಿ ಹಾಗೂ ನಾಪತ್ತೆಯಾದವರಲ್ಲಿ ಹಲವರು ಅಣೆಕಟ್ಟು ನಿರ್ಮಾಣ ಮತ್ತು ಜಲವಿದ್ಯುತ್ ಯೋಜನೆಗಳಲ್ಲಿ ಕೆಲಸ ಮಾಡುತ್ತಿದ್ದ ಕಾರ್ಮಿಕರಾಗಿದ್ದರು.
2023ರಲ್ಲಿ ಸಿಕ್ಕಿಂನಲ್ಲಿ ಮತ್ತೊಂದು ಭೀಕರ ಘಟನೆ ಸಂಭವಿಸಿತ್ತು. ಪರ್ಮಾಫ್ರಾಸ್ಟ್ (ದೀರ್ಘಕಾಲದಿಂದ ಹೆಪ್ಪುಗಟ್ಟಿರುವ ಮಣ್ಣು) ಕರಗಿದ ಪರಿಣಾಮ ಸೌತ್ ಲೋನಾಕ್ ಸರೋವರಕ್ಕೆ ಬಂಡೆಗಳು ಕುಸಿದು ಬಿದ್ದಿದ್ದವು. ಇದರಿಂದ ಭಾರೀ ಅಲೆ ಸೃಷ್ಟಿಯಾಗಿ, ಹಿಮನದಿ ಸರೋವರದ ನೀರನ್ನು ತಡೆದು ನಿಲ್ಲಿಸಿದ್ದ ಮೊರೈನ್ ರಚನೆ ಒಡೆದುಹೋಗಿತ್ತು.
ನಂತರ ಉಂಟಾದ ಹಿಮನದಿ ಸರೋವರ ಸ್ಫೋಟ ಪ್ರವಾಹ (GLOF)ದಲ್ಲಿ 1,300 ಕೋಟಿಗೂ ಹೆಚ್ಚು ಗ್ಯಾಲನ್ ನೀರು ಪರ್ವತದಿಂದ ಭಾರೀ ವೇಗದಲ್ಲಿ ಕೆಳಕ್ಕೆ ಹರಿದು ಬಂದಿತ್ತು. ಈ ಪ್ರವಾಹದಿಂದ ಹಲವು ಅಣೆಕಟ್ಟುಗಳಿಗೆ ಹಾನಿಯಾಗಿತ್ತು. 25,000ಕ್ಕೂ ಹೆಚ್ಚು ಕಟ್ಟಡಗಳು ಹಾಗೂ 30ಕ್ಕೂ ಅಧಿಕ ಸೇತುವೆಗಳು ಹಾನಿಗೊಳಗಾಗಿದ್ದವು.
2025ರಲ್ಲಿ ಸ್ವಿಟ್ಜರ್ಲ್ಯಾಂಡ್ನ ಆಲ್ಪ್ಸ್ ಪರ್ವತ ಪ್ರದೇಶದಲ್ಲೂ ಇದೇ ರೀತಿಯ ದುರಂತ ಸಂಭವಿಸಿತ್ತು. ಬಿರ್ಚ್ ಹಿಮನದಿಯಿಂದ ಸುಮಾರು 33.5 ಕೋಟಿ ಘನ ಅಡಿ ಬಂಡೆ ಮತ್ತು ಹಿಮ ಕುಸಿದು ಬಂದಿತ್ತು. ಭಾರೀ ಪ್ರಮಾಣದ ಬಂಡೆ-ಹಿಮದ ರಾಶಿ ಕುಸಿದ ಪರಿಣಾಮ ಬ್ಲಾಟನ್ ಗ್ರಾಮದ ಬಹುತೇಕ ಭಾಗ ಮಣ್ಣಿನಡಿ ಮತ್ತು ಅವಶೇಷಗಳಡಿ ಹೂತುಹೋಗಿತ್ತು.
ಈ ಸರಣಿ ಘಟನೆಗಳು ಹಿಮಾಲಯದಿಂದ ಆಲ್ಪ್ಸ್ವರೆಗೆ ಪರ್ವತ ಪ್ರದೇಶಗಳಲ್ಲಿ ಹಿಮನದಿ ಕುಸಿತ, ಪರ್ಮಾಫ್ರಾಸ್ಟ್ ಕರಗುವಿಕೆ ಹಾಗೂ ಹಿಮನದಿ ಸರೋವರಗಳ ಸ್ಫೋಟದಂತಹ ಅಪಾಯಗಳು ಹೆಚ್ಚುತ್ತಿರುವುದರ ಬಗ್ಗೆ ಆತಂಕ ಮೂಡಿಸಿವೆ.
