ಮಾನವನ ಮನಸ್ಸಿನ ಮೇಲೆ ಪರಿಣಾಮ ಬೀರುವ ಗ್ರಹ ಚಂದ್ರ. ಬುದ್ಧಿಯ ಮೇಲೆ ಬುಧನ ಪರಿಣಾಮ, ಚಿತ್ತದ ಮೇಲೆ ಗುರುವಿನ ಹಿಡಿತ, ಸಾತ್ವಿಕ ಅಹಂಕಾರದ ಮೇಲೆ ಶನಿಯ ಪರಿಣಾಮ, ಅಭಿಮಾನ ಗರ್ವಗಳ ಮೇಲೆ ಕುಜನ ಪರಿಣಾಮ, ಶುಕ್ರನು ಜ್ಞಾನದ ಮೇಲೆ ಪರಿಣಾಮವನ್ನು ಕೊಡುವನು. ಮೋಕ್ಷದ ಮೇಲೆ ರಾಹು ಪರಿಣಾಮವನ್ನು ಬೀರುತ್ತಾನೆ.
ಚಂದ್ರನು ರಾಣಿಯಾದುದರಿಂದ ಪ್ರಜಾಕಾರಕ ಗ್ರಹ. ಗ್ರಹದಲ್ಲಿ ಪ್ರಥಮರಾದ ಸೂರ್ಯ, ಚಂದ್ರರು ಪ್ರಕಾಶ ಗ್ರಹರು. ಚಂದ್ರನು ಶುಭ ಗ್ರಹ. ಕ್ಷೀಣ ಚಂದ್ರ ಪಾಪ ಗ್ರಹ. ಲಗ್ನದಿಂದ ನವಮದಲ್ಲಿ ಚಂದ್ರನಿದ್ದರೆ ಹಿರಿಯರಿಂದ ಸುಖ ಸಿಗುವುದಿಲ್ಲ. ಇದು ಆತನ ಸ್ಥಾನದ ಫಲ. ಶುಕ್ಲ ಪಕ್ಷದ ದಶಮಿಯವರೆಗೆ ಚಂದ್ರ ಮಧ್ಯಮ ಬಲ. ಆದರೆ ನಂತರದ ಹತ್ತು ದಿನಗಳಲ್ಲಿ ಬಹು ಬಲವನ್ನು ಹೊಂದುತ್ತಾನೆ. ಆದರೆ ನಂತರ ಚಂದ್ರ ಬಲಹೀನನಾಗುತ್ತಾನೆ.
ಚಂದ್ರನಿಂದ ತಾರುಣ್ಯ, ಪ್ರೌಢ, ವೃದ್ಧಾವಸ್ಥೆಗಳನ್ನು ಮಾನವನ ಕರ್ಮದಲ್ಲಿ ಸೂಚಿಸಬಹುದು. ತಾರುಣ್ಯಾವಸ್ಥೆ ಶುಕ್ಲ ಪಕ್ಷದ ಮೊದಲ ಹತ್ತು ದಿನಗಳಲ್ಲಿ ಅವಸ್ಥೆಯ ಚಂದ್ರನಿಂದ ವಿಶೇಷ ಫಲ ಬೋಧನೆ ಸಾಧ್ಯವಿಲ್ಲ. ಕೃಷ್ಣ ಪಕ್ಷದಲ್ಲಿ ದಿವಾ ಜನನ, ಶುಕ್ಲ ಪಕ್ಷದಲ್ಲಿ ರಾತ್ರಿ ಜನನ ಶುಭ. ಅಮಾವಾಸ್ಯೆಯ ಚಂದ್ರನಿಗೆ ಸ್ತ್ರೀ ರಾಶಿಯಲ್ಲಿದ್ದಾಗ ತಾರುಣ್ಯ ನಂತರ ಶುಭ ಫಲ ಕಾಣುವುದು.
ಇಂಥವರಿಗೆ ಬಾಲ್ಯದಲ್ಲಿ ಕಷ್ಟ ಅಧಿಕವಾಗಿದ್ದು, ವಯಸ್ಸು ಆದಂತೆ ವೃದ್ಧಿಗೊಳ್ಳುತ್ತಿರುವರು. ಮೇಷ, ವೃಷಭ, ಕರ್ಕಾಟಕ, ಧನು, ಮಕರ ರಾಶಿಗಳು ವೃಷ್ಠೋದಯಗಳು. ಸಿಂಹ, ಕನ್ಯಾ, ತುಲಾ, ವೃಶ್ಚಿಕ, ಕುಂಭ ರಾಶಿಗಳು ಶೀರ್ಷೋದಯ ರಾಶಿಗಳು. ಮೀನ ಉಭಯೋದಯ ರಾಶಿ. ಲಗ್ನ ಮತ್ತು ಚಂದ್ರ ರಾಶಿ ಷಷ್ಠಹಾಗೂ ಉಭಯೋದಯವಾದರೆ ಹೆಂಗಸರಿಗೆ ಹೆರಿಗೆ ಕಷ್ಟವಾಗುತ್ತದೆ.
ಶೀರ್ಷೋದಯ ರಾಶಿಯಲ್ಲಿ ಚಂದ್ರ ಮತ್ತು ಲಗ್ನವಿದ್ದರೆ ಹೆರಿಗೆ ಸಮಯ ಕಷ್ಟವಾಗುವುದಿಲ್ಲ. ಮೀನ ಉಭಯೋದಯ. ಇದರಲ್ಲಿ ಹೆರಿಗೆಯಾದರೆ ಕಷ್ಟವಾಗುತ್ತದೆ. ಚಂದ್ರನ ಕೇಂದ್ರದಲ್ಲಿ ಪಾಪಗ್ರಹ ಯೋಗ ಇದ್ದರೆ ಮನಸ್ಸು ಶುದ್ಧವಾಗಿರದು.
ಚಂದ್ರನು ಜಲರೂಪನಾದ್ದರಿಂದ ಜಲದೇವತೆಯು ರತ್ನಮುತ್ತುಗಳ ಹುಟ್ಟು. ಚಂದ್ರನು ಬಲಹೀನನಾದರೆ ರಕ್ತ ಸಂಚಾರ ಸರಿಯಾಗಿ ಆಗುವುದಿಲ್ಲ. ಗುರು ಗ್ರಹವು ಚಂದ್ರನ ಗುಣಧರ್ಮವನ್ನು ಕೊಡಿಸಿ ಅನಿಷ್ಟ ಫಲಕ್ಕೆ ಕಾರಣನಾಗುತ್ತಾನೆ.
ಚಂದ್ರನು ಅನಿಷ್ಟನಾಗಿದ್ದಾಗ ನಿದ್ರೆ ಹೆಚ್ಚಾಗುವುದು. ಕಫ, ಅತಿಸಾರ, ಶೀತ ಜ್ವರಗಳು ಕಂಡುಬರುವುದು. ಆಲೋಚನಾ ಶಕ್ತಿ ಕಡಿಮೆಯಾಗುತ್ತದೆ. ರಕ್ತ ದೋಷದಿಂದಾಗುವ ರೋಗಗಳು ಬರುತ್ತದೆ.
- ಮೂಲ್ಕಿ ಹರಿಶ್ಚಂದ್ರ ಸಾಲಿಯಾನ್