ಗ್ರೇಟರ್ ನೋಯ್ಡಾ: ದೇಶದೆಲ್ಲೆಡ ರಾಮನನ್ನು ಪೂಜಿಸುವುದು ಸರ್ವೇ ಸಾಮಾನ್ಯ ಹಾಗು ರಾಮನಿಗಾಗಿರುವ ದೇವಾಲಯಗಳು ಅಸಂಖ್ಯಾತ. ಆದರೆ ಬಿಸ್ರಾಕ್ ಗ್ರಾಮದಲ್ಲಿ ಪೂಜಿಸಲ್ಪಡುವವನು ರಾಮಾಯಣದ ನಾಯಕ ರಾಮನಲ್ಲಿ ಬದಲಾಗಿ ಖಳನಾಯಕ ರಾವಣ. ಇಲ್ಲಿನ ಪ್ರಾದೇಶಿಕ ಜನಪದದ ಪ್ರಕಾರ ಈ ರಾಕ್ಷಸ ರಾಜ ಹುಟ್ಟಿದ್ದು ಇಲ್ಲಿಯೇ!

ಆದುದರಿಂದ ರಾವಣನಿಗಾಗಿ ಭವ್ಯ ದೇವಾಲಯ ಕಟ್ಟಿಸುವ ಪ್ರಾದೇಶಿಕ ನಿವಾಸಿಗಳ ಬಹುದಿನದ ಕನಸು ಈಗ ನನಸಾಗುತ್ತಿದ್ದೆ. ಲಂಕೆಯ ರಾಜ ರಾವಣನಿನಾಗಿ ದೇವಾಲಯ ಈಗಾಗಲೇ ಸಿದ್ಧವಾಗಿದ್ದು, ಆಗಸ್ಟ್ 11 ರಂದು ನಡೆಯುವ ಪೂಜಾ ವಿಧಿಗಳ ಪ್ರಕಾರ ರಾವಣನ ವಿಗ್ರಹವನ್ನು ಇಲ್ಲಿ ಪ್ರತಿಷ್ಠಾಪಿಸಲಾಗುವುದು. 

ಆದರೆ ಈ ದೇವಾಲಯದ ಗರ್ಭಗುಡಿಯಲ್ಲಿ ರಾವಣ ಮಾತ್ರ ಇರದೇ ರಾಮ, ಸೀತೆ ಮತ್ತು ಲಕ್ಷ್ಮಣರೂ ರಾವಣನ ಜೊತೆಯಾಗಲಿದ್ದಾರೆ. ಮಹಾತ್ಮ ರಾವಣ ದೇವಾಲಯ ಟ್ರಸ್ಟ್ ಮತ್ತು ಶಿವ ಮೋಹನ ದೇವಾಲಯ ಟ್ರಸ್ಟ್ ನ ಸಹಭಾಗಿತ್ವದಲ್ಲಿ ಈ ದೇವಾಲಯವನ್ನು ನಿರ್ಮಿಸಲಾಗಿದೆ. 

ಎರಡೂ ಟ್ರಸ್ಟ್ ಗಳ ಸಂಸ್ಥಾಪಕ ಮತ್ತು ಸದಸ್ಯ ಹಾಗು ಈ ದೇವಾಲಯವನ್ನು ಸಾಕಾರಗೊಳಿಸುವಲ್ಲಿ ಪ್ರಮುಖ ಪಾತ್ರಧಾರಿ ಅಶೋಕಾನಂದ್ ಮಹಾರಾಜ್ ಹೇಳುವಂತೆ ಸಮಾಜದ ಎಲ್ಲ ಸ್ಥರದ ಜನರು ಭೇಟಿ ನೀಡಲು ದೇವಾಲಯ ಬಹುತೇಕ ಸಿದ್ಧವಿದೆ ಎಂದಿದ್ದಾರೆ. 

ಹಿಂದೂ ಮಹಾಸಭಾದ ಅಧ್ಯಕ್ಷ ಸ್ವಾಮಿ ಚಕ್ರಪಾಣಿ ಮುಖ್ಯ ಅತಿಥಿಯಾಗಿ ಭಾಗವಹಿಸಲಿದ್ದು ಹಲವು ಧರ್ಮ ಗುರುಗಳು ಮತ್ತು ಗಣ್ಯರು ಭಾಗವಹಿಸುವ ಸಾಧ್ಯತೆ ಇದೆ. ಇದನ್ನು ಧೃಢೀಕರಿಸಿರುವ ಸ್ವಾಮಿ ಚಕ್ರಪಾಣಿ ರಾವಣನಿಲ್ಲದೆ ರಾಮನ ಅಸ್ತಿತ್ವ ಸಾಧ್ಯವಿರಲಿಲ್ಲ ಎಂದಿದ್ದಾರೆ. 

ರಾವಣ ತಿಳಿದ ಬ್ರಾಹ್ಮಣ ಮತ್ತು ಅಹಂಕಾರಿ. ಕೊನೆಗೆ ಅವನ ಆಹಾಕಾರವನ್ನು ಕೊನೆಗಾಣಿಸುವ ಕೆಲಸ ರಾಮನಿಗೆ ಬಿದ್ದಿತು ಎಂದು ರಾಮಾಯಣ ತಿಳಿಸುತ್ತದೆ. ಇದನ್ನೇ ದಸರಾ ಸಮಯದಲ್ಲಿ ಆಚರಣೆ ಮಾಡುವುದು ಎಂದು ಚಕ್ರಪಾಣಿ ಹೇಳಿದ್ದಾರೆ. 

ದೇವಾಲಯದಲ್ಲಿ ಗಣೇಶನ ವಿಗ್ರಹ ಮತ್ತು ಶನಿ ಮಹಾರಾಜ್ ವಿಗ್ರಹ ಕೂಡ ಇರಲಿದೆ. ಈ ದೇವಾಲಯದ ಪೂಜಾ ವಿಧಿವಿಧಾನಗಳನ್ನು ನೋಡಿಕೊಳ್ಳಲು ನಾಲ್ಕು ಜನ ಅರ್ಚಕರನ್ನು ನೇಮಿಸಲಾಗಿದೆ.