ನವದೆಹಲಿ: ಮಹತ್ವದ ಬೆಳವಣಿಗೆಯಲ್ಲಿ ಗ್ರಾಹಕ ಸಂರಕ್ಷಣಾ ಕಾಯ್ದೆಗೆ ತಿದ್ದುಪಡಿ ತರಲಾಗಿದ್ದು, ಉತ್ಪಾದಕರು ಪರಿಷ್ಕೃತ ಎಂಆರ್ಪಿ ಮುದ್ರಿಸದಿದ್ದರೆ ಜೈಲು ಶಿಕ್ಷೆಗೆ ಗುರಿಯಾಗಬೇಕಾಗುತ್ತದೆ ಎಂದು ತಿಳಿದುಬಂದಿದೆ.
ಜುಲೈ 1ರಿಂದ ಏಕರೂಪದ ತೆರಿಗೆ ವ್ಯವಸ್ಥೆ ಜಾರಿಯಾಗಿದ್ದು, ಇದರ ಅನ್ವಯ ಹೊಸ ಗರಿಷ್ಠ ಮಾರಾಟ ದರವನ್ನು (ಎಂಆರ್ಪಿ) ಉತ್ಪನ್ನಗಳ ಮೇಲೆ ಮುದ್ರಿಸದ ಉತ್ಪಾದಕರು ಇನ್ನು ಗರಿಷ್ಠ ಒಂದು ಲಕ್ಷ ರು. ದಂಡ ಸೇರಿದಂತೆ ಒಂದು ವರ್ಷ ಜೈಲು ಶಿಕ್ಷೆ ಅನುಭವಿಸಬೇಕಾಗುತ್ತದೆ. ಕೇಂದ್ರ ಸರ್ಕಾರ ಈಗಾಗಲೇ ಗ್ರಾಹಕ ಸಂರಕ್ಷಣಾ ಕಾಯ್ದೆಗೆ ತಿದ್ದುಪಡಿ ತಂದಿದ್ದು, ಜಿಎಸ್ಟಿ ಲಾಭಗಳಿಂದ ಜನರನ್ನು ವಂಚಿಸುವಂತಿಲ್ಲ ಎಂದು ಉತ್ಪಾದಕರಿಗೆ ಎಚ್ಚರಿಕೆ ನೀಡಿದೆ.
ಒಂದು ವೇಳೆ ಉತ್ಪಾದಕರು ಜಿಎಸ್ ಟಿ ಲಾಭಗಳನ್ನು ಗ್ರಾಹಕರಿಗೆ ನೀಡದೇ ಹಳೆಯ ದರಗಳ ಎಂಆರ್ ಪಿಯನ್ನೇ ಮುದ್ರಿಸಿದ್ದರೆ ಪ್ಯಾಕೇಜ್ಡ್ ಕಮಾಡಿಟೀಸ್ ನಿಯಮದಡಿ ಕಠಿಣ ಕ್ರಮಕೈಗೊಳ್ಳಲಾಗುತ್ತದೆ ಎಂದು ಗ್ರಾಹಕ ವ್ಯವಹಾರ ಖಾತೆ ಸಚಿವ ರಾಮ್ ವಿಲಾಸ್ ಪಾಸ್ವಾನ್ ಶುಕ್ರವಾರ ಎಚ್ಚರಿಕೆ ನೀಡಿದ್ದಾರೆ. "ಮಾರಾಟವಾಗದ ವಸ್ತುಗಳ ಮೇಲೆ ಹೊಸ ಗರಿಷ್ಠ ಚಿಲ್ಲರೆ ದರವನ್ನು ನಮೂದಿಸಿ ಸೆಪ್ಟೆಂಬರ್ ಒಳಗೆ ಅವುಗಳನ್ನು ಮಾರಾಟ ಮಾಡುವಂತೆ ಉತ್ಪಾದಕರಿಗೆ ಗಡುವು ವಿಧಿಸಲಾಗಿದೆ. ಜಿಎಸ್ಟಿಗೆ ಸಂಬಂಧಿಸಿದಂತೆ ಗ್ರಾಹಕರ ಅಹವಾಲುಗಳನ್ನು ಸ್ವೀಕರಿಸುವುದಕ್ಕಾಗಿ ಸಮಿತಿಯನ್ನು ರಚಿಸಲಾಗಿದ್ದು, ಹಿಂದೆ ಇದ್ದ 14 ಸಹಾಯವಾಣಿಗಳ ಸಂಖ್ಯೆಯನ್ನು 60ಕ್ಕೆ ಹೆಚ್ಚಿಸಲಾಗಿದೆ. ಸಹಾಯವಾಣಿಗಳಿಗೆ ಇದುವರೆಗೆ 700 ಮಂದಿ ಕರೆಮಾಡಿದ್ದು, ಅವರ ಪ್ರಶ್ನೆಗಳ ಪರಿಹಾರಕ್ಕಾಗಿ ತಜ್ಞರನ್ನು ಸಂರ್ಪಸಲಾಗಿದೆ" ಎಂದು ಪಾಸ್ವಾನ್ ತಿಳಿಸಿದರು.
ಜಿಎಸ್ಟಿ ನಂತರದ ದಾಸ್ತಾನುಗಳ ದರವನ್ನು ಗ್ರಾಹಕರ ವ್ಯವಹಾರಗಳ ಸಚಿವಾಲಯಕ್ಕೆ ತಿಳಿಸುವುದರ ಜತೆಗೆ ಜಾಹೀರಾತುಗಳ ಮೂಲಕವೂ ಜನರಲ್ಲಿ ಜಾಗೃತಿ ಮೂಡಿಸಬೇಕೆಂದು ಎಂದು ಪಾಸ್ವಾನ್ ಸೂಚಿಸಿದ್ದಾರೆ.
ಹೊಸ ದರವನ್ನು ವಸ್ತುಗಳ ಮೇಲೆ ಮರುಮುದ್ರಣ ಅಥವಾ ಸ್ಟಿಕರ್ರೂಪದಲ್ಲಿ ಅಂಟಿಸದಿದ್ದರೆ ಮೊದಲ ಬಾರಿ 25 ಸಾವಿರ ರು. ದಂಡ, ಎರಡನೇ ಬಾರಿಗೆ 50 ಸಾವಿರ ರು. ಮತ್ತು ಮೂರನೇ ಬಾರಿಗೆ 1 ಲಕ್ಷ ರು. ದಂಡ ಹಾಗೂ ಒಂದು ವರ್ಷದ ವರೆಗೆ ಶಿಕ್ಷೆ ಅನುಭವಿಸಬೇಕಾಗುತ್ತದೆ ಎಂದು ತಿಳಿದುಬಂದಿದೆ.
ದ್ವಿ ಬಗೆಯ ಎಂಆರ್ಪಿ ನೀತಿ ರದ್ದು
ಏತನ್ಮಧ್ಯೆ ಮಹಾರಾಷ್ಟ್ರ ಕಾನೂನು ಮಾಪನ ವಿಭಾಗದ (ಎಲ್ಎಂಒ) ಮನವಿಯನ್ನು ಪುರಸ್ಕರಿಸಿರುವ ಕೇಂದ್ರ ಗ್ರಾಹಕ ವ್ಯವಹಾರಗಳ ಇಲಾಖೆಯು ಎರಡು ಬಗೆಯ ಗರಿಷ್ಠ ಚಿಲ್ಲರೆ ದರ (ಎಂಆರ್ಪಿ) ನೀತಿಯನ್ನು ರದ್ದುಪಡಿಸಿದೆ. ಇದರಿಂದ ಉತ್ಪನ್ನಗಳ ಮಾರಾಟಗಾರರು ಒಂದೇ ಉತ್ಪನ್ನಕ್ಕೆ ಬೇರೆಬೇರೆ ಸ್ಥಳಗಳಲ್ಲಿ (ಉದಾಹರಣೆಗೆ ಮಾಲ್, ವಿಮಾನ ನಿಲ್ದಾಣ ಮತ್ತು ತಾರಾ ಹೋಟೆಲ್ಗಳಲ್ಲಿ )ಹೆಚ್ಚಿನ ದರ ವಿಧಿಸುವುದಕ್ಕೆ ಅವಕಾಶವಿರುವುದಿಲ್ಲ. ಹೊಸ ಆದೇಶವು 2018ರ ಜನವರಿ 1ರಿಂದ ಜಾರಿಗೆ ಬರಲಿದ್ದು, ಉತ್ಪನ್ನ ತಯಾರಿಕಾ ಕಂಪನಿಗಳು ನೀರು, ತಂಪು ಪಾನೀಯ ಅಥವಾ ಲಘು ಉಪಾಹಾರಗಳಿಗೆ ನಿಗದಿತ ಸ್ಥಳಗಳಲ್ಲಿ ಹೆಚ್ಚಿನ ಬೆಲೆ ವಿಧಿಸುವಂತಿಲ್ಲ.
ಈ ಬಗ್ಗೆ ತನ್ನ ವಾದ ಮಂಡಿಸಿದ್ದ ಕಾನೂನು ಮಾಪನ ವಿಭಾಗ " ಕಿರಾಣಿಗಳಲ್ಲಿ ಮಾರಾಟ ಮಾಡುವ ವಸ್ತುಗಳನ್ನೇ ಮಾಲ್ಗಳಲ್ಲಿ ಮಾರಾಟ ಮಾಡಲಾಗುತ್ತದೆ. ಆದ್ದರಿಂದ ಅವುಗಳಿಗೆ ಬೇರೆ ಎಂಆರ್ಪಿ ವಿಧಿಸುವ ಅಗತ್ಯವಿಲ್ಲ" ಎಂದು ಹೇಳಿತ್ತು. ಅದರಂತೆ ಇದೀಗ ಕೇಂದ್ರದ ಆದೇಶದಂತೆ ಎಲ್ಎಂಒ ಕೋಕಾಕೋಲಾ, ಪೆಪ್ಸಿ, ರೆಡ್ಬುಲ್, ಯುರೇಕಾ ಪೋರ್ಬ್ಸ್, ಫ್ಲಿಪ್ಕಾರ್ಟ್, ಅಮೆಜಾನ್ ಸಂಸ್ಥೆಗಳಿಗೆ ದ್ವಿ ಬಗೆಯ ಎಂಆರ್ಪಿ ಅನುಸರಿಸದಂತೆ ನೋಟಿಸ್ ಜಾರಿಗೊಳಿಸಿದ್ದು, ಪ್ಯಾಕೇಜ್ಡ್ ಕಮಾಡಿಟೀಸ್ ನಿಬಂಧನೆ ಅನುಸರಿಸುವಂತೆ ಸೂಚನೆ ನೀಡಿದೆ.