ನವದೆಹಲಿ: ವಿಮಾನ ಪಾರ್ಕಿಂಗ್ ಶುಲ್ಕ ಹೆಚ್ಚಿಸಲು ಭಾರತೀಯ ವಿಮಾನ ನಿಲ್ದಾಣ ಪ್ರಾಧಿಕಾರ(ಎಎಐ) ಮುಂದಾಗಿದ್ದು, ವಾಯುಯಾನ ಮತ್ತಷ್ಟು ದುಬಾರಿಯಾಗುವ ಸಾಧ್ಯತೆ ಇದೆ.

ಪೀಕ್ ಸಮಯದಲ್ಲಿ ವಿಮಾನಗಳ ನಿಲುಗಡೆಗೆ ವಿಮಾನಯಾನ ಸಂಸ್ಥೆಗಳ ಮೇಲೆ ಹೆಚ್ಚುವರಿ ಶುಲ್ಕ ವಿಧಿಸಲು ಪ್ರಸ್ತಾವನೆ ಸಿದ್ಧಪಡಿಸಿದ್ದು, ಪ್ರಸ್ತಾವನೆ ಜಾರಿಗೆ ಬಂದರೆ ವಿಮಾನಯಾನ ಸಂಸ್ಥೆಗಳು ಆ ಶುಲ್ಕವನ್ನು ನೇರವಾಗಿ ಪ್ರಯಾಣಿಕರಿಗೆ ವರ್ಗಾಯಿಸುವ ಸಾಧ್ಯತೆ ಇದೆ. ಇದರಿಂದ ಒಳಬರುವ ಮತ್ತು ಹೊರಹೋಗುವ ದೇಶೀಯ ಮತ್ತು ಅಂತಾರಾಷ್ಟ್ರೀಯ ಪ್ರಯಾಣಿಕರು ಈ ಶುಲ್ಕದ ಹೊರೆ ಹೊರಬೇಕಿದೆ.

ವಿಮಾನ ನಿಲುಗಡೆ ಶುಲ್ಕ ಹೆಚ್ಚಳ ಪ್ರಸ್ತಾವನೆ ಇದೆ. ಆದರೆ ಇದಕ್ಕೆ ಇನ್ನೂ ಸರ್ಕಾರ ಒಪ್ಪಿಗೆ ನೀಡಿಲ್ಲ ಎಂದು ಎಎಐ ಅಧ್ಯಕ್ಷ ಗುರುಪ್ರಸಾದ್ ಮಹಪಾತ್ರ ಅವರು ಹೇಳಿದ್ದಾರೆ.

ಸದ್ಯ ವಿಮಾನ ನಿಲುಗಡೆಗೆ ಒಂದೇ ದರ ವಿಧಿಸಲಾಗುತ್ತಿದ್ದು, ಪೀಕ್ ಟೈಮ್ ನಲ್ಲಿ ಯಾವುದೇ ಹೆಚ್ಚುವರಿ ಶುಲ್ಕ ವಿಧಿಸಲಾಗುತ್ತಿಲ್ಲ.