ನವದೆಹಲಿ: ಇನ್ನೆರಡು-ಮೂರು ವರ್ಷಗಳಲ್ಲಿ ದೇಶದ ಬಹುತೇಕ ಭಾಗದಲ್ಲಿ ಹೈಸ್ಪೀಡ್ 5ಜಿ ಸೇವೆಗಳು ಲಭ್ಯವಾಗಲಿದ್ದು ಕೈಗೆಟುಕುವ ದರದಲ್ಲಿ ಸಿಗುವ ನಿರೀಕ್ಷೆಯಿದೆ ಎಂದು ದೂರಸಂಪರ್ಕ ಸಚಿವ ಅಶ್ವಿನಿ ವೈಷ್ಣವ್ ಹೇಳಿದ್ದಾರೆ.
ಟೆಲಿಕಾಂ ಮೂಲಸೌಕರ್ಯವನ್ನು ತ್ವರಿತವಾಗಿ ಹೊರತರಲು ಅನುಕೂಲವಾಗುವಂತೆ 5G ರೈಟ್-ಆಫ್-ವೇ ಅಪ್ಲಿಕೇಶನ್ ಪೋರ್ಟಲ್ ಅನ್ನು ಬಿಡುಗಡೆ ಮಾಡಿದ ಸಚಿವರು, ಭಾರತದಲ್ಲಿ ಮೊಬೈಲ್ ಸೇವೆಗಳು ವಿಶ್ವದ ಅತ್ಯಂತ ಕೈಗೆಟುಕುವ ಸೇವೆಗಳಲ್ಲಿ ಒಂದಾಗಿದೆ ಎಂದರು.
'ನಾವು ಉದ್ಯಮಕ್ಕೆ ಸುಮಾರು 2.5-3 ಲಕ್ಷ ಕೋಟಿ ರೂಪಾಯಿ ಹೂಡಿಕೆಯನ್ನು ನಿರೀಕ್ಷಿಸುತ್ತೇವೆ. 3 ಲಕ್ಷ ಕೋಟಿ ರೂಪಾಯಿಗಳು ದೊಡ್ಡ ಹೂಡಿಕೆಯಾಗಿದೆ. ಇದು ಉತ್ತಮ ಉದ್ಯೋಗ ಸೃಷ್ಟಿಗೆ ಕಾರಣವಾಗುತ್ತದೆ. ನಮ್ಮ ಅಂದಾಜಿನ ಪ್ರಕಾರ ಮುಂದಿನ 2-3 ವರ್ಷಗಳಲ್ಲಿ ದೇಶದ ಬಹುತೇಕ ಎಲ್ಲಾ ಭಾಗಗಳಿಗೂ 5ಜಿ ತಲುಪುತ್ತದೆ ಎಂದು ವೈಷ್ಣವ್ ಹೇಳಿದರು.
ಇದನ್ನೂ ಓದಿ: ದೇಶದಲ್ಲಿ 5ಜಿ ಸೇವೆಗಳ ಆರಂಭಕ್ಕೆ ತರಂಗಗುಚ್ಚ ಹಂಚಿಕೆ ಕುರಿತ ಪತ್ರ ಬಿಡುಗಡೆ: ಕೇಂದ್ರ ಐಟಿ ಖಾತೆ ಸಚಿವ ಅಶ್ವಿನ್ ವೈಷ್ಣವ್
ಟೆಲಿಕಾಂ ಕಂಪನಿಗಳು ಮೂಲಸೌಕರ್ಯಗಳನ್ನು ಸ್ಥಾಪಿಸುವಲ್ಲಿ ನಿರತವಾಗಿವೆ. 5G ಸೇವೆಗಳನ್ನು ಅಕ್ಟೋಬರ್‌ನೊಳಗೆ ಪ್ರಾರಂಭಿಸಬೇಕು. ಟೆಲಿಕಾಂ ಕೇಬಲ್‌ಗಳನ್ನು ಹಾಕುವುದು, ವಿದ್ಯುತ್ ಕಂಬಗಳು, ಬೀದಿ ಪೀಠೋಪಕರಣಗಳನ್ನು ಪ್ರವೇಶಿಸಲು ಶುಲ್ಕವನ್ನು ವಿಧಿಸುವ ಹೊಸ ರೈಟ್ ಆಫ್ ವೇ ನಿಯಮಗಳನ್ನು ಸಹ ಸರ್ಕಾರವು ಅಧಿಸೂಚನೆ ಮಾಡಿದೆ.
ಇಂಡಿಯನ್ ಟೆಲಿಗ್ರಾಫ್ ರೈಟ್ ಆಫ್ ವೇ(ತಿದ್ದುಪಡಿ) ನಿಯಮಗಳು 2022ರ ಪ್ರಕಾರ, ಟೆಲಿಕಾಂ ಕಂಪನಿಗಳು ಖಾಸಗಿ ಆಸ್ತಿಗಳ ಮೇಲೆ ಕೇಬಲ್‌ಗಳನ್ನು ಹಾಕಲು, ಮೊಬೈಲ್ ಟವರ್‌ಗಳು ಅಥವಾ ಕಂಬಗಳನ್ನು ಸ್ಥಾಪಿಸಲು ಅಧಿಕಾರಿಗಳಿಂದ ಯಾವುದೇ ಅನುಮೋದನೆಯ ಅಗತ್ಯವಿರುವುದಿಲ್ಲ.