ನವದೆಹಲಿ: ಭಾರತದ ಅತಿದೊಡ್ಡ ಫಿನ್ಟೆಕ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಒಂದಾದ PhonePe ವಾಲ್‌ಮಾರ್ಟ್‌ನಿಂದ 200 ಮಿಲಿಯನ್ ಡಾಲರ್ ಹೆಚ್ಚುವರಿ ಬಂಡವಾಳ ನಿಧಿ ಪಡೆದಿದ್ದು ಇದರೊಂದಿಗೆ PhonePe ದೇಶದ ಅತ್ಯಂತ ಮೌಲ್ಯಯುತವಾದ ಫಿನ್ಟೆಕ್ ಕಂಪನಿಯಾಗಿದೆ.
ಹೊಸ ನಿಧಿಯು 1 ಶತಕೋಟಿ ಡಾಲರ್ ನಿಧಿಸಂಗ್ರಹಣೆಯ ಭಾಗವಾಗಿ ಬರುತ್ತದೆ. ಇದರೊಂದಿಗೆ ಕಂಪನಿಯು ಅನೇಕ ಜಾಗತಿಕ ಹೂಡಿಕೆದಾರರಿಂದ 650 ಮಿಲಿಯನ್ ಡಾಲರ್ ಸಂಗ್ರಹಿಸಿದೆ ಎಂದು PhonePe ಹೇಳಿಕೆಯಲ್ಲಿ ತಿಳಿಸಿದೆ. ಯುಪಿಐ ಲೈಟ್ ಮತ್ತು ಯುಪಿಐ ಮೇಲಿನ ಕ್ರೆಡಿಟ್ ಸೇರಿದಂತೆ ಭಾರತದಲ್ಲಿ ಯುಪಿಐ ಪಾವತಿಗಳನ್ನು ಅಭಿವೃದ್ಧಿಪಡಿಸಲು ಫೋನ್‌ಪೇಗೆ ಈ ನಿಧಿಯು ಸಹಾಯ ಮಾಡುತ್ತದೆ.
ವಿಮೆ, ಸಂಪತ್ತು ನಿರ್ವಹಣೆ, ಸಾಲ ನೀಡಿಕೆ, ಸ್ಟಾಕ್ ಬ್ರೋಕಿಂಗ್, ONDC ಆಧಾರಿತ ವ್ಯಾಪಾರ ಮತ್ತು ಖಾತೆ ಸಂಗ್ರಾಹಕಗಳಂತಹ ಹೊಸ ವ್ಯವಹಾರಗಳನ್ನು ನಿರ್ಮಿಸಲು ಮತ್ತು ವಿಸ್ತರಿಸಲು ಕಂಪನಿಯು ಈ ಹಣವನ್ನು ಸಂಗ್ರಹಿಸಿದೆ.
PhonePe ನ CEO ಮತ್ತು ಸಂಸ್ಥಾಪಕರಾದ ಸಮೀರ್ ನಿಗಮ್, 'ನಮ್ಮ ಬಹುಪಾಲು ಹೂಡಿಕೆದಾರರಾದ ವಾಲ್‌ಮಾರ್ಟ್‌ಗೆ ನಾವು ಧನ್ಯವಾದ ಹೇಳಲು ಬಯಸುತ್ತೇವೆ. ಅವರು ಯಾವಾಗಲೂ ನಮ್ಮ ದೀರ್ಘಕಾಲೀನ ಆಕಾಂಕ್ಷೆಗಳನ್ನು ಬೆಂಬಲಿಸುತ್ತಿದ್ದಾರೆ. ನಾವು ಭಾರತೀಯ ಗ್ರಾಹಕರು ಮತ್ತು ವ್ಯಾಪಾರಿಗಳಿಗೆ ಹೊಸ ಕೊಡುಗೆಗಳನ್ನು ನಿರ್ಮಿಸುತ್ತಿರುವುದರಿಂದ ನಮ್ಮ ಬೆಳವಣಿಗೆಯ ಮುಂದಿನ ಹಂತದ ಬಗ್ಗೆ ನಾವು ಉತ್ಸುಕರಾಗಿದ್ದೇವೆ, ಜೊತೆಗೆ ರಾಷ್ಟ್ರದಾದ್ಯಂತ ಆರ್ಥಿಕ ಸೇರ್ಪಡೆಯನ್ನು ಸಕ್ರಿಯಗೊಳಿಸುತ್ತೇವೆ ಎಂದರು.
ವಾಲ್‌ಮಾರ್ಟ್ ಇಂಟರ್‌ನ್ಯಾಷನಲ್‌ನ ಅಧ್ಯಕ್ಷ ಮತ್ತು ಸಿಇಒ ಜುಡಿತ್ ಮೆಕೆನ್ನಾ, 'ಫೋನ್‌ಪೇ ಭವಿಷ್ಯದ ಬಗ್ಗೆ ನಾವು ಉತ್ಸುಕರಾಗಿದ್ದೇವೆ. ಭಾರತವು ವಿಶ್ವದ ಅತ್ಯಂತ ಡಿಜಿಟಲ್ ಮತ್ತು ವೇಗವಾಗಿ ಬೆಳೆಯುತ್ತಿರುವ ಆರ್ಥಿಕತೆಗಳಲ್ಲಿ ಒಂದಾಗಿದೆ, ಮತ್ತು ಫೋನ್‌ಪೇಗೆ ಬೆಂಬಲವನ್ನು ಮುಂದುವರಿಸುವ ಅವಕಾಶವನ್ನು ನಾವು ಹೊಂದಿದ್ದೇವೆ ಎಂದರು.