ವಾಷಿಂಗ್ಟನ್ ಡಿ. ಸಿ. (ಅಮೆರಿಕ): ಅಮೆರಿಕ ಅಂದರೆ ದೊಡ್ಡಣ, ಇಡೀ ವಿಶ್ವಕ್ಕೇ ಸಾಲ ಕೊಡೋ ದೇಶ ಅನ್ಕೊಂಡಿದ್ರೆ ಅದು ನಿಮ್ಮ ತಪ್ಪು ಕಲ್ಪನೆ! ಹೌದು, ಇಡೀ ವಿಶ್ವದಲ್ಲೇ ಅತಿ ಹೆಚ್ಚು ಸಾಲ ಮಾಡಿರುವ ದೇಶ ಅಂದರೆ ಅದು ಅಮೆರಿಕ. ಅಮೆರಿಕದ ಒಟ್ಟು ರಾಷ್ಟ್ರೀಯ ಸಾಲವು ಪ್ರಸ್ತುತ $40,000,000,000,000 (40 ಟ್ರಿಲಿಯನ್ ಡಾಲರ್) ಅಂದರೆ ಭಾರತೀಯ ರೂಪಾಯಿಯಲ್ಲಿ 3,828.71 ಲಕ್ಷ ಕೋಟಿ! ಈ ಮೂಲಕ ಹೊಸದೊಂದು ಆತಂಕಕಾರಿ ಮೈಲಿಗಲ್ಲನ್ನು ಅಮೇರಿಕ ಮುಟ್ಟಿದೆ ಎಂದು ಅಮೆರಿಕದ ಖಜಾನೆ ಇಲಾಖೆ ತಿಳಿಸಿದೆ. ಅದರಲ್ಲೂ, ಕಳೆದ ಕೇವಲ 10 ವರ್ಷಗಳಲ್ಲಿ (2016 ರಿಂದ 2026) ಸಾಲದ ಹೊರೆ ಬರೋಬ್ಬರಿ ಎರಡು ಪಟ್ಟು ಹೆಚ್ಚಾಗಿದೆ. ಅಂದ್ರೆ 2017ರ ಆರಂಭದಲ್ಲಿ ಅಮೆರಿಕದ ಒಟ್ಟು ಸಾಲ ಕೇವಲ 19.9 ಟ್ರಿಲಿಯನ್ ಡಾಲರ್ ಇತ್ತು. ಆ ಕುರಿತ ವರದಿ ಇಲ್ಲಿದೆ:
ಕೇವಲ 5 ತಿಂಗಳಲ್ಲೇ ಮತ್ತೊಂದು ಟ್ರಿಲಿಯನ್ ಹೆಚ್ಚಳ!
ಅಮೆರಿಕವು ಸಾಲ ಮಾಡುವ ವೇಗವು ಇತ್ತೀಚಿನ ದಿನಗಳಲ್ಲಿ ಅತ್ಯಂತ ಭಯಾನಕ ಮಟ್ಟಕ್ಕೆ ತಲುಪಿದೆ. ಅದರಂತೆ, ಕಳೆದ ಮಾರ್ಚ್ ನಲ್ಲಿ 39 ಟ್ರಿಲಿಯನ್ ಡಾಲರ್ ಇದ್ದ ಅಮೆರಿಕದ ಸಾಲದ ಪ್ರಮಾಣ ಆಗಸ್ಟ್ ತಿಂಗಳಿನಲ್ಲಿ ಅಂದರೆ ಕೇವಲ 5 ತಿಂಗಳ ಅವಧಿಯಲ್ಲಿ 1 ಟ್ರಿಲಿಯನ್ ಡಾಲರ್ (ಅಂದರೆ ಸುಮಾರು 84 ಲಕ್ಷ ಕೋಟಿ ರೂಪಾಯಿ) ಹೆಚ್ಚಳವಾಗಿ 40 ಟ್ರಿಲಿಯನ್ ದಾಟಿದೆ. ಅದರಂತೆ, ಪ್ರಸ್ತುತ ಅಮೆರಿಕ ಸರ್ಕಾರವು ಪ್ರತಿ 5 ತಿಂಗಳಿಗೊಮ್ಮೆ 1 ಟ್ರಿಲಿಯನ್ ಡಾಲರ್ ಸಾಲವನ್ನು ತನ್ನ ಖಾತೆಗೆ ಸೇರಿಸಿಕೊಳ್ಳುತ್ತಿದೆ.
ಅಮೆರಿಕ ಸಾಲದ ಹೊರೆ ದುಪ್ಪಟ್ಟಾಗಲು ಪ್ರಮುಖ ಕಾರಣಗಳೇನು?
ಕಳೆದ ಹತ್ತು ವರ್ಷಗಳಲ್ಲಿ ಡೊನಾಲ್ಡ್ ಟ್ರಂಪ್ ಮತ್ತು ಜೋ ಬೈಡನ್ ಇಬ್ಬರ ಆಡಳಿತಾವಧಿಯಲ್ಲೂ ಸಾಲದ ಪ್ರಮಾಣ ನಿರಂತರವಾಗಿ ಏರುತ್ತಲೇ ಸಾಗಿದೆ:
ಕೋವಿಡ್-19 ಸಾಂಕ್ರಾಮಿಕ: ಕೊರೊನಾ ಸಮಯದಲ್ಲಿ ಜಾರಿಗೆ ತಂದ ಭಾರಿ ಆರ್ಥಿಕ ಪ್ಯಾಕೇಜ್ಗಳು ಮತ್ತು ಉಚಿತ ಸೌಲಭ್ಯಗಳಿಂದಾಗಿ ಸಾಲದ ಪ್ರಮಾಣ ದಿಢೀರ್ ಏರಿಕೆ ಕಂಡಿತು.
ತೆರಿಗೆ ಕಡಿತಗಳು: ಸರ್ಕಾರಗಳು ಜಾರಿಗೆ ತಂದ ಭಾರಿ ಪ್ರಮಾಣದ ಕಾರ್ಪೊರೇಟ್ ಮತ್ತು ವೈಯಕ್ತಿಕ ತೆರಿಗೆ ಕಡಿತಗಳಿಂದಾಗಿ ಸರ್ಕಾರದ ಆದಾಯ ಭಾರಿ ಪ್ರಮಾಣದಲ್ಲಿ ಕುಸಿಯಿತು.
ಯುದ್ಧ ಮತ್ತು ಮಿಲಿಟರಿ ವೆಚ್ಚಗಳು: ಇತ್ತೀಚಿನ ಇರಾನ್ ಸಂಘರ್ಷ ಸೇರಿದಂತೆ ರಕ್ಷಣಾ ವಲಯಕ್ಕೆ ಅಮೆರಿಕ ನಿರಂತರವಾಗಿ ಮಾಡುತ್ತಿರುವ ಭಾರಿ ವೆಚ್ಚಗಳು.
ಸುಪ್ರೀಂ ಕೋರ್ಟ್ ತೀರ್ಪು ಮತ್ತು ಮರುಪಾವತಿ: ಸುಪ್ರೀಂ ಕೋರ್ಟ್ ಇತ್ತೀಚೆಗೆ ಅಧ್ಯಕ್ಷ ಟ್ರಂಪ್ ಅವರ ಕೆಲವು ಸುಂಕಗಳನ್ನು ಕಾನೂನುಬಾಹಿರ ಎಂದು ರದ್ದುಗೊಳಿಸಿದ್ದರಿಂದ, ಸರ್ಕಾರವು ಅನಿವಾರ್ಯವಾಗಿ ಸುಮಾರು 100 ಬಿಲಿಯನ್ ಡಾಲರ್ ಆಮದು ತೆರಿಗೆಯನ್ನು ಮರುಪಾವತಿ ಮಾಡಬೇಕಾಗಿ ಬಂದಿತು.
ಮುಂದೆ ಕಾಯ್ದಿದೆ ದೊಡ್ಡ ಗಂಡಾಂತರ?
ಅಮೆರಿಕದ ಕಾಂಗ್ರೆಸ್ ನಿಗದಿಪಡಿಸಿರುವ ಗರಿಷ್ಠ ಸಾಲದ ಮಿತಿ 41.1 ಟ್ರಿಲಿಯನ್ ಡಾಲರ್ ಆಗಿದೆ. ಪ್ರಸ್ತುತ ವೇಗವನ್ನು ನೋಡಿದರೆ 2027ರ ಮಧ್ಯಭಾಗದ ವೇಳೆಗೆ ಅಮೆರಿಕವು ಈ ಸಾಲದ ಗಡಿಯನ್ನು ಮುಟ್ಟಲಿದ್ದು, ಸಂಸತ್ತು ಮತ್ತೆ ಸಾಲದ ಮಿತಿಯನ್ನು ಹೆಚ್ಚಿಸದಿದ್ದರೆ ಅಮೆರಿಕ ಸರ್ಕಾರಿ ವ್ಯವಸ್ಥೆ ಸಂಪೂರ್ಣ ಸ್ಥಗಿತಗೊಳ್ಳುವ ಭೀತಿ ಎದುರಾಗಲಿದೆ.
ಅತಿ ಹೆಚ್ಚು ಸಾಲ ಮಾಡಿರುವ ಟಾಪ್ 5 ದೇಶಗಳು ಯಾವುವು?
ಅಮೆರಿಕ: ಬರೋಬ್ಬರಿ 40 ಟ್ರಿಲಿಯನ್ ಡಾಲರ್ ಸಾಲದೊಂದಿಗೆ ಮೊದಲ ಸ್ಥಾನದಲ್ಲಿದೆ. ಇದರ ಸಾಲವು ದೇಶದ ಒಟ್ಟು ಜಿಡಿಪಿಯ (GDP) ಶೇಕಡಾ 120 ಕ್ಕಿಂತ ಹೆಚ್ಚಾಗಿದೆ.
ಚೀನಾ: ಸುಮಾರು 15 ಟ್ರಿಲಿಯನ್ ಡಾಲರ್ ಸಾಲದೊಂದಿಗೆ ಎರಡನೇ ಸ್ಥಾನದಲ್ಲಿದೆ.
ಜಪಾನ್: ಸುಮಾರು 13 ಟ್ರಿಲಿಯನ್ ಡಾಲರ್ ಸಾಲದೊಂದಿಗೆ ಮೂರನೇ ಸ್ಥಾನದಲ್ಲಿದೆ.
ಯುನೈಟೆಡ್ ಕಿಂಗ್ಡಮ್: ಸುಮಾರು 3.4 ಟ್ರಿಲಿಯನ್ ಡಾಲರ್ ಸಾಲ ಹೊಂದಿದೆ.
ಫ್ರಾನ್ಸ್: ಸುಮಾರು 3.3 ಟ್ರಿಲಿಯನ್ ಡಾಲರ್ ಸಾಲದೊಂದಿಗೆ ಐದನೇ ಸ್ಥಾನದಲ್ಲಿದೆ.
ಹಾಗಾದರೆ, ಭಾರತದ ಸಾಲದ ಪರಿಸ್ಥಿತಿ ಹೇಗಿದೆ?
ಭಾರತದ ಒಟ್ಟು ರಾಷ್ಟ್ರೀಯ ಸಾಲವು ಸುಮಾರು 3 ಟ್ರಿಲಿಯನ್ ಡಾಲರ್ (ಅಂದಾಜು ₹250 ಲಕ್ಷ ಕೋಟಿ ರೂಪಾಯಿ) ಹತ್ತಿರ ಇದೆ. ಭಾರತದ ಸಾಲ ಮತ್ತು ಜಿಡಿಪಿ ಅನುಪಾತವು ಪ್ರಸ್ತುತ ಶೇಕಡಾ 81 ರಿಂದ 83 ರ ಆಸುಪಾಸಿನಲ್ಲಿದೆ. ಅಭಿವೃದ್ಧಿ ಹೊಂದುತ್ತಿರುವ ದೊಡ್ಡ ಆರ್ಥಿಕತೆಗಳಿಗೆ ಹೋಲಿಸಿದರೆ ಭಾರತದ ಸಾಲದ ಪರಿಸ್ಥಿತಿಯು ಅಮೆರಿಕ ಅಥವಾ ಜಪಾನ್ ದೇಶಗಳಿಗಿಂತ ಸಾಕಷ್ಟು ಸುರಕ್ಷಿತ ಮತ್ತು ನಿಯಂತ್ರಣದಲ್ಲಿದೆ ಎಂದು ಅಂತರರಾಷ್ಟ್ರೀಯ ಹಣಕಾಸು ಸಂಸ್ಥೆಗಳು ವಿಶ್ಲೇಷಿಸುತ್ತವೆ.