Flat Buying Guide: ಬೆಂಗಳೂರು, ಪುಣೆ, ಹೈದರಾಬಾದ್ ಎಲ್ಲೆಡೆ ಒಂದೇ ಮಾತು. "ಸರ್ ನಮ್ಮದು ಪ್ರಿ-ಲಾಂಚ್ ಆಫರ್. ಮಾರ್ಕೆಟ್ ರೇಟ್‌ಗಿಂತ 7 ಲಕ್ಷ ಕಡಿಮೆ ಇದೆ. ಇವತ್ತು ಬುಕ್ ಮಾಡಿದ್ರೆ ಮಾತ್ರ ಈ ರೇಟ್."ಈ ಒಂದು ವಾಕ್ಯ ಕೇಳಿದ ತಕ್ಷಣ ನಮ್ಮ ಕಣ್ಣು ಮಿನುಗುತ್ತೆ. ಮನಸ್ಸು ಲೆಕ್ಕ ಹಾಕೋಕೆ ಶುರು ಮಾಡುತ್ತೆ. ತಿಂಗಳಿಗೆ 5 ಸಾವಿರ EMI ಕಡಿಮೆ ಆಗುತ್ತಲ್ಲಾ ಅಂತ. ಆದ್ರೆ ಸ್ವಲ್ಪ ನಿಂತು ಯೋಚಿಸಿ. ಸಿಮೆಂಟ್, ಸ್ಟೀಲ್, ಜಮೀನು, ಲೇಬರ್ ಎಲ್ಲಾ ಬಿಲ್ಡರ್‌ಗೂ ಒಂದೇ ದರ ಇದ್ದಾಗ, ಒಬ್ಬರು ಮಾತ್ರ ಅಷ್ಟು ಕಡಿಮೆಗೆ ಯಾಕೆ ಕೊಡ್ತಿದ್ದಾರೆ?ಅಗ್ಗದ ಫ್ಲಾಟ್‌ನ ಹಿಂದೆ ಇರೋದು ಆಫರ್ ಅಲ್ಲ, ಬಲೆ. ಮತ್ತು ಈ ಬಲೆಗೆ ಬಿದ್ದು 20 ವರ್ಷ EMI ಕಟ್ಟಿ ಕೊನೆಗೆ ಕೋರ್ಟ್ ಮೆಟ್ಟಿಲೇರಿದ ಕುಟುಂಬಗಳು ನೂರಾರು ಇವೆ. ಹಾಗಾಗಿ, ₹5 ಲಕ್ಷ ಉಳಿಸುವ ಆಸೆಯಲ್ಲಿ ಮುಂದೆ ₹20 ಲಕ್ಷ ನಷ್ಟ ಮಾಡಿಕೊಳ್ಳಬೇಡಿ. ಅದರಂತೆ, ಫ್ಲಾಟ್ ಖರೀದಿಸುವ ಮುನ್ನ ಈ ವಿಷಯಗಳನ್ನು ಖಂಡಿತ ಚೆಕ್ ಮಾಡಿಕೊಳ್ಳಿ...

RERA ರಿಜಿಸ್ಟ್ರೇಷನ್ ಇದೆಯಾ?

ಮೊದಲನೆಯದಾಗಿ ಯೋಜನೆಯ ರೇರಾ ನೋಂದಣಿ ಸಂಖ್ಯೆಯನ್ನು ಕಡ್ಡಾಯವಾಗಿ ಪರಿಶೀಲಿಸಬೇಕು. ಸರ್ಕಾರಿ ರೇರಾ ವೆಬ್‌ಸೈಟ್‌ನಲ್ಲಿ ಕಟ್ಟಡ ನಿರ್ಮಾಣದ ವಿವರ, ಬ್ಯಾಂಕ್ ಸಾಲ ಸೌಲಭ್ಯ ಹಾಗೂ ಯೋಜನೆ ಪೂರ್ಣಗೊಳ್ಳುವ ದಿನಾಂಕದ ಮಾಹಿತಿ ಸಿಗುತ್ತದೆ. ಇದು ನಿಮ್ಮ ಹೂಡಿಕೆಗೆ ಸುರಕ್ಷತೆಯನ್ನು ಒದಗಿಸುತ್ತದೆ. ಅದರಂತೆ, RERA ಇಲ್ಲದ ಪ್ರಾಜೆಕ್ಟ್‌ನಲ್ಲಿ 1 ರೂಪಾಯಿ ಕೂಡ ಕೊಡಬೇಡಿ.

ಎರಡನೆಯದಾಗಿ ಸ್ಥಳೀಯ ಸಂಸ್ಥೆಗಳಿಂದ ಸಿಗುವ ಖಾತಾ ಮತ್ತು ಟೈಟಲ್ ಡೀಡ್ ಪರಿಶೀಲನೆ ಅತ್ಯಂತ ಪ್ರಮುಖ. ಬೆಂಗಳೂರಿನಂತಹ ನಗರಗಳಲ್ಲಿ ಎ ಖಾತಾ ಹೊಂದಿರುವ ಆಸ್ತಿಗಳಿಗೆ ಮಾತ್ರ ಕಾನೂನುಬದ್ಧ ಆದ್ಯತೆ ಸಿಗುತ್ತದೆ. ಬಿ ಖಾತಾ ಅಥವಾ ಸರಿಯಾದ ಮಾಲೀಕತ್ವದ ಹಕ್ಕು ಇಲ್ಲದಿದ್ದಲ್ಲಿ ಭವಿಷ್ಯದಲ್ಲಿ ಬ್ಯಾಂಕ್ ಸಾಲ ಪಡೆಯಲು ಮತ್ತು ಮನೆ ಮಾರಾಟ ಮಾಡಲು ತೊಂದರೆಯಾಗುತ್ತದೆ.

ಮೂರನೆಯ ಪ್ರಮುಖ ಅಂಶವೆಂದರೆ ಸಿಸಿ ಅಂದರೆ ಕಮೆನ್ಸ್‌ಮೆಂಟ್ ಸರ್ಟಿಫಿಕೇಟ್ ಮತ್ತು ಓಸಿ ಅಂದರೆ ಅಕ್ಯುಪೆನ್ಸಿ ಸರ್ಟಿಫಿಕೇಟ್. ನಿಯಮಾವಳಿಗಳ ಪ್ರಕಾರವೇ ಕಟ್ಟಡ ನಿರ್ಮಿಸಲಾಗಿದೆ ಎಂಬುದಕ್ಕೆ ಸಿಸಿ ಸಾಕ್ಷಿಯಾದರೆ, ಕಾಮಗಾರಿ ಪೂರ್ಣಗೊಂಡ ನಂತರ ಅದು ವಾಸಿಸಲು ಯೋಗ್ಯವಾಗಿದೆ ಎಂದು ನೀಡುವ ಪತ್ರವೇ ಓಸಿ. ಓಸಿ ಇಲ್ಲದ ಕಟ್ಟಡಗಳಿಗೆ ನೀರು ಮತ್ತು ವಿದ್ಯುತ್ ಸಂಪರ್ಕ ಪಡೆಯುವುದು ಕಷ್ಟವಾಗುತ್ತದೆ.

ನಾಲ್ಕನೆಯದಾಗಿ ಆಸ್ತಿಯ ಮೇಲೆ ಯಾವುದೇ ಹಳೆಯ ಸಾಲ ಅಥವಾ ಕೋರ್ಟ್ ಕೇಸ್‌ಗಳು ಇಲ್ಲದಿರುವುದನ್ನು ಖಚಿತಪಡಿಸಿಕೊಳ್ಳಲು ಕನಿಷ್ಠ ಮೂವತ್ತು ವರ್ಷಗಳ ಋಣಭಾರ ಪ್ರಮಾಣಪತ್ರವನ್ನು ಪರಿಶೀಲಿಸಬೇಕು.

ಅಂತಿಮವಾಗಿ ಬಿಲ್ಡರ್‌ಗಳು ನೀಡುವ ಸೂಪರ್ ಬಿಲ್ಟ್ ಅಪ್ ಏರಿಯಾ ಬದಲು ನಿಮಗೆ ನಿಜವಾಗಿ ವಾಸಿಸಲು ಸಿಗುವ ಕಾರ್ಪೆಟ್ ಏರಿಯಾವನ್ನು ಲೆಕ್ಕ ಹಾಕಿ ಬೆಲೆಯನ್ನು ಹೋಲಿಕೆ ಮಾಡುವುದು ಸೂಕ್ತ.