ಮುಂಬೈ: ಕಳೆದ ಕೆಲ ದಿನಗಳಿಂದ ಚೇತೋಹಾರಿ ವಹಿವಾಟು ನಡೆಸುತ್ತಿದ್ದ ಷೇರುಮಾರುಕಟ್ಟೆ ಇಂದು ದಿಢೀರ್ ಭಾರಿ ಪ್ರಮಾಣದ ಕುಸಿತ ಕಂಡಿದ್ದು, ಮಾರುಕಟ್ಟೆಯ ಇಂದಿನ ಕುಸಿತಕ್ಕೆ ಪ್ರಧಾನಿ ನರೇಂದ್ರ ಮೋದಿ ಅವರ ಆ ಒಂದೇ ಒಂದು ಮಾತು ಕಾರಣ ಎನ್ನಲಾಗಿದೆ.

ಹೌದು.. ಭಾರತೀಯ ಷೇರು ಮಾರುಕಟ್ಟೆಯ ಪ್ರಮುಖ ಸೂಚ್ಯಂಕಗಳು ಸೋಮವಾರ ರೆಡ್ ನಲ್ಲಿ ಆರಂಭವಾಗಿದ್ದು, ಭೌಗೋಳಿಕ ರಾಜಕೀಯ ಉದ್ವಿಗ್ನತೆ, ಏರುತ್ತಿರುವ ಕಚ್ಚಾ ತೈಲ ಬೆಲೆಗಳು ಮತ್ತು ವಿದೇಶಿ ವಿನಿಮಯ ಹೊರಹರಿವಿನ ಕುರಿತ ಆತಂಕಗಳು ಹೂಡಿಕೆದಾರರ ಮನೋಭಾವದ ಮೇಲೆ ಒತ್ತಡ ತಂದಿವೆ. ಪರಿಣಾಮ ಷೇರುಮಾರುಕಟ್ಟೆಯ ಉಭಯ ಸೂಚ್ಯಂಕಗಳು ಅಂದರೆ ಸೆನ್ಸೆಕ್ಸ್ ಮತ್ತು ನಿಫ್ಟಿ ದಿನದ ಆರಂಭಿಕ ವಹಿವಾಟನಲ್ಲೇ ಭಾರಿ ಅಂಶಗಳನ್ನು ಕಳೆದುಕೊಂಡಿದೆ.

30 ಷೇರುಗಳನ್ನು ಒಳಗೊಂಡಿರುವ BSE Sensex 76,378.03 ಅಂಕಗಳಲ್ಲಿ ಆರಂಭವಾಗಿ, 950.16 ಅಂಕಗಳು ಅಥವಾ 1.23 ಶೇಕಡಾ ಕುಸಿತ ಕಂಡಿತು. ಇದೇ ವೇಳೆ, NIFTY 50 275.90 ಅಂಕಗಳು ಅಥವಾ 1.14 ಶೇಕಡಾ ಇಳಿಕೆಯಿಂದ 23,900.25 ಅಂಕಗಳಿಗೆ ತಲುಪಿತು.

ಹೂಡಿಕೆದಾರರ ಮನೋಭಾವ ದುರ್ಬಲವಾಗಿದ್ದು, ಜಾಗತಿಕ ಹಾಗೂ ದೇಶೀಯ ಆತಂಕಗಳು ಮಾರುಕಟ್ಟೆಯಲ್ಲಿ ವ್ಯಾಪಕ ಮಾರಾಟಕ್ಕೆ ಕಾರಣವಾದವು. ಏರುತ್ತಿರುವ ಕಚ್ಚಾ ತೈಲದ ಬೆಲೆಗಳು ದರ ಏರಿಕೆ ಮತ್ತು ಹೆಚ್ಚಿದ ಆಮದು ವೆಚ್ಚದ ಭೀತಿಯನ್ನು ಹುಟ್ಟಿಸಿದರೆ, ವಾಲ್ ಸ್ಟ್ರೀಟ್ ಫ್ಯೂಚರ್ಸ್‌ನ ದುರ್ಬಲ ಸೂಚನೆಗಳು ಏಷ್ಯನ್ ಮಾರುಕಟ್ಟೆಗಳಲ್ಲೂ ಎಚ್ಚರಿಕೆಯ ವಾತಾವರಣವನ್ನು ಉಂಟುಮಾಡಿದವು.

ಈ ನಡುವೆ, ಜಾಗತಿಕ ವ್ಯಾಪಾರ ಮತ್ತು ಬಂಡವಾಳ ಹರಿವಿನ ಮೇಲೆ ಪರಿಣಾಮ ಬೀರುವ ಭೌಗೋಳಿಕ ಬೆಳವಣಿಗೆಗಳ ಮೇಲೂ ಹೂಡಿಕೆದಾರರು ಕಣ್ಣಿಟ್ಟಿದ್ದರು.

ಚಿನ್ನಾಭರಣ ಖರೀದಿ ಕುರಿತು ಪ್ರಧಾನಿ ನರೇಂದ್ರ ಮೋದಿ ಮಾತು

ಪ್ರಧಾನಮಂತ್ರಿ ನರೇಂದ್ರ ಮೋದಿ ದೇಶದ ವಿದೇಶಿ ವಿನಿಮಯ ಸಂಗ್ರಹವನ್ನು ಉಳಿಸಲು ನಾಗರಿಕರಿಗೆ ಮನವಿ ಮಾಡಿದ ಬಳಿಕ ಆಭರಣ ವಲಯದ ಷೇರುಗಳು ತೀವ್ರ ಮಾರಾಟದ ಒತ್ತಡಕ್ಕೆ ಒಳಗಾದವು.

ಭಾನುವಾರ ಸಾರ್ವಜನಿಕರನ್ನುದ್ದೇಶಿಸಿ ಮಾತನಾಡಿದ್ದ ಪ್ರಧಾನಿ ಮೋದಿ, 'ಅನಗತ್ಯ ವಿದೇಶ ಪ್ರವಾಸ, ವಿದೇಶಗಳಲ್ಲಿ ನಡೆಯುವ ಮದುವೆಗಳು ಮತ್ತು ಪ್ರವಾಸಗಳನ್ನು ತಪ್ಪಿಸುವಂತೆ ಮನವಿ ಮಾಡಿದರು. ಅಲ್ಲದೆ ದೇಶೀಯ ಪ್ರವಾಸೋದ್ಯಮವನ್ನು ಉತ್ತೇಜಿಸುವಂತೆ ಅವರು ಕರೆ ನೀಡಿದರು.

ಇದಲ್ಲದೆ, ವಿದೇಶಿ ವಿನಿಮಯ ಹೊರಹರಿವಿನ ಮೇಲಿನ ಒತ್ತಡವನ್ನು ಕಡಿಮೆ ಮಾಡಲು ಒಂದು ವರ್ಷದವರೆಗೆ ಅನಗತ್ಯ ಚಿನ್ನದ ಖರೀದಿಯನ್ನು ತಪ್ಪಿಸುವಂತೆ ಜನರನ್ನು ಅವರು ವಿನಂತಿಸಿದರು.

ಆಭರಣ ಸ್ಟಾಕ್ ಗಳ ಮೌಲ್ಯ ಭಾರಿ ಇಳಿಕೆ

ಪ್ರಧಾನಿ ನರೇಂದ್ರ ಮೋದಿ ಅವರ ಈ ಹೇಳಿಕೆಯ ನಂತರ ಪ್ರಮುಖ ಆಭರಣ ಕಂಪನಿಗಳ ಷೇರುಗಳು ಆರಂಭಿಕ ವಹಿವಾಟಿನಲ್ಲಿ ಭಾರೀ ಕುಸಿತ ಕಂಡವು. Senco Gold Limited ಷೇರುಗಳು 8.98 ಶೇಕಡಾ ಕುಸಿದು ರೂ. 332.60ಕ್ಕೆ ಕುಸಿದರೆ, Titan Company Limited ಷೇರುಗಳು 5.34 ಶೇಕಡಾ ಇಳಿದು ರೂ. 4,268.10ಕ್ಕೆ ತಲುಪಿದವು.

ಅಂತೆಯೇ Kalyan Jewellers India Limited ಷೇರುಗಳು 7.43 ಶೇಕಡಾ ಕುಸಿದು ರೂ. 393.00ಕ್ಕೆ ವಹಿವಾಟು ನಡೆಸುತ್ತಿವೆ. ಇದೇ ವೇಳೆ, PC Jeweller Limited ಷೇರುಗಳು 3.89 ಶೇಕಡಾ ಇಳಿದು ರೂ. 9.13ಕ್ಕೆ ತಲುಪಿದವು.

ಪ್ರಧಾನಮಂತ್ರಿಗಳ ಮನವಿಯ ಪರಿಣಾಮವಾಗಿ ಚಿನ್ನ ಮತ್ತು ಆಭರಣಗಳ ಬೇಡಿಕೆ ಸಮೀಪದ ಅವಧಿಯಲ್ಲಿ ಕುಗ್ಗಬಹುದು ಎಂಬ ಆತಂಕ ಹೂಡಿಕೆದಾರರಲ್ಲಿ ಮೂಡಿದೆ ಎಂದು ವಿಶ್ಲೇಷಕರು ಅಭಿಪ್ರಾಯಪಟ್ಟಿದ್ದಾರೆ.

ಜಾಗತಿಕ ಮಟ್ಟದಲ್ಲಿ ಚಿನ್ನದ ಬೆಲೆಗಳು ಈಗಾಗಲೇ ಏರಿಕೆಯಾಗಿರುವ ಸಂದರ್ಭದಲ್ಲಿ, ಗ್ರಾಹಕರು ಐಷಾರಾಮಿ ಖರೀದಿಗಳನ್ನು ಕಡಿಮೆ ಮಾಡಿದರೆ ಖರ್ಚು ಮಾಡುವ ಸಾಮರ್ಥ್ಯಕ್ಕೂ ಪರಿಣಾಮ ಬೀಳಬಹುದು ಎಂಬ ಭಯವೂ ವಲಯದ ಮೇಲೆ ಒತ್ತಡ ತಂದಿದೆ.

ಮುಂದಿನ ಕೆಲವು ವಹಿವಾಟು ಅವಧಿಗಳಲ್ಲೂ ಮಾರುಕಟ್ಟೆಯಲ್ಲಿ ಅಸ್ಥಿರತೆ ಮುಂದುವರಿಯುವ ಸಾಧ್ಯತೆ ಇದೆ ಎಂದು ಮಾರುಕಟ್ಟೆ ತಜ್ಞರು ಹೇಳಿದ್ದಾರೆ. ಕಚ್ಚಾ ತೈಲದ ಬೆಲೆ ಚಲನೆ, ಜಾಗತಿಕ ಮಾರುಕಟ್ಟೆಗಳ ಧೋರಣೆ ಮತ್ತು ವಿದೇಶಿ ವಿನಿಮಯ ನಿರ್ವಹಣೆಗೆ ಸಂಬಂಧಿಸಿದ ನೀತಿ ಸೂಚನೆಗಳ ಮೇಲೆ ಹೂಡಿಕೆದಾರರು ಗಮನ ಹರಿಸಿದ್ದಾರೆ ಎನ್ನಲಾಗಿದೆ.