ಮುಂಬೈ: ಬಾಲಿವುಡ್ ನಟ ಹೃತಿಕ್ ರೋಶನ್ ಅವರೊಂದಿಗೆ ರಾಷ್ಟ್ರೀಯ ಪ್ರಶಸ್ತಿ ವಿಜೇತ ನಟಿ ಕಂಗನಾ ರನೌತ್ ಕಾನೂನು ಸಮರ ನಡೆಸುತ್ತಿರುವ ಹಿನ್ನಲೆಯಲ್ಲಿ ನಟಿಯ ತಂದೆ ಅಮರದೀಪ್ ರನೌತ್, ಮಗಳ ಎಲ್ಲ ಹೋರಾಟಗಳಲ್ಲೂ ಬೆಂಬಲ ನೀಡುವುದಾಗಿ ತಿಳಿಸಿದ್ದಾರೆ.
'ತನು ವೆಡ್ಸ್ ಮನು ರಿಟರ್ನ್ಸ್' ಚಿತ್ರಕ್ಕಾಗಿ ರಾಷ್ಟ್ರೀಯ ಪ್ರಶಸ್ತಿ ಪಡೆದ ಕಂಗನಾ ರನೌತ್ ಅದನ್ನು ಸ್ವೀಕರಿಸಲು ದೆಹಲಿಗೆ ಬಂದಾಗ ಅವರ ಕುಟುಂಬ ವರ್ಗದ ಜೊತೆಗೆ ಕಂಗನಾ ತಂದೆ ಕೂಡ ಜೊತೆಯಾಗಿದ್ದರು.
ಮಗಳ ಯಶಸ್ಸು ಮತ್ತು ಹೃತಿಕ್ ರೋಶನ್ ಜೊತೆಗಿನ ಕಾನೂನು ಸಮರದ ಬಗ್ಗೆ ಪ್ರತಿಕ್ರಿಯಿಸಿದ ಅಮರದೀಪ್ "ನನ್ನ ಮಗಳ ಸಾಧನೆಗಳ ಬಗ್ಗೆ ನನಗೆ ಹೆಮ್ಮೆಯಿದೆ. ಅವಳು ಜೀವನದ ಎಲ್ಲ ಆಯಾಮಗಳಲ್ಲೂ ಧೈರ್ಯ ತೋರಿದ್ದಾಳೆ ಮತ್ತು ಅವಳ ಕಾನೂನು ಸಮರದಲ್ಲೂ ಜೊತೆಗೆ ನಿಲ್ಲುತ್ತೇನೆ" ಎಂದಿದ್ದಾರೆ.
ಹೃತಿಕ್ ಅವರು ತಮ್ಮ ಹಳೆಯ ಬಾಯ್ ಫ್ರೆಂಡ್ ಆಗಿದ್ದರು ಎಂಬ ರೀತಿಯಲ್ಲಿ ಒಂದು ಸಂದರ್ಶನದಲ್ಲಿ ಮಾತನಾಡಿದ್ದ ಕಂಗನ "ಹಳೆಯ ಗೆಳೆಯರು ಗಮನ ಸೆಳೆಯಲು ತಿಕ್ಕಲು ಕೆಲಸಗಳನ್ನೇಕೆ ಮಾಡುತ್ತಾರೆ" ಎಂಬ ಹೇಳಿಕೆಯ ನಂತರ ಇಬ್ಬರೂ ನಟರ ನಡುವಿನ ಕಾಳಗ ತಾರಕಕ್ಕೇರಿ, ಪರಸ್ಪರ ಕಾನೂನು ನೋಟಿಸ್ ಗಳನ್ನು ಕಳುಹಿಸಿಕೊಂಡಿದ್ದರು.