ಉದ್ಯಮಿ ಲಲಿತ್ ಮೋದಿ ಅವರೊಂದಿಗಿನ ಸಂಬಂಧ ಬಹಿರಂಗವಾದಾಗ ಬಾಲಿವುಡ್ ನಟಿ ಸುಶ್ಮಿತಾ ಸೇನ್ ಅವರನ್ನು 'ಗೋಲ್ಡ್ ಡಿಗ್ಗರ್' ಎಂಬ ಟ್ಯಾಗ್ ನೀಡಿ ಟ್ರೋಲ್‌ ಮಾಡಲಾಗಿತ್ತು. ಈ ಟ್ರೋಲ್‌ಗಳಿಗೆ ನಟಿ ತಿರುಗೇಟು ನೀಡಿದ ನಾಲ್ಕು ವರ್ಷಗಳ ನಂತರ, ಇತ್ತೀಚಿನ ಸಂದರ್ಶನವೊಂದರಲ್ಲಿ ಲಲಿತ್ ಮೋದಿ, ಮಾಜಿ ವಿಶ್ವ ಸುಂದರಿಯನ್ನು ಸಮರ್ಥಿಸಿಕೊಂಡಿದ್ದಾರೆ. 'ಅವರು ಚಿನ್ನ ಅಗೆಯುವವಳು ಅಲ್ಲ; ನಾನು ವಜ್ರ ಅಗೆಯುವ' (She's not a gold digger; I am a diamond digger) ಎಂದು ಹೇಳಿದ್ದಾರೆ.

ನಮ್ಮ ಸಂಬಂಧ ಎಂದಿಗೂ ಹಣದ ಬಗ್ಗೆ ಆಗಿರಲಿಲ್ಲ. ಸುಶ್ಮಿತಾ ಸ್ವಾಭಿಮಾನಿ ಮತ್ತು ಶ್ರೀಮಂತ ಮಹಿಳೆ, ಅವರು ಎಂದಿಗೂ ಹಣವನ್ನು ಬೆನ್ನಟ್ಟಲಿಲ್ಲ ಎಂದು ಲಲಿತ್ ಮೋದಿ ಪ್ರತಿಪಾದಿಸಿದ್ದಾರೆ.

ಅವಲಂಬಿತ ಬಾಯ್‌ಫ್ರೆಂಡ್‌ನಂತೆ ನಾನಿದ್ದೆ

ಸುಶ್ಮಿತಾ ಸೇನ್ ಅವರನ್ನು ಗೋಲ್ಡ್ ಡಿಗ್ಗರ್ ಎಂದು ಕರೆದ ಟ್ರೋಲ್‌ಗಳ ವಿರುದ್ಧ ಕಿಡಿಕಾರಿದ ಅವರ ಪೋಸ್ಟ್ ಬಗ್ಗೆ ಕೇಳಿದಾಗ ಮೋದಿ, 'ಸುಶ್ಮಿತಾ ತುಂಬಾ ಸುಂದರಿ, ತುಂಬಾ ಶ್ರೀಮಂತ ಮಹಿಳೆ. ನಾನು ತಿಳಿದಿರುವಂತೆ ಈ ಗ್ರಹದಲ್ಲಿ ಎಲ್ಲರಿಗಿಂತ ಅವರ ಬಳಿ ಹೆಚ್ಚು ವಜ್ರಗಳಿವೆ. ಅವರು ತುಂಬಾ ಶ್ರೀಮಂತ ಮಹಿಳೆ. ಅವರು ಅದನ್ನು ಸ್ವತಃ ಸಂಪಾದಿಸಿದ್ದಾರೆ. ನಾನು ಅವರೊಂದಿಗೆ ಹೊರಗೆ ಹೋಗುತ್ತಿದ್ದಾಗ ಯಾವುದಕ್ಕೂ ನಾನು ಹಣ ನೀಡುತ್ತಿರಲಿಲ್ಲ. ಅವರೇ ಎಲ್ಲದಕ್ಕೂ ಹಣ ಕೊಡುತ್ತಿದ್ದರು. ನಾನು ಅವಲಂಬಿತ ಬಾಯ್‌ಫ್ರೆಂಡ್‌ನಂತೆ ಇದ್ದೆ. ಅವರು ಅದ್ಭುತ, ಸ್ವಾಭಿಮಾನ ಹೊಂದಿದ್ದ ಮಹಿಳೆ. ಸುಶ್ಮಿತಾ ಗೋಲ್ಡ್ ಡಿಗ್ಗರ್ ಅಲ್ಲ, ಲಲಿತ್ ಡೈಮಂಡ್ ಡಿಗ್ಗರ್ ಮತ್ತು ಆಕೆ ವಜ್ರ' ಎಂದರು.

'ಆಕೆ ಯಾರಿಂದಲೂ ಏನನ್ನೂ ಸ್ವೀಕರಿಸುವುದಿಲ್ಲ. ಆದ್ದರಿಂದ ಜನರು ಆಕೆಯನ್ನು ಗೋಲ್ಡ್ ಡಿಗ್ಗರ್ ಎಂದು ಕರೆಯುವುದು ಸಂಪೂರ್ಣವಾಗಿ ತಪ್ಪು' ಎಂದು ಅವರು ಹೇಳಿದರು.

'ನಾನದನ್ನು ಆಕೆಯ ಮುಂದೆಯೇ ಮಾಡಿದ್ದೇನೆ'

ಸುಶ್ಮಿತಾ ಸೇನ್ ಅವರೊಂದಿಗೆ ಇದ್ದಾಗಲೇ ನಮ್ಮ ಸಂಬಂಧದ ಬಗ್ಗೆ ಪೋಸ್ಟ್‌ವೊಂದನ್ನು ಹಂಚಿಕೊಂಡೆ ಎಂದು ಲಲಿತ್ ಮೋದಿ ಹೇಳಿದರು.

'ನಾನು ಆಕೆಯ ಮುಂದೆಯೇ ಪೋಸ್ಟ್ ಮಾಡಿದೆ. ನಾನು ಅದನ್ನು ಪೋಸ್ಟ್ ಮಾಡುತ್ತೇನೆ ಎಂದು ಅವರು ಭಾವಿಸಿರಲಿಲ್ಲ. ನಾವು ವಿಮಾನದಲ್ಲಿ ಯಾವುದೋ ವಿಷಯದ ಬಗ್ಗೆ ಜಗಳವಾಡುತ್ತಿದ್ದೆವು ಮತ್ತು ಅವರು, 'ನೀವು ಯಾವುದೇ ಕಾರಣಕ್ಕೂ ಇದನ್ನು ಪೋಸ್ಟ್ ಮಾಡುವುದಿಲ್ಲ' ಎಂದು ಹೇಳಿದರು. ನಾನು ನಕ್ಕು ಬಟನ್ ಒತ್ತಿದೆ.' ಎಂದರು.

ಆ ಸಮಯದಲ್ಲಿ ನಾವು ಲಂಡನ್‌ನಿಂದ ಹಿಂತಿರುಗುತ್ತಿದ್ದೆವು ಎಂದು ಮೋದಿ ನೆನಪಿಸಿಕೊಂಡರು. 'ನಾವು ಇಳಿಯುವ ಹೊತ್ತಿಗೆ, ಆ ಸುದ್ದಿ ಈಗಾಗಲೇ ದೊಡ್ಡ ಸಾರ್ವಜನಿಕ ಪ್ರತಿಕ್ರಿಯೆ ಮತ್ತು ವಿವಾದವನ್ನು ಸೃಷ್ಟಿಸಿತ್ತು. ಆದರೆ, ಅದರಲ್ಲಿ ಯಾವುದೇ ತಪ್ಪಿರಲಿಲ್ಲ. ಅದನ್ನು ತೆಗೆದುಹಾಕುವಂತೆ ಅವರು ಎಂದಿಗೂ ನನ್ನನ್ನು ಕೇಳಲಿಲ್ಲ ಮತ್ತು ನಾನು ಹಾಗೆ ಮಾಡಲು ಎಂದಿಗೂ ಯೋಚಿಸಲಿಲ್ಲ' ಎಂದರು.

'ಆ ಪೋಸ್ಟ್ ಅನ್ನು ಸಾರ್ವಜನಿಕವಾಗಿ ಹಂಚಿಕೊಂಡಿದ್ದಕ್ಕೆ ವಿಷಾದಿಸುವುದಿಲ್ಲ. ಅದು ಇಂಟರ್ನೆಟ್‌ನಲ್ಲಿ ವ್ಯಾಪಕ ಚರ್ಚೆಗೆ ಗ್ರಾಸವಾಯಿತು. ಕೆಲವು ದಿನಗಳವರೆಗೆ, ಎಲ್ಲರೂ ಅದರ ಬಗ್ಗೆಯೇ ಮಾತನಾಡುತ್ತಿದ್ದರು. ಆದರೆ, ನಮಗೆ ಒಂದು ಸುಂದರವಾದ ಕಥೆ ಇತ್ತು ಮತ್ತು ಅದರ ಬಗ್ಗೆ ನನಗೆ ಒಂದು ನಿಮಿಷವೂ ವಿಷಾದವಿಲ್ಲ' ಎಂದು ಅವರು ಹೇಳಿದರು.

'ಅವರಿನ್ನೂ ನನಗೆ ತುಂಬಾ ಒಳ್ಳೆಯ ಸ್ನೇಹಿತೆ'

'ಸುಷ್ಮಿತಾ ನನಗೆ ತುಂಬಾ ವಿಶೇಷರಾಗಿದ್ದರು. ಅವರು ತಾನು ಉತ್ತಮ ಅಥವಾ ಹೆಚ್ಚು ಪ್ರಬುದ್ಧ ವ್ಯಕ್ತಿಯಾಗಲು ಸಹಾಯ ಮಾಡಿದರು. ಅವರು ಅತ್ಯಂತ ವಿಶೇಷರಾಗಿದ್ದರು. ಆ ಸಮಯದಲ್ಲಿ ಅವರು ನನ್ನ ಜೀವನದ ಒಂದು ಭಾಗವಾಗಿದ್ದರು. ನಮ್ಮ ನಡುವಿನ ದೂರ ತುಂಬಾ ಹೆಚ್ಚಾಗಿತ್ತು. ಅವರ ವೃತ್ತಿಜೀವನ ಭಾರತದಲ್ಲಿತ್ತು, ನನ್ನ ಜೀವನ ಲಂಡನ್‌ನಲ್ಲಿತ್ತು. ಅದು ತುಂಬಾ ವಿಶೇಷವಾದ ಸಂಬಂಧವಾಗಿತ್ತು' ಎಂದು ಹೇಳಿದರು.

'ನನಗೆ ಅವರ ಬಗ್ಗೆ ಪ್ರೀತಿಯ ನೆನಪುಗಳಿವೆ. ನಾನು ಅವರಿಗೆ ಶುಭ ಹಾರೈಸುತ್ತೇನೆ. ಅವರು ಅದ್ಭುತ ಮಹಿಳೆ ಮತ್ತು ಅವರು ಹೆಣ್ಣುಮಕ್ಕಳಾದ ರೆನೀ ಮತ್ತು ಅಲಿಸಾ ಅವರಿಗೆ ಸಿಂಗಲ್ ಪೇರೆಂಟ್ ಆಗಿರುವುದು ಗಮನಾರ್ಹವಾಗಿದೆ' ಎಂದು ಮಾಜಿ ಐಪಿಎಲ್ ಅಧ್ಯಕ್ಷ ಹೇಳಿದರು.

ಟ್ರೋಲ್‌ಗಳಿಗೆ ಸುಶ್ಮಿತಾ ತಿರುಗೇಟು

2022ರಲ್ಲಿ ತಮ್ಮನ್ನು 'ಗೋಲ್ಡ್ ಡಿಗ್ಗರ್' ಎಂದು ಕರೆದ ಟ್ರೋಲ್‌ಗಳನ್ನು ಉದ್ದೇಶಿಸಿ ಸುಶ್ಮಿತಾ ಸೇನ್ ತಮ್ಮ ಇನ್‌ಸ್ಟಾಗ್ರಾಂನಲ್ಲಿ ದೀರ್ಘ ಪೋಸ್ಟ್ ಹಂಚಿಕೊಂಡಿದ್ದಾರೆ. 'ನಾನು ಚಿನ್ನಕ್ಕಿಂತ ಹೆಚ್ಚಿನದನ್ನು ಅಗೆಯುತ್ತೇನೆ... ಮತ್ತು ನಾನು ಯಾವಾಗಲೂ ವಜ್ರಗಳನ್ನು ಇಷ್ಟಪಡುತ್ತೇನೆ!! ಮತ್ತು ಹೌದು ಅವುಗಳನ್ನು ನಾನೇ ಖರೀದಿಸುತ್ತೇನೆ!!!. ತಮ್ಮ ವಿಲಕ್ಷಣತೆಯೊಂದಿಗೆ ಬುದ್ಧಿಜೀವಿಗಳು ಎಂದು ಕರೆಯಲ್ಪಡುವವರು... ತಮ್ಮ ಅಗ್ಗದ ಮತ್ತು ಕೆಲವೊಮ್ಮೆ ತಮಾಷೆಯ ಗಾಸಿಪ್‌ಗಳೊಂದಿಗೆ ಅಜ್ಞಾನಿಗಳಾಗಿರುತ್ತಾರೆ. ನಾನು ಎಂದಿಗೂ ಹೊಂದಿರದ ಸ್ನೇಹಿತರು ಮತ್ತು ನಾನು ಎಂದಿಗೂ ಭೇಟಿಯಾಗದ ಪರಿಚಯಸ್ಥರು... ಎಲ್ಲರೂ ತಮ್ಮ ಭವ್ಯವಾದ ಅಭಿಪ್ರಾಯಗಳನ್ನು ಮತ್ತು ನನ್ನ ಜೀವನ ಮತ್ತು ಪಾತ್ರದ ಆಳವಾದ ಜ್ಞಾನವನ್ನು ಹಂಚಿಕೊಳ್ಳುತ್ತಾರೆ... 'ಗೋಲ್ಡ್ ಡಿಗ್ಗರ್' ಎನ್ನುತ್ತಾ ಎಲ್ಲ ರೀತಿಯಲ್ಲಿ ಹಣಗಳಿಸುತ್ತಾರೆ!!! ಓಹ್ ಎಂತಹ ಪ್ರತಿಭೆಗಳು!!!' ಎಂದು ಬರೆದಿದ್ದರು.