ಬೆಂಗಳೂರು: ಜೂಹಿ ಚಾವ್ಲಾ 'ಪ್ರೇಮ ಲೋಕ'ದ ಮೂಲಕ ಮೊದಲ ಬಾರಿ ಕನ್ನಡ ಸಿನೆ ರಸಿಕರ ಮನ ಗೆದ್ದಾಗ ನಟಿಗೆ ೨೦ ವರ್ಷ. ಈಗ ೫೦ ವರ್ಷದ ನಟಿ ಸ್ಯಾಂಡಲ್ವುಡ್ ಗೆ ಹಿಂದಿರುಗಿದ್ದು ಮತ್ತದೇ ಮಾಂತ್ರಿಕತೆ ಪ್ರದರ್ಶಿಸಲು ಮುಂದಾಗಿದ್ದಾರೆ.
೧೦ ನಿಮಿಷಗಳ ಹಾಡೊಂದರಲ್ಲಿ ಕಾಣಿಸಿಕೊಳ್ಳಲಿರುವ ಜೂಹಿ ಚಾವ್ಲಾ ಅವರ ಪೋಸ್ಟರ್ ಈಗ ಬಿಡುಗಡೆಯಾಗಿದೆ. ಈ ಹಾಡಿಗಾಗಿಯೇ ಸಿನೆಮಾ ಬಜೆಟ್ ನ ಅರ್ಧದಷ್ಟು ಖರ್ಚು ಮಾಡಲಾಗಿದೆಯಂತೆ. "ನಟಿಗೆ ಕೊಟ್ಟ ವರಮಾನ, ಮತ್ತಿತರ ಖರ್ಚುಗಲೇ ೧ ಕೋಟಿ. ಸೆಟ್ ಗಾಗಿ ೨೦ ಲಕ್ಷ ಖರ್ಚು ಮಾಡಲಾಗಿದೆ. ಈ ಸೆಟ್ ಒಳಗೆ ಬಂದಾಕ್ಷಣ, ನಾನು ಸಂಜಯ್ ಲೀಲಾ ಭನ್ಸಾಲಿ ಸೆಟ್ಟೊಳಗೆ ಬಂದಿದ್ದೇನೆಯೇ ಎಂದು ಉದ್ಘರಿಸಿದರು ಜೂಹಿ" ಎನ್ನುತ್ತಾರೆ ನಿರ್ಮಾಪಕರಲ್ಲಿ ಒಬ್ಬರಾದ ವಿಖ್ಯಾತ್.
ಈ ಹಾಡಿಗೆ ಭುವನ್ ಗೌಡ ನೃತ್ಯ ನಿರ್ದೇಶನ ಮಾಡಿದ್ದಾರೆ. ೧೯೮೦ರ ಕಾಲಘಟ್ಟದಲ್ಲೂ ಸಿನೆಮಾ ನಡೆಯುವುದರಿಂದ ಜೂಹಿ ಚಾವ್ಲಾ ಅವರನ್ನು ಆಯ್ಕೆ ಮಾಡಿಕೊಂಡೆವು ಎನ್ನುತ್ತಾರೆ ವಿಖ್ಯಾತ್.
ಎಸ್ ರವೀಂದ್ರನಾಥ್ ನಿರ್ದೇಶನದ ಈ ಚಿತ್ರದಲ್ಲಿ ರಮೇಶ್ ಅರವಿಂದ್, ರಚಿತಾ ರಾಮ್ ಮತ್ತು ಬಾಲ ನಟಿ ಯುವಿನಾ ಪಾರ್ಥವಿ ನಟಿಸಿದ್ದಾರೆ.