ಬೆಂಗಳೂರು: ನಟ-ನಿರ್ದೇಶಕ ಜೋಡಿ ಗಣೇಶ್ ಮತ್ತು ಯೋಗರಾಜ್ ಭಟ್ 'ಮುಗುಳು ನಗೆ' ಮುಹೂರ್ತದ ದಿನವೇ ಗೆಲುವಿನ ನಗೆ ಬೀರಿದ್ದಾರೆ. ಅಂದೇ ಸಿನೆಮಾದ ವಿತರಣಾ ಹಕ್ಕುಗಳು ಮಾರಾಟವಾಗಿರುವುದು ಈ ಸಂತಸಕ್ಕೆ ಕಾರಣ. 

ಬಲ್ಲ ಮೂಲಗಳ ಪ್ರಕಾರ ಮೈಸೂರು ಟಾಕೀಸ್ ನ ಜಾಕ್ ಮಂಜು ವಿತರಣೆಗೆ ಸಿನೆಮಾ ಚಿತ್ರೀಕರಣಕ್ಕೂ ಮುಂಚಿತವಾಗಿ ಹಕ್ಕುಗಳನ್ನು ಖರೀದಿಸಿದ್ದಾರೆ. ಕನ್ನಡ ಚಿತ್ರರಂಗದಲ್ಲಿ ಇದು ಮೊದಲು. ಇದು ದೊಡ್ಡ ಮೊತ್ತಕ್ಕೆ ಮಾರಾಟವಾಗಿದೆ ಎಂದು ಕೂಡ ಕೇಳಿಬಂದಿದೆ. 

"ಹಿಂದಿನ ಸಿನೆಮಾಗಳಾದ 'ಮುಂಗಾರು ಮಳೆ' ಮತ್ತು 'ಗಾಳಿಪಟ' ಸಿನೆಮಾಗಳಲ್ಲಿ ಈ ನಟ-ನಿರ್ದೇಶಕ ಜೋಡಿ ದಾಖಲೆಗಳನ್ನು ಬರೆದಿದೆ. ಈ ಜೋಡಿ ಹ್ಯಾಟ್ರಿಕ್ ಹೊಡೆಯಲಿದೆ ಎಂದು ಜಾಕ್ ಮಂಜು ಆತ್ಮವಿಶ್ವಾಸದಿಂದಿದ್ದಾರೆ" ಎನ್ನುತ್ತವೆ ಮೂಲಗಳು. 

ಈ ಸಿನೆಮಾದಲ್ಲಿ ಅಮೂಲ್ಯ, ಆಶಿಕಾ ಮತ್ತು ನಿಖಿತಾ ನಾರಾಯಣ್ ನಾಯಕ ನಟಿಯರಾಗಿ ಕಾಣಿಸಿಕೊಳ್ಳುತ್ತಿದ್ದು, ಭಾವನಾ ಅತಿಥಿ ನಟಿಯಾಗಿ ನಟಿಸಲಿದ್ದಾರೆ. 

ಯೋಗರಾಜ್ ಭಟ್ ಫಿಲಂಸ್, ಗೋಲ್ಡನ್ ಮೂವೀಸ್ ಮತ್ತು ಸಯ್ಯದ್ ಸಲಾಂ ಈ ಚಿತ್ರವನ್ನು ಜಂಟಿಯಾಗಿ ನಿರ್ಮಿಸುತ್ತಿವೆ. ಸುಜ್ಞಾನ್ ಛಾಯಾಗ್ರಹಣ ಮಾಡಲಿದ್ದು, ಹರಿಕೃಷ್ಣ ಸಂಗೀತ ನೀಡಲಿದ್ದಾರೆ.