ಮುಂಬೈ: ಕಿರುತೆರೆಯಲ್ಲಿ ಪ್ರಸಾರವಾಗಲಿರುವ ನೃತ್ಯ ರಿಯಾಲಿಟಿ ಕಾರ್ಯಕ್ರಮ 'ಶೈನ್ ಆಫ್ ಇಂಡಿಯಾ'ದ ತೀರ್ಪುಗಾರ್ತಿಯಾಗಿ ಕಾಣಿಸಿಕೊಳ್ಳಲಿರುವ ನಟಿ ರವೀನಾ ಟಂಡನ್, ಒಂದು ದಿನ ಶೋಗಾಗಿ ೧.೨೫ ಕೋಟಿ ರೂ ರಾಯಧನ ಪಡೆಯಲಿದ್ದಾರಂತೆ. ಕಿರುತೆರೆಯಲ್ಲಿ ಅತಿ ಹೆಚ್ಚು ಗಳಿಸುವ ಬಾಲಿವುಡ್ ನಟಿಯಾಗಿ ರವೀನಾ ಹೊರಹೊಮ್ಮಿದ್ದಾರೆ.
ಈ ಹಿಂದೆ 'ಸಾಹಿಬ್ ಬೀವಿ ಔರ್ ಗುಲಾಂ', 'ಛೋಟೆ ಮಿಯಾ', 'ಕಾಮಿಡಿ ಕ ಮಹಾ ಮುಕಾಬಲ' ಮತ್ತು 'ಸಿಂಪ್ಲಿ ಬಾತಿ ವಿತ್ ರವೀನಾ' ಕಿರುತೆರೆಯ ಕಾರ್ಯಕ್ರಮಗಳಲ್ಲಿ ಕಾಣಿಸಿಕೊಂಡಿರುವ ರವೀನಾ ಈ ಕಾರ್ಯಕ್ರಮವನ್ನು ನಟ ಗೋವಿಂದ ಮತ್ತು ನೃತನಿರ್ದೇಶಕ ಸರೋಜ್ ಖಾನ್ ಅವರೊಂದಿಗೆ ತೀರ್ಪುಗಾರ್ತಿಯಾಗಿ ಭಾಗವಹಿಸಲಿದ್ದಾರೆ.
"ರವೀನಾ ಈ ಕಾರ್ಯಕ್ರಮದ ಎಪಿಸೋಡ್ ಒಂದಕ್ಕೆ ೧.೨೫ ಕೋಟಿ ರಾಯಧನ ಪಡೆಯಲಿದ್ದು, ಕಿರುತೆರೆಯಲ್ಲಿ ಅತಿ ಹೆಚ್ಚು ಗಳಿಸುವ ಬಾಲಿವುಡ್ ನಟಿಯಾಗಿ ಹೊರಹೊಮ್ಮಿದ್ದಾರೆ" ಎಂದು ಬಲ್ಲ ಮೂಲಗಳು ತಿಳಿಸಿವೆ.
ಈ ಹಿಂದೆ ಕಿರುತೆರೆಯ ಕಾರ್ಯಕ್ರಮಗಳಲ್ಲಿ ತೀರ್ಪುಗಾರ್ತಿಯರಾಗಿ ಭಾಗವಹಿಸಿದ್ದ ಶಿಲ್ಪಾ ಶೆಟ್ಟಿ ಮತ್ತು ಮಾಧುರಿ ದೀಕ್ಷಿತ್ ಅವರಿಗೆ ಎಪಿಸೋಡ್ ಒಂದಕ್ಕೆ ೧ ಕೋಟಿ ನೀಡಲಾಗುತ್ತಿತ್ತಂತೆ.