ಮುಂಬೈ: ಅಜಾನ್ ವಿವಾದ ಸಂಬಂಧ ಗಾಯಕ ಸೋನು ನಿಗಮ್ ಅವರ ಕುರಿತಂತೆ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿದ್ದರೂ, ಇಷ್ಟು ದಿನ ಮೌನವಾಗಿದ್ದ ಬಾಲಿವುಡ್ ನಟಿ ಕಂಗನಾ ರಾಣಾವತ್ ಅವರು ಕೊನೆಗೂ ತಮ್ಮ ಮೌನವನ್ನು ಮುರಿದಿದ್ದು, ಸೋನು ನಿಗಮ್ ಅವರ ಅಭಿಪ್ರಾಯವನ್ನು ಗೌರವಿಸಬೇಕೆಂದು ಹೇಳಿದ್ದಾರೆ.
ಆಜಾನ್ ವಿವಾದ ಸಂಬಂಧ ಪ್ರತಿಕ್ರಿಯೆ ನೀಡಿರುವ ಅವರು, ಯಾವುದೇ ಒಬ್ಬ ವ್ಯಕ್ತಿಯ ಬಗ್ಗೆ ನಾನು ಮಾತನಾಡುವುದಿಲ್ಲ. ಆದರೆ, ವೈಯಕ್ತಿಕವಾಗಿ ಹೇಳುವುದಾದರೆ ನಾನು ಆಜಾನ್ ನ್ನು ಪ್ರೀತಿಸುತ್ತೇನೆ. ಲಖನೌನಲ್ಲಿ ತನು ವೆಡ್ಸ್ ಮನು ಚಿತ್ರದ ಚಿತ್ರೀಕರಣ ಮಾಡುತ್ತಿರಬೇಕಾದರೆ, ಆಜಾನ್ ಶಬ್ಧ ಕೇಳಿ ಬರುತ್ತಿತ್ತು. ಆಜಾನ್ ನ್ನು ಬಹಳ ಪ್ರೀತಿಸುತ್ತೇನೆ. ವೈಯಕ್ತಿಕವಾಗಿಯಷ್ಟೇ ನಾನು ಹೇಳಿಕೆಯನ್ನು ನೀಡುತ್ತೇನೆ. ಗುರುದ್ವಾರವಾಗಲೀ ಅಥವಾ ಭಗವದ್ಗೀತೆಯಾಗಲೀ, ಆಜಾನ್ ಆಗಲೂ ಧಾರ್ಮಿಕ ಆಚರಣೆಗಳನ್ನು ನಾನು ಬಹಳ ಇಷ್ಟ ಪಡುತ್ತೇನೆ. ಮಸೀದಿ, ದೇಗುಲ ಮತ್ತು ಚರ್ಚೆಗಳಲ್ಲಿನ ಆರಾಧನೆಗಳನ್ನು ನಾನು ವೈಯಕ್ತಿಕವಾಗಿ ಇಷ್ಟ ಪಡುತ್ತೇನೆಂದು ಹೇಳಿದ್ದಾರೆ.
ಕ್ರಿಸ್ ಮಸ್ ಆಚರಣೆ ಕುರಿತಂತೆಯೂ ನಾನು ನನ್ನ ಅಭಿಪ್ರಾಯವನ್ನಷ್ಟೇ ಹೇಳುತ್ತೇನೆ. ಸೋನು ನಿಗಮ್ ಅವರ ಹೇಳಿಕೆಯನ್ನು ಪರಿಗಣನೆಗೆ ತೆಗೆದುಕೊಳ್ಳಬಾರದು ಎಂದು ಹೇಳುತ್ತಿಲ್ಲ. ಅವರು ಅವರ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ಅವರ ಅಭಿಪ್ರಾಯವನ್ನು ನಾವು ಗೌರವಿಸಬೇಕು ಎಂದು ತಿಳಿಸಿದ್ದಾರೆ.