ಬೆಂಗಳೂರು: ಕಿರಿಕ್ ಹುಡುಗಿ ಸಂಯುಕ್ತಾ ಹೆಗಡೆ ಕಿರುತೆರೆಗೆ ಎಂಟ್ರಿ ಕೊಟ್ಟಿದ್ದಾರೆ. ಕಲರ್ಸ್ ಸೂಪರ್ ಚಾನಲ್ ನಲ್ಲಿ ಪ್ರಸಾರವಾಗುತ್ತಿರುವ ಜನಪ್ರಿಯ ರಿಯಾಲಿಟಿ ಶೋ ಬಿಗ್ ಬಾಸ್ ಐದನೇ ಸೀಜನ್ ನಲ್ಲಿ ಸಂಯುಕ್ತಾಗೆ ವೈಲ್ಡ್ ಕಾರ್ಡ್ ಎಂಟ್ರಿ ಸಿಕ್ಕಿದೆ.

ಇದಾಗಲೇ ಸುದೀಪ್ ಅವರೊಡನೆ ಕಿಚ್ಚನ್ ಟೈಮ್ ಕಾರ್ಯಕ್ರಮದಲ್ಲಿ ಕಾಣಿಸಿಕೊಂಡಿದ್ದ ಸಂಯುಕ್ತಾ ಬಿಗ್ ಬಾಸ್ ಮನೆಯ ಕುರಿತು ಕೆಲ ಅಂಶಗಳನ್ನು ತಿಳಿದುಕೊಂಡಿದ್ದರು. ಇದೀಗ ತಾವೇ ಮನೆಯೊಳಗೆ ಸೇರಿಕೊಂಡಿದ್ದಾರೆ. ಇದಾಗಲೇ ಸಾಕಷ್ಟು ಅಭಿಮಾನಿಗಳನ್ನು ಹೊಂದಿರುವ ಸಂಯುಕ್ತಾ ಅವರ ಬಿಗ್ ಬಾಸ್ ಎಂಟ್ರಿಯಿಂದ ಅವರ ಜನಪ್ರಿಯತೆ ಜತೆಜತೆಗೇ ಕಾರ್ಯಕ್ರಮದ ಜನಪ್ರಿಯತೆಯೂ ಹೆಚ್ಚಲಿದೆ.

ಕಿರಿಕ್ ಪಾರ್ಟಿ ನಂತರ ಈ ನಟಿ ಕಾಲೇಜ್ ಕುಮಾರ್ ಕನ್ನಡ ಚಿತ್ರದಲ್ಲಿ ಕಾಣಿಸಿ ಕೊಂಡಿದ್ದಾರೆ.. ಜತೆಗೆ ಕಿರಿಕ್ ಪಾರ್ಟಿ ತೆಲುಗು ಅವತರಣಿಕೆಯಲ್ಲಿ ಸಹ ಅಭಿನಯಿಸುತ್ತಿದ್ದಾರೆ.  ನಟಿ ಇದಾಗಲೇ ಎಂ ಟಿವಿಯ ರೋಡೀಸ್ ಕಾರ್ಯಕ್ರಮದ ಹದಿನೈದನೇ ಸರಣಿಯಲ್ಲಿ ಭಾಗವಹಿಸಿ ಬಂದಿದ್ದಾರೆ.  ಇದೀಗ ಪುನಃ ಬಿಗ್ ಬಾಸ್ ಕಾರ್ಯಕ್ರಮದ ಮೂಲಕ ಮತ್ತೆ ಕನ್ನಡ ಪ್ರೇಕ್ಷಕರನ್ನು ಮನರಂಜಿಸ ಹೊರಟಿದ್ದಾರೆ.

ಅಂದಹಾಗೆ ಸಂಯುಕ್ತಾ ಅವರೊಡನೆ ಬಿಗ್ ಬಾಸ್ ಗೆ ಇನ್ನೋರ್ವ ನಟಿಯೂ ಪ್ರವೇಶ ಪಡೆದಿದ್ದು ಅವರು ಸುವರ್ಣ ವಾಹಿನಿಯ 'ಡ್ಯಾನ್ಸ್ ಡ್ಯಾನ್ಸ್'ನಲ್ಲಿ  ಭಾಗವಹಿಸಿದ್ದ ಲಾಸ್ಯ ನಾಗ್. 'ಅಸತೋಮ ಸದ್ಗಮಯ' ಚಿತ್ರದ ನಾಯಕಿಯಾಗಿರುವ ಈಕೆ 'ಅಂಬಿ ನಿಂಗ್ ವಯಸ್ಸಾಯ್ತೋ' ಚಿತ್ರದಲ್ಲಿ ಅಭಿನಯಿಸಿದ್ದಾರೆ. ಇದರೊಡನೆ ಕಲರ್ಸ್ ಕನ್ನಡದ 'ಪದ್ಮಾವತಿ' ಧಾರಾವಾಹಿಯಲ್ಲಿಯೂ ಇವರು ನಟಿಸಿದ್ದು ಇದೀಗ ಸಂಯುಕ್ತಾ ಅವರೊಡನೆ ಬಿಗ್ ಬಾಸ್ ಮನೆಗೆ ಬಂದಿದ್ದಾರೆ.