ಬೆಂಗಳೂರು: ಕನ್ನಡ ಚಿತ್ರೋದ್ಯಮದಲ್ಲಿ ಇದು ಹಾರರ್ ಪರ್ವ. ಕಳೆದ ವರ್ಷ ಬಿಡುಗಡೆಯಾದ ನವನೀತ್ ನಿರ್ದೇಶನದ 'ಕರ್ವ' ಯಶಸ್ವಿ ಪ್ರದರ್ಶನ ಕಂಡಿತ್ತು. ಹಾಗೆಯೇ ನಿರ್ದೇಶಕ ಪವನ್ ಕುಮಾರ್ ಅವರ 'ಯು-ಟರ್ನ್', ಲೋಹಿತ್ ನಿರ್ದೇಶನದ 'ಮಮ್ಮಿ ಸೇವ್ ಮಿ' ಚಿತ್ರಗಳು ಕೂಡ ಉತ್ತಮ ಪ್ರದರ್ಶನ ಕಂಡಿದ್ದವು. 

ಈಗ ಗಿರೀಶ್ ಕುಮಾರ್ ಬಿ ಬರೆದು ನಿರ್ದೇಶಿಸಿರುವ 'ಆವಾಹಯಾಮಿ' ಸಿನೆಮಾದ ಶೀರ್ಷಿಕೆ ಮತ್ತು ಟ್ರೇಲರ್ ಗಮನ ಸೆಳೆದಿವೆ. ಟ್ರೇಲರ್ ನಿಂದಲೇ ಈ ಹಾರರ್ ಚಿತ್ರ ಪ್ರೇಕ್ಷಕರನ್ನು ಬೆಚ್ಚಿಬೀಳಿಸಲು ಸನ್ನದ್ಧವಾಗಿರುವುದು ಗೋಚರವಾಗುತ್ತದೆ. 

'ಆವಾಹಯಾಮಿ'ಗೆ ಗೌತಮ್ ಶ್ರೀವತ್ಸ ಸಂಗೀತ ನೀಡಿದ್ದು, ಕಿರಣ್ ಕೆ ನಾಯರ್ ಅವರ ಸಿನೆಮ್ಯಾಟೋಗ್ರಫಿ ಇದೆ. 

ಸಂಪೂರ್ಣ ಹೊಸ ತಂಡ ಕಟ್ಟಿಕೊಂಡು ಮಾಡಿರುವ ಈ ಸಿನೆಮಾದಲ್ಲಿ ವಿಜಯ್ ರಾಜ್, ಮೌನ ಶ್ರೀ, ಗಿರೀಶ್ ಕುಮಾರ್, ಅಕ್ಷತಾ ಮುಂತಾದವರು ನಟಿಸಿದ್ದಾರೆ. 

ಆರ್ ಗೌಡ ಪ್ರೊಡಕ್ಷನ್ಸ್, ವುಡ್ಕೀಪರ್ಸ್ ಅಂಡ್ ಫ್ರೆಂಡ್ಸ್ ಜಂಟಿಯಾಗಿ ನಿರ್ಮಿಸಿರುವ ಈ ಚಿತ್ರ ಶೀಘ್ರದಲ್ಲೇ ಬಿಡುಗಡೆ ಕಾಣಲಿದೆ.