ಬೆಂಗಳೂರು: ಒಪ್ಪಮ್ (೨೦೧೬) ಮತ್ತು ಪುಲಿಮುರುಗನ್ (೨೦೧೬) ನಂತರ ಈಗ ಮಲಯಾಳಂ ಸೂಪರ್ ಸ್ಟಾರ್ ಮೋಹನ್ ಲಾಲ್ ಅಭಿನಯದ 'ಮುಂತಿರಿವಲ್ಲಿಕಲ್ ತಳಿರ್ಕ್ಕುಂಬೋಳ್' ಮಲಯಾಳಂ ಸಿನೆಮಾ ಈಗ ಉಳಿದ ದಕ್ಷಿಣ ಭಾರತ ಭಾಷೆಗಳಿಗೆ ರಿಮೇಕ್ ಆಗಲಿದೆ. 

ನಿರ್ದೇಶಕ ಜಿಬು ಜಾಕಬ್ ಈ ಸಿನೆಮಾ ರಿಮೇಕ್ ಆಗುವುದರ ಬಗ್ಗೆ ಮಾತನಾಡಿದ್ದು 

"ಹೌದು, ನಾನು ನಿರ್ಮಾಪಕರು ಮತ್ತು ಕಲಾವಿದರ ಜೊತೆಗೆ ಮಾತುಕತೆ ನಡೆಸಿದ್ದೇನೆ. ಸದ್ಯಕ್ಕೆ ತೆಲುಗಿನಲ್ಲಿ ವೆಂಕಟೇಶ್ ಮತ್ತು ಕನ್ನಡದಲ್ಲಿ ರವಿಚಂದ್ರನ್ ಅವರನ್ನು ಒಳಗೊಳ್ಳುವ ಬಗ್ಗೆ ಚಿಂತಿಸುತ್ತಿದ್ದೇವೆ. ತಮಿಳು ಆವತರಿಣಿಕೆಯಲ್ಲಿ ರಜನಿಕಾಂತ್ ನಟಿಸಬೇಕೆಂಬುದು ನನ್ನ ಕನಸು. ಅದು ನನಸಾಗುವುದೋ ತಿಳಿದಿಲ್ಲ" ಎನ್ನುತ್ತಾರೆ. 

ಈ ರಿಮೇಕ್ ಗಳನ್ನು ಯಾರು ನಿರ್ದೇಶಿಸಲಿದ್ದಾರೆ ಎಂಬ ಪ್ರಶ್ನೆಗೆ "ಅದರ ಬಗ್ಗೆ ಇನ್ನು ನಿರ್ಧರಿಸಿಲ್ಲ. ಆದರೆ ನಾನು ತಮಿಳು ಅವತರಿಣಿಕೆಯನ್ನೂ ನಿರ್ದೇಶಿಸಬಹುದು ಮತ್ತು ಇನ್ನೆರಡು ರಿಮೇಕ್ ಗಳನ್ನು ಬೇರೆಯವರು ನಿರ್ದೇಶಿಸಬಹುದು" ಎಂದು ಜಿಬು ತಿಳಿಸುತ್ತಾರೆ.