ಕೊಚ್ಚಿ: ಮಲೆಯಾಳಂ ನಟಿಯ ಅಪಹರಣ ಮತ್ತು ಲೈಂಗಿಕ ದೌರ್ಜನ್ಯ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪ್ರಕರಣದ ತನಿಖೆ ನಡೆಸುತ್ತಿರುವ ವಿಶೇಷ ತನಿಖಾ ತಂಡ ಹಿನ್ನಲೆ ಗಾಯಕಿ ಹಾಗೂ ನಟಿ ರಿಮ್ಮಿ ಟೋಮಿ ಅವರನ್ನು ಗುರುವಾರ ವಿಚಾರಣೆಗೆ ಒಳಪಡಿಸಿದೆ. 

ಮೂಲಗಳ ಪ್ರಕಾರ, ಪ್ರಕರಣದ ಮತ್ತೊಬ್ಬ ಆರೋಪಿ ಮಲೆಯಾಳಂ ನಟ ದಿಲೀಪ್ ಹಾಗೂ ಅವರ ಪತ್ನಿ, ನಟಿ ಕಾವ್ಯ ಮಾಧವನ್ ಅವರಿಗೆ ರಿಮ್ಮಿ ಆತ್ಮೀಯ ಸ್ನೇಹಿತೆಯಾಗಿದ್ದು, ಅವರೊಂದಿಗೆ ಹಣಕಾಸಿನ ವ್ಯವಹಾರ ಹೊಂದಿರುವ ಹಿನ್ನೆಲೆಯಲ್ಲಿ ಅವರಿಂದ ಹೇಳಿಕೆ ಪಡೆದುಕೊಳ್ಳಲಾಗಿದೆ.

ತನಿಖಾಧಿಕಾರಿಗಳು ರಿಮ್ಮಿ ಟೋನಿ ಅವರನ್ನು ಇಂದು ದೂರವಾಣಿ ಮೂಲಕ ವಿಚಾರಣೆ ನಡೆಸಿದ್ದು, ಮತ್ತೊಮ್ಮೆ ವಿಚಾರಣೆ ನಡೆಸುವ ಸಾಧ್ಯತೆ ಇದೆ ಎನ್ನಲಾಗಿದೆ.

ಈ ಮಧ್ಯೆ, ದಿಲೀಪ್ ದಂಪತಿಗಳೊಂದಿಗಿನ ಹಣಕಾಸು ವ್ಯವಹಾರವಿದೆ ಎಂಬ ವರದಿಗಳನ್ನು ರಿಮ್ಮಿ ಸ್ಪಷ್ಟವಾಗಿ ತಳ್ಳಿಹಾಕಿದ್ದು, ಮಲೆಯಾಳಂ ನಟಿ ಅಪಹರಣ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ತಮ್ಮಿಂದ ಕೆಲವು ಮಾಹಿತಿ ಪಡೆದಿದ್ದಾರೆ. ಅದು ವಿಚಾರಣೆ ಅಲ್ಲ ಎಂದು ಹೇಳಿದ್ದಾರೆ.