ತಿರುವನಂತಪುರ: ಪಡ್ಡೆ ಹುಡುಗರ ನಿದ್ದೆಗೆಡಿಸಿದ್ದ ನಟಿ ಪ್ರಿಯಾ ನಟಿಸಿರುವ ಒರು ಅಡಾರ್ ಲವ್'ನ ಮಾಣಿಕ್ಯ ಮಲರಯ ಪೂವಿ ಹಾಡಿನಲ್ಲಿ ಯಾವುದೇ ರೀತಿಯ ಆಕ್ಷೇಪಾರ್ಹ ವಿಷಯಗಳಿಲ್ಲ ಎಂದು ಚಿತ್ರದ ನಿರ್ದೇಶಕ ಒಮರ್ ಲುಲು ಅವರು ಬುಧವಾರ ಹೇಳಿದ್ದಾರೆ. 

ಒರು ಅಡಾರ್ ಲವ್' ಚಿತ್ರದ ಮಾಣಿಕ್ಯ ಮಲರಯ ಪೂವಿ ಹಾಡಿನಲ್ಲಿ ಮುಸ್ಲಿಂ ಭಾವನೆಗಳಿಗೆ ಧಕ್ಕೆ ತರಲಾಗಿದೆ ಎಂಬ ಮಾತುಗಳು ಕೇಳಿ ಬಂದಿದ್ದವು. ಅಲ್ಲದೆ, ತೆಲಂಗಾಣ ರಾಜ್ಯದಲ್ಲಿ ಚಿತ್ರದ ವಿರುದ್ಧ ದೂರು ಕೂಡ ದಾಖಲಾಗಿದೆ. ಈ ಹಿನ್ನಲೆಯಲ್ಲಿ ಪ್ರತಿಕ್ರಿಯೆ ನೀಡಿರುವ ಒಮರ್ ಲುಲು ಅವರು, ಮುಸ್ಲಿಮರು ಕೇರಳದ ಭಾಗವಾಗಿದ್ದು, ಹಲವು ವರ್ಷಗಳಿಂದಲೂ ಈ ಹಾಡನ್ನು ಹಾಡುತ್ತಿದ್ದಾರೆ. ಸಿಎಂಎ ಜಬ್ಬರ್ ಅವರು ಬರೆದಿರುವ ಈ ಹಾಡನ್ನು ಮದುವೆ ಸಮಾರಂಭಗಳು ಹಾಗೂ ಉತ್ತರ ಕೇರಳದ ಹಲವು ಭಾಗಗಳಲ್ಲಿ ಹಾಡುತ್ತಿದ್ದಾರೆ. 1978ರಿಂದಲೂ ಮಲಬಾರ್ ಮುಸ್ಲಿಮರು ಈ ಹಾಡನ್ನು ಹಾಡುತ್ತಿದ್ದಾರೆ. ಆಗೆಲ್ಲಾ ಇದು ಆಕ್ಷೇಪಾರ್ಹವಾಗಿರಲಿಲ್ಲ ಎಂದಾದ ಮೇಲೆ ಈಗಾಕೆ ಆಕ್ಷೇಪಾರ್ಹವಾಗುತ್ತದೆ ಎಂದು ಪ್ರಶ್ನಿಸಿದ್ದಾರೆ. 

ಅಕ್ಷೇಪಾರ್ಹ ವಿಚಾರಗಳಿರುವುದೇ ಆದರೆ, ಸೆನ್ಸಾರ್ ಮಂಡಳಿ ಈ ಕುರಿತು ನಿರ್ಧಾರ ಕೈಗೊಳ್ಳಲಿದೆ. ಹಾಡಿನಲ್ಲಿ ನಾವು ಸಂಗೀತವನ್ನಷ್ಟೇ ಬದಲಾಯಿಸಿದ್ದೇವೆ, ಸಾಹಿತ್ಯವನ್ನಲ್ಲ ಎಂದು ತಿಳಿಸಿದ್ದಾರೆ.