ಬೆಂಗಳೂರು: ಕಿರುತೆರೆಯ ಜನಪ್ರಿಯ ಧಾರಾವಾಹಿ 'ಪುಟ್ಟಗೌರಿ ಮದುವೆ' ಯ ನಾಯಕಿ ಪುಟ್ಟಗೌರಿ ಪಾತ್ರಧಾರಿ ರಂಜನಿ ರಾಘವನ್ ಬೆಳ್ಳಿತೆರೆಯಲ್ಲಿಯೂ ಮಿಂಚಲು ಹೊರಟಿದ್ದಾರೆ. ಇದಾಗಲೇ 'ರಾಜಹಂಸ' ಹಾಗೂ 'ಸುಬ್ಬ ಮತ್ತು ಸುಬ್ಬಿ' ಚಿತ್ರಗಳಲ್ಲಿ ಅಭಿನಯಿಸಿರುವ ರಂಜನಿ ಇದೀಗ ಮೂರನೇ ಚಿತ್ರಕ್ಕೆ ತಯಾರಾಗಿದ್ದು ಇದು ಅತ್ಯಂತ ನಿರೀಕ್ಷೆ ಹುಟ್ಟಿಸಿದೆ.

ಕಾರಣವೆಂದರೆ ಇದು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಸಹೋದರ ಮನೋಜ್ ಅಭಿನಯದ ಚಿತ್ರ. ಮನೋಜ್ ನಾಯಕ ನಟನಾಗಿರುವ 'ಟಕ್ಕರ್' ಚಿತ್ರೆಅಕ್ಕೆ ರಂಜನಿ ಅಲಿಯಾಸ್ ಪುಟ್ಟಗೌರಿ ನಾಯಕಿಯಾಗಿದ್ದಾರೆ. ವಿನಯ್ ರಾಜ್ ಕುಮಾರ್ ಅಭಿನಯದ 'ರನ್ ಆಂಟೋನಿ' ಚಿತ್ರದ ನಿರ್ದೇಶಕ ರಘು ಶಾಸ್ತ್ರಿ ಈ ಚಿತ್ರದ ನಿರ್ದೇಶನ ಮಾಡುತ್ತಿರುವುದು ಇನ್ನೊಂದು ವಿಶೇಷ. ಚಿತ್ರ ಬಿಡುಗಡೆಗಾಗಿ ಚಿತ್ರತಂಡ ಇದಾಗಲೇ ಭರದ ಸಿದ್ದತೆಯಲ್ಲಿದ್ದು ಮಾರ್ಚ್ ಅಂತ್ಯ ಅಥವಾ ಏಪ್ರಿಲ್ ಮೊದಲ ವಾರದಲ್ಲಿ ಚಿತ್ರ ತೆರೆಕಾಣುವ ನಿರೀಕ್ಷೆ ಇದೆ.

ನಾಗೇಶ್ ಕೋಗಿಲು 'ಟಕ್ಕರ್' ಚಿತ್ರದ ನಿರ್ಮಾಪಕರಾಗಿದ್ದು ಎಸ್ ಎಲ್ ಎನ್ ಕ್ರಿಯೇಷನ್ಸ್ ಬ್ಯಾನರ್ ಅಡಿಯಲ್ಲಿ ಈ ಚಿತ್ರ ಮೂಡಿ ಬರಲಿದೆ. ಮಣಿಕಾಂತ ಕದ್ರಿ ಅವರ ಸಂಗೀತ ನಿರ್ದೇಶನ ಮತ್ತು ಕೆ.ಎಂ.ಪ್ರಕಾಶ್ ಎಡಿಟಿಂಗ್ ಈ ಚಿತ್ರಕ್ಕಿದ್ದು ಛಾಯಾಗ್ರಾಹಕರ ಆಯ್ಕೆ ಇನ್ನಷ್ಟೇ ಆಗಬೇಕಿದೆ.