ಎಂಬತ್ತರ ದಶಕದಲ್ಲಿ ಕನ್ನಡ ಚಿತ್ರರಂಗದ ಇತಿಹಾಸದಲ್ಲಿ ಹೊಸ ದಾಖಲೆ ನಿರ್ಮಿಸಿದ್ದ ರೆಬೆಲ್ ಸ್ಟಾರ್ ಅಂಬರೀಶ್ ಅಭಿನಯದ "ಅಂತ" ಈಗ ಮತ್ತೊಮ್ಮೆ ತೆರೆ ಕಾಣುತ್ತಿದೆ. ಅತ್ಯಾಧುನಿಕ ತಂತ್ರಜ್ಞಾನದೊಂದಿಗೆ ತಾಯಾರಾಗಿರುವ ಈ ಚಿತ್ರ ಇಂದು (ಜೂನ್ 7) ಮತ್ತೆ ಚಿತ್ರಮಂದಿರಗಳಿಗೆ ಲಗ್ಗೆ ಇಟ್ಟಿದೆ.
1981ರಲ್ಲಿ ಬಿಡುಗಡೆಯಾಗಿದ್ದ "ಅಂತ" ಎಸ್.ವಿ. ರಾಜೇಂದ್ರಸಿಂಗ್ ಬಾಬು ನುರ್ದೇಶನದಲ್ಲಿ ಮೂಡಿಬಂದಿತ್ತು. ಅಂಬರೀಶ್ ನಾಯಕನಾಗಿದ್ದ ಈ ಚಿತ್ರವನ್ನು ಎಚ್.ಎನ್. ಮಾರುತಿ ಹಾಗೂ ವೇಣುಗೋಪಾಲ್ ಪರಿಮಳ ಆರ್ಟ್ಸ್ ಲಾಂಚನದಡಿ ನಿರ್ಮಾಣ ಮಾಡಿದ್ದರು. ಜಿಕೆ ವೆಂಕಟೇಶ್ ಚಿತ್ರಕ್ಕೆ ಸಂಗೀತ ನೀಡಿದ್ದರು.
ಹೊಸ ರೂಪದ "ಅಂತ" ಚಿತ್ರವನ್ನು ರಾಜ್ಯಾದ್ಯಂತ ನೂರಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡುತ್ತಿರುವುದಾಗಿ ನಿರ್ಮಾಪಕ ವೇಣುಗೋಪಾಲ್ ಹೇಳಿದ್ದಾರೆ.
"ಅಂತ" ಚಿತ್ರದಲ್ಲಿ ಅಂಬರೀಶ್ ಅವರದು ದ್ವಿಪಾತ್ರವಾಗಿದ್ದು "ಕನ್ವರ್ ಲಾಲ್" ಎಂಬ ನೆಗೆಟಿವ್ ಪಾತ್ರದ ಮೂಲಕ ಸಾಕಷ್ಟು ಜನಪ್ರಿಯತೆ ಗಳಿಸಿದರು. ಅವರ "ಕುತ್ತೇ ಕನ್ವರ್ ನಹೀ, ಕನ್ವರ್ ಲಾಲ್ ಬೋಲೋ" ಎಂಬ ಡೈಲಾಗ್ ಇಂದಿಗೂ ಸಹ ಜನಮಾನಸದಲ್ಲಿ ಅಚ್ಚಳಿಯದೇ ಉಳಿದುಕೊಂಡಿದೆ. ಸಧ್ಯ ಅಂಬರೀಶ್ ಇಲ್ಲದ ಈ ವೇಳೆ ಮೂವತ್ತೆಂಟು ವರ್ಷಗಳ ಬಳಿಕ ಅವರ ಚಿತ್ರವೊಂದು ಮರುಬಿಡುಗಡೆಯಾಗುತ್ತಿರುವುದು ರೆಬೆಲ್ ಸ್ಟಾರ್ ಅಭಿಮಾನಿಗಳಿಗೆ ಅತೀವ ಸಂತಸಕ್ಕೆ ಕಾರಣವಾಗಿದೆ.