ಬೆಂಗಳೂರು: ಎಂಜಿ ಶ್ರೀನಿವಾಸ್ ನಿರ್ದೇಶಿಸಿ, ಪ್ರಧಾನ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿರುವ 'ಓಲ್ಡ್ ಮಾಂಕ್' ಚಿತ್ರಕ್ಕಾಗಿ ಹಿರಿಯ ನಾಯಕ ರಾಜೇಶ್ ಅವರನ್ನು ಕರೆ ತಂದಿದ್ದಾರೆ. ಇದೀಗ ಅವರು ರಾಜೇಶ್ ಅವರೊಂದಿಗೆ ಒಪ್ಪಂದ ಮಾಡಿಕೊಂಡಿದ್ದಾರೆ.

88 ವರ್ಷದ ರಾಜೇಶ್, ಸ್ಯಾಂಡಲ್ ವುಡ್ ನ ಸುವರ್ಣಯುಗದ ಭಾಗವಾಗಿದ್ದರು. ಡಾ. ರಾಜ್ ಕುಮಾರ್, ಕಲ್ಯಾಣ್ ಕುಮಾರ್, ಉದಯ್ ಕುಮಾರ್ ನಂತಹ ದೊಡ್ಡ ನಟರೊಂದಿಗೆ ನಟಿಸಿರುವ ರಾಜೇಶ್, ದಶಕದ ನಂತರ ಮತ್ತೆ ಬಣ್ಣ ಹಚ್ಚಲಿದ್ದಾರೆ.

ರಾಜೇಶ್ ಅವರಂತಹ ಹಿರಿಯ ನಾಯಕರಿಗೆ ನಿರ್ದೇಶನ ಮಾಡುವುದು ಅದೃಷ್ಟ ಎನ್ನುವ ಶ್ರೀನಿವಾಸ್, ಈ ವಯಸ್ಸಿನಲ್ಲಿಯೂ ಅವರ ವರ್ಚಸ್ಸು ಹಾಗೆಯೇ  ಇದೆ. ತಮ್ಮ ಪಾತ್ರದ ಬಗ್ಗೆ ತಿಳಿದು ಒಪ್ಪಿಗೆ ನೀಡಿದ್ದಕ್ಕೆ ಧನ್ಯವಾದಗಳು. ತಮ್ಮ ಪಾತ್ರ ಹಾಗೂ  ತುಂಬಾ ದಿನಗಳ ನಂತರ ಕ್ಯಾಮರಾ ಎದುರಿಸುತ್ತಿರುವುದಕ್ಕೆ ಅವರು ಕುತೂಹಲಭರಿತರಾಗಿದ್ದಾರೆ. ಜನವರಿ 15 ರಿಂದ ರಾಜೇಶ್ ಅವರ ಭಾಗದ ಚಿತ್ರೀಕರಣ ಆರಂಭಿಸುವುದಾಗಿ ತಿಳಿಸಿದರು. 

ಚಿತ್ರತಂಡ ಟಾಕಿ ಭಾಗ ಹಾಗೂ ಸಾಂಗ್ ವೊಂದರ ಚಿತ್ರೀಕರಣಕ್ಕಾಗಿ ಐದು ದಿನ ಉಳಿಸಿಕೊಂಡಿದ್ದು, ಜನವರಿ ತಿಂಗಳಲ್ಲಿ ಪೂರ್ಣಗೊಳಿಸುವ ಯೋಜನೆಯಲ್ಲಿದೆ. ಅದಿತಿ ಪ್ರಭುದೇವ ನಾಯಕಿಯಾಗಿದ್ದು, ಮಲಯಾಳಂ ನಟ ಸುದೇವ್ ನಾಯರ್, ಮೊದಲ ಬಾರಿಗೆ ಸ್ಯಾಂಡಲ್ ವುಡ್ ನಲ್ಲಿ ವಿಲನ್ ಆಗಿ ಕಾಣಿಸಿಕೊಳ್ಳಲಿದ್ದಾರೆ.

ಉಳಿದಂತೆ ಅರುಣ್ ಬಾಲರಾಜ್, ಹಿರಿಯ ನಟ ಎಸ್ , ನಾರಾಯಣ್, ಸಿಹಿಕಹಿ ಚಂದ್ರು, ಆರ್ ಟಿ ರಮಾ, ಡಿಂಗ್ರಿ ನಾಗರಾಜ್, ಬೆಂಗಳೂರು ನಾಗರಾಜ್ ಮತ್ತಿತರ ತಾರಾಗಣವಿದೆ. ಸೌರಭ್ ವೈಭವ್ ಸಂಗೀತ ಸಂಯೋಜಿಸಿದ್ದು, ಭರತ್ ಪರಶುರಾಮ್ ಅವರ ಛಾಯಾಗ್ರಹಣವಿದೆ.