ನಟ ಶರಣ್ ಅಭಿನಯದ ರಾಂಬೊ-2 ಚಿತ್ರ ತೆರೆಕಂಡು 2 ವರ್ಷ ಪೂರೈಸಿದೆ. ರಾಂಬೊ ಚಿತ್ರ ನಟ ಶರಣ್ ಅವರ 100ನೇ ಚಿತ್ರವಾಗಿದ್ದು ಅವರು ನಾಯಕ ನಟನಾಗಿ ಅಭಿನಯಿಸಿದ ಮೊದಲ ಚಿತ್ರ ಎಂಬುದು ವಿಶೇಷ.

ರಾಂಬೊ ಮೊದಲ ಸಿನಿಮಾಕ್ಕೂ ರಾಂಬೊ 2 ಸಿನಿಮಾ ಕಥೆಗೂ ಸಂಬಂಧವಿಲ್ಲ. ಲಡ್ಡೂ ಸಿನೆಮಾಸ್ ನಡಿ ಅನಿಲ್ ಕುಮಾರ್ ನಿರ್ದೇಶನ ಮಾಡಿರುವ ಸಿನೆಮಾಕ್ಕೆ ಕೆಲವು ನಟರು ಮತ್ತು ತಂತ್ರಜ್ಞರು ಕೂಡಿಕೊಂಡು ಬಂಡವಾಳ ಹಾಕಿದ್ದರು.

ಅಟ್ಲಾಂಟ ನಾಗೇಂದ್ರ, ಶರಣ್, ನಿರ್ದೇಶಕ ತರುಣ್ ಸುಧೀರ್, ಛಾಯಾಗ್ರಾಹಕ ಸುಧಾಕರ್ ಎಸ್ ರಾಜ್, ಸಂಗೀತ ನಿರ್ದೇಶಕ ಅರ್ಜುನ್ ಜನ್ಯ, ಸಂಕಲನಕಾರ ಕೆ ಎಂ ಪ್ರಕಾಶ್, ಕಲಾ ನಿರ್ದೇಶಕ ಮೋಹನ್ ಬಿ ಕೇರೆ ಹೀಗೆ ಹಲವರು ಸೇರಿ ಚಿತ್ರ ತಯಾರಿಸಿದ್ದರು.
ಚಿತ್ರ ಸೂಪರ್ ಹಿಟ್ ಆಯಿತು, ಬಾಕ್ಸ್ ಆಫೀಸ್ ನಲ್ಲಿ 100 ದಿನಗಳ ಪ್ರದರ್ಶನ ಕಂಡಿತ್ತು.

ಇದೀಗ ಮತ್ತೆ ನಿರ್ಮಾಪಕರು, ನಿರ್ದೇಶಕರು ರ್ಯಾಂಬೊ ಸರಣಿ ಚಿತ್ರ ತಯಾರಿಸಲು ಮುಂದಾಗಿದ್ದು ಶರಣ್ ಅವರನ್ನೇ ನಾಯಕನಾಗಿ ಹಾಕಿಕೊಂಡು ಮುಂದುವರಿಸಲು ನಿರ್ಧರಿಸಲಾಗಿದೆ. ಸರಿಯಾದ ಸ್ಕ್ರಿಪ್ಟ್ ತಯಾರಾಗಲು ಕಾಯುತ್ತಿದ್ದೇವೆ, ಒಂದು ಉತ್ತಮ ಕಾಮಿಡಿ ಸಿನೆಮಾ ಮಾಡಬೇಕೆಂದು ಅಂದುಕೊಂಡಿದ್ದೇವೆ ಎಂದು ನಿರ್ದೇಶಕ ತರುಣ್ ಕಿಶೋರ್ ಸುಧೀರ್ ಹೇಳುತ್ತಾರೆ.

ರಾಂಬೊ 2ನಲ್ಲಿ ಆಶಿಕಾ ರಂಗನಾಥ್ ನಾಯಕಿ. ಅದರ ಚುಟು ಚುಟು ಹಾಡು ಫೇಮಸ್ ಆಗಿತ್ತು. ಅದರಲ್ಲಿ ಚಿಕ್ಕಣ್ಣ, ತಬಲಾ ನಾಣಿ, ಕುರಿ ಪ್ರತಾಪ್, ಸಾಧು ಕೋಕಿಲಾ ನಟಿಸಿದ್ದರು.