ಯಶ್ ನಾಯಕ ನಟನಾಗಿ ಅಭಿನಯಿಸುತ್ತಿರುವ ಹಿಟ್ ಚಿತ್ರ ಕೆಜಿಎಫ್ ನ ಮುಂದುವರಿದ ಸರಣಿ ಚಿತ್ರ ಕೆಜಿಎಫ್ ಚಾಪ್ಟರ್ 2 ಶೂಟಿಂಗ್ ಕಳೆದ ಆಗಸ್ಟ್ 26ರಂದು ಆರಂಭವಾಗಿದೆ. ಬೆಂಗಳೂರಿನ ಕಂಠೀರವ ಸ್ಟುಡಿಯೊದಲ್ಲಿ ಶೂಟಿಂಗ್ ಸಾಗುತ್ತಿದೆ.

ಚಿತ್ರದ ನಾಯಕಿ ಶ್ರೀನಿಧಿ ಶೆಟ್ಟಿ ಇನ್ನೇನು ಕೆಲವೇ ದಿನಗಳಲ್ಲಿ ಶೂಟಿಂಗ್ ಗಾಗಿ ಚಿತ್ರತಂಡ ಸೇರಲಿದ್ದಾರೆ. ಕೆಜಿಎಫ್ ಚಾಪ್ಟರ್ 1 ಮೂಲಕ ಜನಪ್ರಿಯತೆ ಪಡೆದ ಶ್ರೀನಿಧಿ ಶೆಟ್ಟಿಗೆ ಎರಡನೇ ಭಾಗದಲ್ಲಿ ಕೂಡ ನಟಿಸುತ್ತಿರುವುದು ತುಂಬಾ ಖುಷಿಯಿದೆ. ಇಷ್ಟು ದಿನಗಳ ಲಾಕ್ ಡೌನ್ ನಂತರ ಮತ್ತೆ ಕೆಲಸಕ್ಕೆ ಮರಳಿರುವ ಬಗ್ಗೆ ಉತ್ಸಾಹಿತರಾಗಿರುವ ಶ್ರೀನಿಧಿ ಶೆಟ್ಟಿ, ದೀರ್ಘ ಕಾಲದ ರಜೆಯ ನಂತರ ಮತ್ತೆ ಶಾಲೆಗೆ ಹೋಗುವಾಗ ಮಕ್ಕಳಿಗೆ ಯಾವ ಭಾವನೆ ಇರುತ್ತದೆ ಹಾಗೆಯೇ ನನಗಾಗುತ್ತಿದೆ ಎಂದಿದ್ದಾರೆ.

ಕಳೆದ ಮಾರ್ಚ್ 3ರಂದು ನಾನು ಚಿತ್ರದ ಶೂಟಿಂಗ್ ನಲ್ಲಿ ಕೊನೆಯ ಬಾರಿಗೆ ಭಾಗಿಯಾಗಿದ್ದು. ಚಿತ್ರದ ಪ್ರಮುಖ ಭಾಗದ ಚಿತ್ರೀಕರಣವನ್ನು ಹೈದರಾಬಾದ್ ನಲ್ಲಿ ಮುಗಿಸಿಕೊಂಡು ಬಂದಿದ್ದೆ. ನಂತರ 6 ತಿಂಗಳು ಬ್ರೇಕ್ ಆಯಿತು. ಇಷ್ಟು ಸುದೀರ್ಘ ರಜೆಯ ನಂತರ ಮತ್ತೆ ಕೆಲಸ ಆರಂಭಿಸುತ್ತಿದ್ದು ಕೊನೆಗೂ ಶೂಟಿಂಗ್ ಆರಂಭವಾಗಿರುವುದು ಖುಷಿ ತಂದಿದೆ ಎನ್ನುತ್ತಾರೆ.

ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ತಯಾರಾಗುತ್ತಿರುವ ಕೆಜಿಎಫ್ ಚಾಪ್ಟರ್ 2 ವನ್ನು ಹೊಂಬಾಳೆ ಫಿಲ್ಮ್ಸ್ ತಯಾರಿಸುತ್ತಿದೆ. ಇದರಲ್ಲಿ ಬಾಲಿವುಡ್ ನ ಖ್ಯಾತ ಕಲಾವಿದರಾದ ಸಂಜಯ್ ದತ್ ಮತ್ತು ರವೀನಾ ಟಂಡನ್ ಕೂಡ ಅಭಿನಯಿಸಿದ್ದಾರೆ.

ತಮಿಳಿನಲ್ಲಿ ವಿಕ್ರಮ್ ನಟನೆಯ ಕೋಬ್ರಾ ಸಿನೆಮಾ ಮೂಲಕ ಶ್ರೀನಿಧಿ ಶೆಟ್ಟಿ ತಮಿಳಿಗೆ ಸಹ ಪಾದಾರ್ಪಣೆ ಮಾಡುತ್ತಿದ್ದಾರೆ. ಆದರೆ ಅದರ ಶೂಟಿಂಗ್ ಸದ್ಯಕ್ಕೆ ಆರಂಭವಾಗುವ ಲಕ್ಷಣಗಳಿಲ್ಲ. ಕೊರೋನಾ ಹಿನ್ನೆಲೆಯಲ್ಲಿ ನವೆಂಬರ್ ಅಥವಾ ಡೆಸೆಂಬರ್ ನಲ್ಲಿ ಅದರ ಶೂಟಿಂಗ್ ಆರಂಭವಾಗುವ ಸಾಧ್ಯತೆಯಿದೆ ಎಂದು ಶ್ರೀನಿಧಿ ಶೆಟ್ಟಿ ಹೇಳುತ್ತಾರೆ.