ಬೆಂಗಳೂರು: ನಟನೆ ಹಾಗೂ ರಾಜಕೀಯ ಜರ್ನಿಯಲ್ಲಿ ಪಳಗಿರುವ ನಟ ಜಗ್ಗೇಶ್, ತೋತಾಪುರಿ ಚಿತ್ರದ ಕೆಲಸಗಳನ್ನು ಪುನರಾರಂಭಿಸಿದ್ದಾರೆ. ಸದ್ಯ ಅವರು ವಿಜಯ ಪ್ರಸಾದ್ ನಿರ್ದೇಶನದ ಚಿತ್ರಕ್ಕೆ ಡಬ್ಬಿಂಗ್ ನಲ್ಲಿ ತೊಡಗಿಸಿಕೊಂಡಿದ್ದಾರೆ. ಸ್ಟುಡಿಯೋದಿಂದಲೇ ಮಾತನಾಡಿರುವ ಜಗ್ಗೇಶ್, ತೋತಾಪುರಿ ವಿಷಯ ಆಧಾರಿತ ಸಿನಿಮಾವಾಗಿರುವುದಾಗಿ ತಿಳಿಸಿದರು.
ಇದೊಂದು ಎ-ಗ್ರೇಡ್ ಸಿನಿಮಾವಾಗಿದೆ. ತೋತಾಪುರಿ ನೀರ್ ದೋಸೆಗಿಂತ ಹತ್ತು ಪಟ್ಟು ಉತ್ತಮ ಸಿನಿಮಾವಾಗಿದೆ. ಈ ಚಿತ್ರದೊಂದಿಗೆ ವಿಜಯ ಪ್ರಸಾದ್ ಖಂಡಿತವಾಗಿ ರಾಜ್ಯ ಪ್ರಶಸ್ತಿ ಪಡೆಯಲಿದ್ದಾರೆ. ಕಾಲ ಬದಲಾಗಿದೆ. ಇಂದಿನ ಸಿನಿ ಪ್ರಿಯರು ಹೆಚ್ಚಾಗಿ ವಿಷಯ ಆಧಾರಿತ ಸಿನಿಮಾದ ಕಡೆಗೆ ಒಲವು ಹೊಂದಿದ್ದಾರೆ. ತೋತಾಪುರಿ ಅವರ ಇಷ್ಟಗಳನ್ನು ಪೂರೈಸಲಿದೆ ಎಂದರು.
ಕೆಎ ಸುರೇಶ್ ನಿರ್ಮಾಣದ ಈ ಚಿತ್ರ ಇದೀಗ ಪೋಸ್ಟ್ ಪ್ರೊಢಕ್ಷನ್ ಹಂತದಲ್ಲಿದೆ. ಎರಡು ಭಾಗಗಳಲ್ಲಿ ಹೊರಬರಲಿದೆ. ಜಗ್ಗೇಶ್ ಅವರೊಂದಿಗೆ ಆದಿತಿ ಪ್ರಭುದೇವಾ, ವೀಣಾ ಸುಂದರ್, ಧನಂಜಯ್, ಸುಮನ್ ರಂಗನಾಥ್ ಮತ್ತಿತರರು ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದಾರೆ.
ಜಗ್ಗೇಶ್ ಈ ಚಿತ್ರದಷ್ಟೇ ಮುಂದಿನ ಸಿನಿಮಾ ರಂಗನಾಯಕ ಸಿನಿಮಾ ಬಗ್ಗೆಯೂ ಕುತೂಹಲ ಹೊಂದಿದ್ದಾರೆ. ಎ ಆರ್ ವಿಕ್ಯಾತ್ ನಿರ್ಮಿಸುತ್ತಿರುವ ಈ ಚಿತ್ರಕ್ಕೆ ಗುರುಪ್ರಸಾದ್ ಆಕ್ಷನ್ ಕಟ್ ಹೇಳಲಿದ್ದಾರೆ. ರಂಗನಾಯಕ ಮತ್ತೊಂದು ಆಸಕ್ತಿದಾಯಕ ಕಥೆಯಾಗಿದ್ದು, ಆಗಸ್ಟ್ ಮೊದಲ ವಾರದಲ್ಲಿ ಚಿತ್ರೀಕರಣ ಆರಂಭಿಸಲು ಯೋಜನೆ ಹಾಕಿಕೊಳ್ಳಲಾಗಿದೆ ಎಂದು ಜಗ್ಗೇಶ್ ತಿಳಿಸಿದರು.
ಸದ್ಯ ಜಗ್ಗೇಶ್ ಕೈಯಲ್ಲಿ ಐದು ಪ್ರಮುಖ ಕಥೆಗಳಿದ್ದು, ನಟ ಆತುರ ಬೀಳುತ್ತಿಲ್ಲ. ಈ ವರ್ಷ ತೋತಾಪುರಿ ಪ್ರಚಾರ ಮತ್ತು ರಂಗನಾಯಕ ಚಿತ್ರೀಕರಣದಲ್ಲಿ ತೊಡಗಿಸಿಕೊಳ್ಳುತ್ತೇನೆ. ಈ ಎರಡು ಪ್ರಾಜೆಕ್ಟ್ ಮುಗಿಸಿದ ನಂತರ ಮುಂದಿನ ಚಿತ್ರದ ಬಗ್ಗೆ ನಿರ್ಧರಿಸುತ್ತೇನೆ. ಈ ಎಲ್ಲಾ ಪ್ರಾಜೆಕ್ಟ್ ಗಳ ಮಧ್ಯೆ, ಆರೋಗ್ಯದ ಕಡೆಗೆ ಗಮನ ನೀಡಿ, ಕುಟುಂಬದೊಂದಿಗೆ ಕಾಲ ಕಳೆಯುವುದಾಗಿ ಜಗ್ಗೇಶ್ ಹೇಳಿದರು.