ಸಾಮಾನ್ಯವಾಗಿ ಕೆಲವು ಜನರು ಆಗಾಗ ಚರ್ಮವನ್ನು ಕೆರೆದುಕೊಳ್ಳುತ್ತಲೇ ಇರುವುದನ್ನು ನಾವೆಲ್ಲಾ ನೋಡಿಯೇ ಇರುತ್ತೇವೆ. ಆದರೆ ಇದೊಂದು ಸಮಸ್ಯೆಯಾಗಿ ಅವರನ್ನು ಕಾಡುತ್ತಿರುತ್ತದೆ. ಇದಕ್ಕೆ ಪ್ರೂರೈಟಸ್ ಎಂದು ಕರೆಯುತ್ತಾರೆ.

ಪ್ರೂರೈಟಸ್ ಎಂದರೇನು?

ಪ್ರೂರೈಟಸ್ ದೀರ್ಘಕಾಲದ ಚರ್ಮದ ತುರಿಕೆಯ ಸಮಸ್ಯೆಯಾಗಿದೆ. ಇದು ತುಂಬಾ ಅಹಿತಕರ ಸಮಸ್ಯೆ ಮತ್ತು ಮುಜುಗರವನ್ನು ಉಂಟುಮಾಡುತ್ತದೆ. ಚರ್ಮದ ಅತಿಯಾದ ಶುಷ್ಕತೆ ಅಂದರೆ ಚರ್ಮ ಹೆಚ್ಚು ಒಣಗಿದಾಗ ಈ ಸಮಸ್ಯೆ ಉಲ್ಬಣವಾಗುತ್ತದೆ. ವಯಸ್ಸಾದಂತೆ ಚರ್ಮವು ತನ್ನ ನೈಸರ್ಗಿಕ ತೇವಾಂಶವನ್ನು ಕಳೆದುಕೊಳ್ಳುವುದರಿಂದ ವಯಸ್ಕರಲ್ಲಿಈ ಸಮಸ್ಯ ಹೆಚ್ಚು ಸಾಮಾನ್ಯವಾಗಿದೆ.

ಪ್ರೂರೈಟಸ್ ಚರ್ಮದ ಸಾಮಾನ್ಯ ಸಮಸ್ಯೆಗಳಲ್ಲಿ ಒಂದು. ಇದು ಗಂಭೀರವಾದ ಸಮಸ್ಯೆಯಲ್ಲ, ಆದರೂ ಇದು ಜನರಿಗೆ ತೀವ್ರ ಕಿರಿಕಿರಿ ಉಂಟುಮಾಡುತ್ತದೆ. ಸಾಮಾನ್ಯವಾಗಿ, ಪ್ರೂರೈಟಸ್ ಚರ್ಮದ ಉರಿಯೂತದ ಕಾರಣದಿಂದ ಉಂಟಾಗುತ್ತದೆ. ಕೆಲವು ಸಂದರ್ಭಗಳಲ್ಲಿ ಕೆಲವು ನರಗಳಿಗೆ ಹಾನಿಯಾಗುವುದರಿಂದ ಈ ಸಮಸ್ಯೆ ಉಂಟಾಗಬಹುದು. ಇದಲ್ಲದೇ ಹೈಪೋಥೈರಾಯ್ಡಿಸಮ್, ಆಸ್ತಮಾ, ಹೆಪಟೈಟಿಸ್, ಔಷಧಿಗಳ ಅತಿಯಾದ ಬಳಕೆ ಮತ್ತು ರಕ್ತಹೀನತೆಗಳ ಕಾರಣದಿಂದ ಇದು ಬರಬಹುದು.

ಚರ್ಮದ ತುರಿಕೆ ಸಮಸ್ಯೆಯ ಲಕ್ಷಣಗಳು

ಈ ಸಮಸ್ಯೆಯ ಲಕ್ಷಣಗಳೆಂದರೆ ಒಣ ಮತ್ತು ಒಡೆದ ಚರ್ಮ, ಕೆಂಪು ಗುಳ್ಳೆಗಳು ಮತ್ತು ಕಲೆಗಳು ಅಥವಾ ಉಬ್ಬುಗಳು. ಹೆಚ್ಚಿನ ಸಂದರ್ಭಗಳಲ್ಲಿ ಪ್ರೂರೈಟಸ್ ನಿರುಪದ್ರವಿ. ಸ್ವಲ್ಪ ಹೊತ್ತು ಚರ್ಮ ತುರಿಸಿದಂತಾಗುತ್ತದೆ. ಅದರೆ ಈ ಸಮಸ್ಯೆ ಹಾಗೆಯೇ ಉಳಿದರೆ ವೈದ್ಯರನ್ನು ತಪ್ಪದೇ ಕಾಣಬೇಕು. ತುರಿಕೆ ಚರ್ಮದ ಸಾಮಾನ್ಯ ಕಾರಣಗಳಲ್ಲಿ ಕೀಟಗಳ ಕಡಿತ, ಅಲರ್ಜಿಗಳು, ಒತ್ತಡ ಮತ್ತು ಎಕ್ಸಿಮಾ ಮತ್ತು ಸೋರಿಯಾಸಿಸ್‌ನಂತಹ ಚರ್ಮದ ಸಮಸ್ಯೆಗಳೂ ಸಹ ಸೇರಿವೆ.

ಚರ್ಮದ ತುರಿಕೆಗೆ ತಕ್ಷಣದ ಪರಿಹಾರ

ತುರಿಕೆಗೆ ತಕ್ಷಣದ ಪರಿಹಾರ ಎಂದರೆ ಮೆಂಥಾಲ್ ಎಂದರೆ ಪುದೀನ ಎಣ್ಣೆಯನ್ನು ತುರಿಕೆ ಇರುವ ಭಾಗಕ್ಕೆ ಹಚ್ಚುವುದು. ಕೊಬ್ಬರಿ ಎಣ್ಣೆ ಅಥವಾ ಹರಳೆಣ್ಣೆಯನ್ನು ಕೂಡ ಬಳಸಬಹುದು. ಈ ಎಣ್ಣೆಗಳಲ್ಲಿ ತಂಪಾದ ಗುಣ ಇರುವುದರಿಂದ ತುರಿಕೆ ತಕ್ಷಣ ನಿವಾರಣೆಯಾಗುತ್ತದೆ. ಸಮಸ್ಯೆಯು ಸೌಮ್ಯವಾಗಿದ್ದರೆ ಹೀಗೆ ದಿನಕ್ಕೆರಡು ಬಾರಿ ಮಾಡಿದರೆ ಒಂದು ವಾರದೊಳಗೆ ಪರಿಹಾರ ಸಾಧ್ಯ. ಮೃದುವಾದ ಮುಲಾಮನ್ನು ಕೂಡ ಬಾಧಿತ ಜಾಗಕ್ಕೆ ಹಚ್ಚಿಕೊಳ್ಳಬಹುದು.

ಅಮೇರಿಕನ್ ಅಕಾಡೆಮಿ ಆಫ್ ಡರ್ಮಟಾಲಜಿಯ ಪ್ರಕಾರ ಚರ್ಮದ ತುರಿಕೆಯನ್ನು ನಿವಾರಿಸಲು ಉತ್ತಮ ಮಾರ್ಗವೆಂದರೆ ಒದ್ದೆ ಬಟ್ಟೆ ಅಥವಾ ಐಸ್ ಪ್ಯಾಕನ್ನು ಪೀಡಿತ ಪ್ರದೇಶಕ್ಕೆ 5ರಿಂದ 10 ನಿಮಿಷಗಳ ಕಾಲ ಇಟ್ಟುಕೊಳ್ಳುವುದು. ಹೀಗೆ ತಂಪಾಗಿಸುವಿಕೆಯು ತುರಿಕೆಗೆ ಕಾರಣವಾಗಬಹುದಾದ ಉರಿಯೂತವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ.

ಇದರ ಜೊತೆಗೆ ನೀರಿನಲ್ಲಿ ನೆನೆಸಿದ ಶುದ್ಧವಾದ ಬಟ್ಟೆಯನ್ನು ಚರ್ಮದ ತುರಿಕೆಯ ಭಾಗಕ್ಕೆ ಸ್ವಲ್ಪ ಹೊತ್ತು ಇಡಬೇಕು. ಇದರಿಂದ ಚರ್ಮದ ತೇವಾಂಶ ಹೆಚ್ಚುತ್ತದೆ ಮತ್ತು ಕಿರಿಕಿರಿ ಕಡಿಮೆಯಾಗುತ್ತದೆ. ಇದು ವಿಶೇಷವಾಗಿ ಮಕ್ಕಳಿಗೆ ತುಂಬಾ ಪ್ರಯೋಜನಕಾರಿಯಾಗಿದೆ.

ಮಾನಸಿಕ ಒತ್ತಡವು ಚರ್ಮದ ಮೇಲೆ ಪರಿಣಾಮ ಬೀರಿ ಕಿರಿಕಿರಿ ಮತ್ತು ತುರಿಕೆಗೆ ಕಾರಣವಾಗುತ್ತವೆ ಎಂದು ಕೆಲವು ಅಧ್ಯಯನಗಳು ತಿಳಿಸಿವೆ. ಒತ್ತಡದ ಸಮಯದಲ್ಲಿ ಹೆಚ್ಚಿದ ತುರಿಕೆಯನ್ನು ಅನುಭವಿಸುವ ಜನರು ಯೋಗ ಮತ್ತು ಧ್ಯಾನದಂತಹ ನಿರ್ದಿಷ್ಟ ಒತ್ತಡ-ಕಡಿಮೆ ಮಾಡುವ ತಂತ್ರಗಳನ್ನು ಪ್ರಯತ್ನಿಸುವುದರಿಂದ ಪ್ರಯೋಜನ ಪಡೆಯಬಹುದು.

ಚರ್ಮದ ತುರಿಕೆ ಸಮಸ್ಯೆಗೆ ಆಯುರ್ವೇದದ ಪರಿಹಾರಗಳು

ಆಯುರ್ವೇದದಲ್ಲಿ, ತುರಿಕೆಯನ್ನು "ಕಂಡು" ಎಂದು ಕರೆಯಲಾಗುತ್ತದೆ ಮತ್ತು ಇದು ಹೆಚ್ಚಾಗಿ ಪಿತ್ತ ಮತ್ತು ಕಫ ದೋಷಗಳಲ್ಲಿನ ಅಸಮತೋಲನದಿಂದ ಉಂಟಾಗುತ್ತದೆ.

• ಈ ಸಮಸ್ಯೆಯ ಪರಿಹಾರಕ್ಕೆ ಬಾಧಿತ ಭಾಗಕ್ಕೆ ಬೇವಿನ ಸೊಪ್ಪನ್ನು ಅರೆದು ಹಚ್ಚಿ ಸ್ವಲ್ಪ ಹೊತ್ತು ಬಿಟ್ಟು ಅದು ಒಣಗಿದ ಮೇಲೆ ಸ್ವಚ್ಛ ಮಾಡಿಕೊಳ್ಳಬೇಕು. ಬೇವಿನ ಎಣ್ಣೆಯನ್ನು ದಿನಕ್ಕೆರಡು ಬಾರಿ ಆ ಭಾಗಕ್ಕೆ ಹಚ್ಚಿಕೊಳ್ಳಬಹುದು.

• ನೈಸರ್ಗಿಕ ಉರಿಯೂತ ನಿವಾರಕವಾಗಿರು ಅರಿಶಿನವನ್ನು ಬೆಚ್ಚಗಿನ ಹಾಲಿನೊಂದಿಗೆ ಸೇವಿಸಬಹುದು ಅಥವಾ ತುರಿಕೆಯನ್ನು ಶಮನಗೊಳಿಸಲು ಪೇಸ್ಟ್ ರೀತಿ ಪೀಡಿ ಪ್ರದೇಶಕ್ಕೆ ಹಚ್ಚಬಹುದು.

• ತಾಜಾ ಅಲೋವೆರಾದ ತಿರುಳನ್ನು ಹಚ್ಚುವುದರಿಂದ ಚರ್ಮ ತಂಪಾಗಿರುತ್ತದೆ ಮತ್ತು ಉರಿಯೂತವನ್ನು ಕಡಿಮೆಯಾಗುತ್ತದೆ. ತ್ವರಿತ ಪರಿಹಾರಕ್ಕಾಗಿ ಇದನ್ನು ನೇರವಾಗಿ ತುರಿಕೆಯ ಭಾಗಕ್ಕೆ ಹಚ್ಚಿಕೊಳ್ಳಬೇಕು.

• ಶ್ರೀಗಂಧ ಮತ್ತು ಗುಲಾಬಿ ನೀರಿನ ಪೇಸ್ಟ್ ಚರ್ಮವನ್ನು ತಂಪಾಗಿಸಲು ಸಹಾಯ ಮಾಡುತ್ತದೆ ಮತ್ತು ತುರಿಕೆ ಕಡಿಮೆ ಮಾಡುತ್ತದೆ.

• ತಾಜಾ ತುಳಸಿ ಎಲೆಗಳನ್ನು ಪುಡಿ ಮಾಡಿ ಅದರ ರಸವನ್ನು ತೊಂದರೆ ಇರುವ ಭಾಗಕ್ಕೆ ಹಚ್ಚಬೇಕು.

ಚರ್ಮದ ತುರಿಕೆ ತಡೆಗಟ್ಟುವ ವಿಧಾನಗಳು

ಚರ್ಮದ ತುರಿಕೆಯನ್ನು ತಡೆಗಟ್ಟಲು ಕೆಲವು ಪರಿಣಾಮಕಾರಿ ವಿಧಾನಗಳು ಹೀಗಿವೆ:

• ಮೊದಲನೆಯದಾಗಿ ಚರ್ಮದಲ್ಲಿ ತೇವಾಂಶವನ್ನು ಕಾಪಾಡಿಕೊಳ್ಳಬೇಕು. ಇದಕ್ಕಾಗಿ ಪ್ರತಿದಿನ ಸ್ನಾನದ ನಂತರ ಸೌಮ್ಯವಾಗಿರುವ ಮಾಯಿಶ್ಚರೈಸರನ್ನು ಮೈಗೆ ಹಚ್ಚಿಕೊಳ್ಳಬೇಕು.

• ಸ್ನಾನ ಮಾಡಲು ಮೃದು ಮತ್ತು ಸೌಮ್ಯವಾಗಿರುವ ಸೋಪುಗಳನ್ನು ಬಳಸಬೇಕು.

• ಅತಿಯಾಗಿ ಬಿಸಿ ನೀರಿನ ಸ್ನಾನ ಮಾಡುವುದನ್ನು ನಿಲ್ಲಿಸಬೇಕು. ಹೆಚ್ಚಾಗಿ ಬಿಸಿಯಾಗಿರುವ ನೀರು ಚರ್ಮದಿಂದ ತೇವಾಂಶವನ್ನು ತೆಗೆದುಹಾಕಬಹುದು. ಇದರ ಬದಲಾಗಿ ಬೆಚ್ಚಗಿನ ನೀರನ್ನು ಸ್ನಾನಕ್ಕೆ ಬಳಸಿ.

• ನಿಯಮಿತವಾಗಿ ಸ್ನಾನ ಮಾಡುವುದು ಮತ್ತು ಸ್ವಚ್ಛವಾದ ಬಟ್ಟೆಗಳು ಚರ್ಮದ ಸೋಂಕುಗಳು ಮತ್ತು ಕಿರಿಕಿರಿಯನ್ನು ತಡೆಯಲು ಸಹಾಯ ಮಾಡುತ್ತದೆ.

• ಚರ್ಮದ ಶುಷ್ಕತೆಯನ್ನು ತಡೆಗಟ್ಟಲು ಸಾಕಷ್ಟು ನೀರು ಕುಡಿಯಿರಿ.

• ಕೆಲವು ಆಹಾರಗಳು, ಬಟ್ಟೆಗಳು ಅಥವಾ ರಾಸಾಯನಿಕಗಳಂತಹ ತುರಿಕೆಗೆ ಕಾರಣವಾಗುವ ವಸ್ತುಗಳನ್ನು ಗುರುತಿಸಿ ಮತ್ತು ಅವುಗಳನ್ನು ಬಿಟ್ಟುಬಿಡಿ.

• ಮಾನಸಿಕ ಒತ್ತಡವು ತುರಿಕೆಯನ್ನು ಇನ್ನಷ್ಟು ಹದಗೆಡಿಸಬಹುದು. ಆದ್ದರಿಂದ ಧ್ಯಾನ ಮತ್ತು ಯೋಗದಂತಹ ಅಭ್ಯಾಸಗಳು ಸಹಾಯ ಮಾಡಬಹುದು.

• ತೈಲಾಭ್ಯಂಗವೂ ಈ ಸಮಸ್ಯೆ ಪರಿಹಾರಕ್ಕೆ ಸಹಾಯಕ.

ಚರ್ಮದ ತುರಿಕೆ ತಡೆಗೆ ಆಹಾರ ಕ್ರಮಗಳು

• ಸೌತೆಕಾಯಿ, ಕಲ್ಲಂಗಡಿ, ತೆಂಗಿನ ನೀರು ಮತ್ತು ಮಜ್ಜಿಗೆಯಂತಹ ತಂಪಾಗಿಸುವ ಆಹಾರಗಳನ್ನು ದಿನನಿತ್ಯದಲ್ಲಿ ಸೇರಿಸಿಕೊಳ್ಳಬೇಕು.

• ಪಿತ್ತ ಮತ್ತು ಕಫ ದೋಷಗಳನ್ನು ಉಲ್ಬಣಗೊಳಿಸುವ ಮಸಾಲೆಯುಕ್ತ, ಹುರಿದ ಮತ್ತು ಅತಿಯಾದ ಉಪ್ಪುಸಹಿತ ಆಹಾರವನ್ನು ಹೆಚ್ಚು ಸೇವಿಸಬೇಕು.

• ಸಾಕಷ್ಟು ನೀರು ಮತ್ತು ಕೊತ್ತಂಬರಿ, ಅಥವಾ ಪುದೀನ ಚಹಾದಂತಹ ಗಿಡಮೂಲಿಕೆ ಚಹಾಗಳನ್ನು ಆಗಾಗ ಕುಡಿಯಿರಿ.

ಸಾರಾಂಶ

ಒಟ್ಟಾರೆಯಾಗಿ ಹೇಳುವುದಾದರೆ ಚರ್ಮದ ತುರಿಕೆ ಆರೋಗ್ಯ ಮತ್ತು ಒಟ್ಟಾರೆ ಯೋಗಕ್ಷೇಮದ ಮೇಲೆ ಪರಿಣಾಮ ಬೀರುವ ಸಮಸ್ಯೆಯಾಗಿದೆ. ಚರ್ಮದ ಸರಿಯಾದ ಆರೈಕೆ, ಸೂಕ್ತ ಆಹಾರ ಸೇವನೆ ಮತ್ತು ಒತ್ತಡ ನಿರ್ವಹಣೆಯು ಇದರ ರೋಗಲಕ್ಷಣಗಳನ್ನು ತಡೆಗಟ್ಟಲು ಮತ್ತು ನಿವಾರಿಸಲು ಸಹಾಯ ಮಾಡುತ್ತದೆ. ಬೇವು, ಅರಿಶಿನ, ಅಲೋವೆರಾ ಮತ್ತು ತೆಂಗಿನ ಎಣ್ಣೆಯಂತಹ ಆಯುರ್ವೇದ ಪರಿಹಾರಗಳು ದೇಹದ ದೋಷಗಳನ್ನು ಸಮತೋಲನಗೊಳಿಸುವ ಮೂಲಕ ಮತ್ತು ಚರ್ಮದ ಆರೋಗ್ಯವನ್ನು ಉತ್ತೇಜಿಸುವ ಮೂಲಕ ಈ ಸಮಸ್ಯೆಗೆ ನೈಸರ್ಗಿಕ ಪರಿಹಾರವನ್ನು ನೀಡುತ್ತವೆ. ಜೊತೆಗೆ ನೈರ್ಮಲ್ಯವನ್ನು ಕಾಪಾಡಿಕೊಳ್ಳುವುದು, ಸಾಕಷ್ಟು ನೀರು ಕುಡಿಯುವುದು ಮತ್ತು ಸೌಮ್ಯವಾದ, ನೈಸರ್ಗಿಕ ಉತ್ಪನ್ನಗಳನ್ನು ಬಳಸುವುದು ತುರಿಕೆಯನ್ನು ಪರಿಣಾಮಕಾರಿಯಾಗಿ ನಿರ್ವಹಿಸುವಲ್ಲಿ ಮತ್ತಷ್ಟು ಸಹಾಯ ಮಾಡುತ್ತದೆ. ಹೀಗೆ ಸರಿಯಾದ ಕಾಳಜಿಯೊಂದಿಗೆ ಚರ್ಮದ ತುರಿಕೆಯನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸಬಹುದು.